RRI! okọ na orọ evaọ ukpokpoma! O be bẹre ewewẹe! Kọ whọ ruẹ ahwo nọ alahọ evaọ ame na? Ejọ ebe zẹzẹ te okpa no. Kọ Pọl ọrọ etenẹ? J’oma gwọlọ riẹ oware nọ ojẹ via kẹe na.

Kareghẹhọ, ikpe ivẹ yọ Pọl ọrọ ọnọ amuimu evaọ Sisaria. Koyehọ afi rie avọ amọfa jọ nọ amuimu họ evaọ okọ, a te mu obọ Rom họ ẹnya. Okenọ a bi kẹle ukoliko Kriti, ofou ologbo o te do ghelae. Ofou na ofou ga te epanọ okọ na orọ bẹ ahwo na ẹkpọ. Yọ a sae jẹ ruẹ ọre evaọ oke uvo ho hayo kọ isi evaọ aso ho. Ukuhọ riẹ nọ edẹ buobu eze vrẹ no, enọ erọ okọ na a gbe wo ẹruore usiwo ọvuọvo ho.

Kẹsena Pọl o te dikihẹ ọ tẹ ta nọ: ‘Ọvuọvo rai nọ uzuazọ riẹ u re ti vrẹ ọ riẹ hẹ; ajokpa okọ na ọvo u re ti vrẹ. Keme aso nọ ọvrẹ na ẹnjẹle Ọghẹnẹ ọ nya bru omẹ ze ọ tẹ ta nọ, “Whọ dhẹ ozọ họ, Pọl! Who re ti dikihẹ aro Siza osu Rom. Yọ Ọghẹnẹ o re ti siwi enọ wha gbẹ rọ ubiokọ na kpobi.”’

Oke udevie aso evaọ ẹdẹ avọ 14 nọ ofou na o ro muhọ no, enọ i bi bi okọ na a te muẹrohọ nnọ ame na ẹkpẹkpafua ọrọ! Fiki ozodhẹ nọ a te roma fa itho jọ eva ebi, a te fi imuokọ rai họ ame. Ohiohiẹ riẹ a tẹ ruẹ uto. A tẹ gbamu nnọ a rẹ dao re a bi okọ na kpohọ unueri nọ ọrọ etẹ.

Whaọ, okenọ a kẹle okpa no, okọ na u te duwu otọ u te mu. Kẹsena ẹkporo na o te mue’i họ ẹtehọ gaga, okọ na u te muhọ ẹbẹre ewewẹe. Oletu ẹmo nọ o wo uzou ọ tẹ ta nọ: ‘Whai kpobi ọnọ ọ rẹ sae ya ame jọ ọ kake la fihọ abade re ọya kpahe okpa. Whai enọ ikiọkọ a vẹ la lelai, jẹ tabọ họ ewẹe jọ nọ ino okọ na ze nọ wha re kru.’ Whaọ oyena họ onọ a ru. Evaọ edhere ọnana ahwo 276 nọ ejọ okọ na a rọ kpahe okpa omavrẹrẹ, nwane wọhọ epanọ ẹnjẹle na ọya eya.

Ukoliko na a re se nọ Malita. Ahwo na a you gaga, a tẹ sẹro ahwo nọ ano okọ na ze. Nọ ehru ọze sasa no, a te fi Pọl họ okọ ofa a jẹ rehiẹe kpobọ Rom.