Ebaibol na e ta nọ Setan họ ọnọ “o bi su akpọ na thọ.” (Eviavia 12:9) Setan avọ idhivẹri riẹ a gwọlọ nọ ma rọwo Ẹme Ọghẹnẹ, Ebaibol na ha. A rẹ daoma ru ahwo rọwo nnọ iwhuowhu na arọ uzuazọ obojọ eva akpọ izi. Joma ruẹ epanọ a bi ru oyena.

Egagọ buobu i wuhrẹ nọ ohwo kpobi o wo ẹwẹ nọ o re kpohọ akpọ izi nọ ugboma na u te whu no. A ta nnọ ugboma na u re whuẹ rekọ ẹwẹ na o re whuẹ hẹ. Ofariẹ, a ta nnọ ẹwẹ na ọ rẹ sai whuẹ hẹ, nnọ ọ rẹ ria bẹdẹ bẹdẹ.

Rekọ Ẹme Ọghẹnẹ o wuhrẹ ere he. Ebaibol i dhesẹ nnọ ẹwẹ na họ ohwo na, orọ oware jọ nọ orọ ohwo ho. Wọhọ oriruo, eva edhesẹ oghẹrẹ nọ a ma Adamu, enẹ Ebaibol e ta: “Koyehọ, Jihova Ọghẹnẹ ọ tẹ rehọ ovu-otọ ma ọzae na, o te ku ẹwẹ uzuazọ fihọ ighogho inwe riẹ, ọzae na o te zihe ruọ ẹwẹ nọ ọ be ria.” (Emuhọ 2:7) Fikiere a kẹ Adamu ẹwẹ hẹ; rekọ ẹwẹ ọye ọjọ.

A se erao ewẹ re.—Emuhọ 1:20, 21, 24, 30.

Nọ ẹme Ebaibol na “ẹwẹ” o dhesẹ nọ yọ ohwo na oma riẹ na,  u re gbe omai unu hu ma te wuhrẹ nnọ ewẹ e rẹ sai whuẹ, yọ i bi ghine whuẹ. Ikereakere na e ta nọ:

• “Ẹwẹ nọ ọ be thọ uzi—ọ ye oma riẹ o re ti whuẹ.”—Izikiẹl 18:4.

• “Samsin ọ tẹ ta nọ: ‘A jọ ẹwẹ mẹ o whu kugbe ahwo Filistia.’”—Ibruoziẹ 16:30.

• “U fo re ẹdẹ ẹdijala a ru uwoma orẹ uyoma, re a ro siwi uzuazọ hayo re a kpe ẹwẹ?”—Mak 3:4.

Ikereakere efa i dhesẹ nọ a rẹ sai kpe ẹwẹ (Emuhọ 17:14), whu-uwhu ọgbọdọ (Joshua 10:37), dhe-ofu (Job 7:15), ọ vẹ jẹ da-ame whu (Jona 2:5). Fikiere, ẹwẹ na o re whuẹ.

Otẹrọnọ who se Ebaibol na no emuhọ te ekuhọ, “ẹwẹ sebaewhuo” yọ ẹme nọ who re dukuẹ vievie he. Ẹwẹ ohwo na yọ ẹzi hi. Uwuhrẹ ọ ẹwẹ sebaewhuo na yọ uwuhrẹ Ebaibol ho. Onana uwuhrẹ Setan avọ idhivẹri riẹ. Jihova o mukpahe erue ọ egagọ kpobi.—Itẹ 6:16-19; 1 Timoti 4:1, 2.

Edhere ọfa nọ Setan o bi ro su ahwo thọ họ ẹkwoma ọ ebuẹva. Ọbuẹva yọ ohwo nọ ọ rẹ sae wo evuẹ no obọ akpọ imizi ze. Ahwo buobu, kugbe ebuẹva na oma rai, a rọwo nnọ evuẹ enana i no obọ izi enọ i whu no ze. Rekọ wọhọ epanọ ma ruẹ no Ebaibol ze na, onana o sae jọ ere vievie he.—Ọtausiwoma Na 9:5, 6, 10.

Otẹrọ ere, kọ obọ amono, evuẹ enana i bi nọze? Obọ idhivẹri na omarai! Idhivẹri na a rẹ sai muẹro họ ohwo okenọ ọ gbẹrọ uzuazọ; a riẹ etata ẹme ohwo na, oghẹrẹ eriwo riẹ, oware nọ o ru, gbe enọ ọ riẹ. Fikiere o rẹ lọlọhọ rọ kẹ ae re a ru wọhọ ahwo nọ a whuno.—1 Samuẹle 28:3-19.

Edhere ọfa nọ Setan ọ be rọ wha erue haro kpahe iwhuowu na họ ẹkwoma ikuigbe erue. Ẹsibuobu ikuigbe itieye na i re ku ahwo kufiẹ no uzẹme Ebaibol.—2 Timoti 4:4.

Eva Africa iku erue buobu e riẹ kpahọ ahwo ekpokpọ nọ a ruerẹ yọ a whuno. Ẹruẹ oghẹrẹ utiona o rẹ jọ thethabọ no oria nọ ohwo na ọ jẹ ria vẹre. Rekọ nọ oma ra: ‘Kọ orọ oware areghẹ otẹrọnọ ohwo o wo ogaga nọ o ro zihe no iwhuowhu tha, o ve zihe kpo obojọ thethabọ siọ uviuwou riẹ gbe ezọ riẹ ba?’

Ofariẹ, kọ osae jọ nọ ohwo nọ a ruerẹ na ọ faki tho ohwo nọ o whu no na? Wọhọ oriruo, egbodibo Ileleikristi ivẹ nọ e jẹ ta usiwoma eva okogho iwhre a muẹrohọ ọkpọkuọzae jọ etoke euwa buobu nọ o je lele ai. Nọ a nọe onọ, a tẹ riẹ nnọ ọzae ọnana ororo nọ omọvo egbodibo na jọ họ oniọvo riẹ nọ owhu ikpe buobu vrẹ no. Uzẹme, o vuhu thọ, rekọ ọ rọwo nnọ o vuhu thọ họ. Whọ dai roro ikuigbe nọ ọkpọkuọzae ọnana o gbe kẹ ezọ gbe erivẹ riẹ uwhremuna!

Avro ọriẹ hẹ nnọ whọ riẹ kpahọ oghẹrẹ eware jọ nọ ahwo a ruẹ, yo, hayo wezẹ ewezẹ kpahe. Oghẹrẹ iruẹru imizi egaga itieye na e rẹ wha idudu se ahwo nọ e be via kẹ. Marein, nọ ọ be ria obọ Ukiediwo-ọre Africa, ẹsikpobi o je yo urru ọrọ oni-ologbo riẹ nọ o whuno nọ o je sei oke aso. Fiki ọ idudu, Marein o ve bo-unu, ọ vẹ rọwo ahwo uviuwou riẹ no owezẹ ze. Ukuhọ riẹ, oruẹ u te kru ei.

Whaọ, otẹrọnọ iwhuowhu na egbẹrọ uzuazọ, o rọ oware areghẹ re a wha idudu họ enọ a you? Ijo. Ehri evuẹ enwoma itieye na obọ idhivẹri i nọze.

Rekọ ẹvẹ kpahọ evuẹ nọ e wọhọ obufihọ gbe omosasọ? Wọhọ oriruo, Gbassay, obọ Sierra Leone, ọ jẹ mọ. Ọ jọ ewezẹ ruẹ ọsẹ riẹ nọ o whuno. Ọ tẹ ta kẹ e nọ o kpohọ ure jọ, re ọ kọrọ obe riẹ, gwae kugbe ame, re ọ da e. Re o te ti ru onana ọ rẹ ta ẹme kugbe ohwo ọvo ho. O ghine ru ere oma riẹ o tẹ ga.

Aye ọfa ọ ta nnọ ọzae riẹ ọrọ omavia kẹ e nọ o whu aso ọvo vrẹno. Ọ ta nnọ ọ jọ wowoma ọ tẹ jẹ wha iwu nọ i re ziezi họ.

 O wọhọ nọ evuẹ gbe eruaruẹ itieye na e rọ ziezi e tẹ jẹ rọ obufihọ. Kọ obọ Ọghẹnẹ i nọze? Ijo, i no obọ riẹ zehe. Jihova họ “Ọghẹnẹ uzẹme na.” (Olezi 31:5) Ọ rẹ sai fiomai iwhayo hayo viẹ omai họ vievie he. Idhivẹri na ọvo i re ru oyena.

Rekọ idhivẹri iwoma e rọ? Ijo. A tẹ maki ru wọhọ nọ a bi fiobọhọ ẹsejọ dede, aikpobi a re yoyoma. Okenọ Ẹdhọ ọ ta ẹme kẹ Ivi, o ru oma riẹ wọhọ ogbẹnyusu kẹ e. (Emuhọ 3:1) Rekọ eme ono rie te i okenọ ọ gaviezọ kẹ e je ru onọ ọ ta e? O te whu.

Whọ riẹ nnọ re ohwo oyoma o muogbẹnyusu kugbe otu nọ ọ gwọlọ viẹhọ je frure, yọ oware nọ ovọ eria kpobi. “Ibiakọ efuafo, eva ibiebi,” ere itẹ ahwo Africa e ta. Yọ Ẹme Ọghẹnẹ ọ ta nọ: “Setan oma riẹ ọ rẹ rehọ oma ru ẹnjẹle elo.”—2 Ahwo Kọrint 11:14.

Ọghẹnẹ ọ gbẹ be rehọ ẹkwoma ewezẹ, eruaruẹ, hayo irru no akpọ izi rọ ta ẹme kugbe ahwo otọakpọ họ. Ọ be rehọ ẹkwoma Ebaibol na ro su ae je wuhrẹ ai, onọ u re ru ohwo “thoma kẹ iruo iwoma kpobi.”—2 Timoti 3:17.

Fikiere, okenọ Jihova ọ tẹ k’omai unuovẹvẹ kpahe eviẹhọ Ẹdhọ na, o ru onana fiki uyoyou nọ o wo k’omai. Ọ riẹ nnọ idhivẹri na yọ ewegrẹ nọ ekpahe ẹta.