Evuẹ Rọkẹ Enọ E Ziọ Okokohọ Na
EGWAE OBỌDẸ
IRUO EBẸTẸLE Iwhowho-uvie nọ e họ-ame no nọ e rrọ umuo ikpe 35 kpotọ, nọ e gwọlọ kpohọ Ebẹtẹle, a sai kpohọ ẹgwae nọ a te gba kugbe ahwo nọ a gwọlọ kpohọ Ebẹtẹle evaọ ohiohiẹ Edisoi-Oka. A ti whowho oria gbe oke ẹgwae na taure oke na u te ti te.
ISUKULU RỌKẸ ETAUSIUWOMA UVIE NA Ekobaro nọ e rọ umuo ikpe 23 rite 65 nọ e gwọlọ wobọ viere evaọ iruo Uvie na, a sai kpohọ ẹgwae nọ a te gba kugbe ahwo nọ a gwọlọ kpohọ Isukulu Rọkẹ Etausiuwoma Uvie Na evaọ ohiohiẹ Ẹdoka. A ti whowho oria gbe oke ẹgwae na taure oke na u te ti te.
EVUẸ RỌKẸ ENỌ E ZIỌ OKOKOHỌ NA
AME-ỌHỌ A te nya siọ ekpala nọ e rrọ uhie obaro evaọ aro eplatfọmo na ba kẹ ahwo nọ a be te họ-ame na, otẹrọnọ enwene jọ ọ te jariẹ, a ti whowho iei via. U fo nọ ahwo nọ a te họ-ame na a rẹ keria oria nọ a ruẹrẹhọ kẹ ae taure ẹme ame-ọhọ na o te ti muhọ evaọ ohiohiẹ Ẹdẹ-Ọmaha. Omomọvo ọ rẹ wha omokpa gbe ẹgọ ame-ọhọ nọ ọ rrọ kpatiẹ ze.
EKPALA Iviena roro kẹ amọfa. Kareghẹhọ nọ ahwo nọ wha gbẹ ruọ omoto ze, ahwo uviuwou ra, hayo enọ who bi wuhrẹ obe kugbe ọvo whọ rẹ sae sẹro ekpala kẹ. Iviena whọ nyasiọ eware ba ehru ekpala nọ e kẹle owhẹ hẹ, onana o rẹ lẹliẹ amọfa ruẹ nọ eria yena e gbẹ rrọ ifofe.
ERUẸRẸAHWOHỌ Iruo ahwo nana họ, re a fiobọhọ kẹ owhẹ. Iviena yoẹme kẹ ai ziezi nọ a te bi dhesẹ oria nọ whọ rẹ dhẹ omoto, imotosaikoro hayo ẹdhighere ra fihọ, hayo oria nọ whọ rẹ keria gbe eware efa.
IRUO UNEVAZE Whọ tẹ gwọlọ fiobọhọ evaọ iruo sa-sa nọ e rrọ okokohọ na, iviena kpohọ ẹko-iruo nana, a ti dhesẹ oria nọ a jọ gwọlọ obufihọ kẹ owhẹ.
ORIA EWARE NỌ I VRU NỌ A RUẸ A rẹ rehọ eware kpobi nọ i vru, nọ a ruẹ tọlọ kpohọ oria nana. Otẹrọnọ oware ra jọ u vru, iviena kpohọ oria nana nyai vuhu onọ o rrọ ora. Whọ tẹ ruẹ ọmọ nọ o vru siọ ọsẹgboni riẹ ba, iviena rehọ iẹe kpohọ oria nana. Rekọ wha riẹ nọ oria nana o rrọ oria nọ a rẹ jọ rẹrote emọ kẹ ahwo ho. Iviena wha rẹrote emọ rai, jẹ ruẹ nọ a rrọ kugbe owhai ẹsikpobi.
ORIA IMU Iviena riẹ nọ ahwo nọ ẹyao IDUDHE o kie ỌVO a rẹ wọ kpohọ etenẹ na.
UNEVAZE A raha igho buobu rọ bọ Ọgwa Okokohọ nana, dẹ ekwakwa ikporakporo, gbe eware efa sa-sa re ma sae reawere okokohọ na jẹ sae rọ ere si kẹle Jihova. Unevaze ra u ti fiobọhọ kẹ omai ruẹ ugho rọ hwa araha nana, jẹ rọ tha iruo akpọ-soso na uke. Whọ te jọ eria sa-sa evaọ Ọgwa Okokohọ na ruẹ itehe nọ a kere fihọ nọ Contribution (azọhọ-unevaze). Unuigho kpobi nọ who ro ru unevaze o te da omai ẹro. Utu Ẹruorote Iruẹru Isẹri Jihova na u bi yere owhai ziezi rọkẹ unevaze nọ wha bi ru rọ tha iruo Uvie na uke.
Okokohọ Isẹri Jihova Onọ Utu Ẹruorote Iruẹru Isẹri Jihova O Ruẹrẹhọ
