“Iwuhrẹ u fo nọ wha rẹ jọ.” (Hib. 5:12) Oyena u gbunu kẹhẹ! Jihova họ Owuhrẹ nọ ọ mae riẹ ewuhrẹ kpaobọ evaọ odhiwu gbe akpọ, yọ o bi zizie omai re ma wuhrẹ amọfa kpahe iẹe! O tẹ make rọnọ evaọ uviuwou, evaọ iwuhrẹ ukoko, hayo usi uwoma ota ma bi jo wuhrẹ ahwo uzẹme na kpahe Jihova, onana yọ obọdẹ uvẹ-ọghọ gbe iruo ilogbo. Ẹvẹ ma sai ro wuhrẹ ziezi?

Ma rẹ sae ruẹ uyo onọ yena evaọ ẹme nọ Pọl o kere se Timoti inọ: “Gbẹ hae romakẹ isase ẹgbede, hae kẹ uduotahawọ je wuhrẹ ahwo.” Pọl o fibae nọ: “Enẹ oruo who ti ro siwi omara gbe enọ e gaviezọ kẹ owhẹ.” (1 Tim. 4:13, 16) Ovuẹ nọ u re siwi uzuazọ ahwo oye a kẹ owhẹ nọ whọ nyae vuẹ amọfa na. Fikiere u wuzou gaga re whọ hae daoma ru isase ẹgbede ra gbe ewuhrẹ ra woma ẹsikpobi. A ru ibroshọ nana re u fiobọhọ kẹ owhẹ ru ere. Joma ta kpahe eware jọ nọ e riẹe eva.

Jihova họ “Owuhrẹ Ologbo Oride” na. (Aiz. 30:20) Dede nọ ibroshọ nana o ti fiobọhọ kẹ owhẹ wo onaa isase ẹgbede gbe ahwo owuhrẹ ziezi, jọ o thọrọ owhẹ ẹro ho inọ Jihova họ ọnọ ọ kẹ omai ovuẹ nọ ma be vuẹ ahwo na gbe inọ ọye họ ọnọ o re si ahwo ziọ ukoko na. (Jọn 6:44) Fikiere hae lẹ kẹ ẹzi ọfuafo na ẹsikpobi. Hae rehọ iwuhrẹ ra no Ebaibol na ze kẹse kẹse. Hae kpọ iroro ahwo bru Jihova orọnikọ omara vievie he. Daoma fiobọhọ kẹ enọ e be gaviezọ kẹ owhẹ re a wo uyoyou ogaga kẹ Ọghẹnẹ.

A zizie owhẹ no re whọ rehọ ovuẹ nọ o mai wuzou nọ a rọ kẹ ahwo-akpọ na wuhrẹ ahwo. U mu omai ẹro nọ who ti ru onana ziezi nọ whọ be “rẹroso ẹgba nọ Ọghẹnẹ ọ rẹ kẹ” na.—1 Pita 4:11.

Ibe iwuhrẹ ra,

Utu Ẹruorote Iruẹru Isẹri Jihova