Izi e rọ! Evaọ akpọ izi nọ a rẹ ruẹ hẹ na, izi imuomu gbe iwoma e rọ. Kọ ae yọ ahwo nọ a ria vẹre no je whu eva ọ otọakpọ?

Ijo, a rọ ere he. Okenọ ohwo o whu, te ọzae hayo aye a re kpohọ akpọ ẹzi ọfa ha, wọhọ oghẹrẹ nọ ahwo buobu a re roro. Ẹvẹ ma rọ riẹ onana? Keme ere Ebaibol e ta. Ebaibol na yọ obe uzẹme nọ u no obọ Ọghẹnẹ uzẹme ọvuọvo na ze, nọ odẹ riẹ orọ Jihova. Jihova ọ ma ahwo; ọ riẹ oware nọ o rẹ via eva oke uwhu.—Olezi 83:18; 2 Timoti 3:16.

Ebaibol na e ta nọ Ọghẹnẹ ọma Adamu, ohwo ọsosuọ, “no ovu-otọ ze.” (Emuhọ 2:7) Ọghẹnẹ o fi rie i họ eva Aparadase, ogege Idẹn na. Otẹrọnọ Adamu o yo ẹme kẹ uzi Ọghẹnẹ vẹre, ọ jẹ hae ti whu hu; ọ hae gbẹ te jọ eva otọakp̣ọ na nẹnẹ na. Rekọ nọ Adamu ọ rọ aro-koko raha uzi Ọghẹnẹ, Ọghẹnẹ ọ tẹ ta kẹ e nọ: “Who [ti] zihe kpo ẹkpẹ, keme ọ ye who nọze. Keme whẹ ẹkpẹ, jẹ ruọ ẹkpẹ who ti zihe rua.”—Emuhọ 3:19.

Eme onana u dhesẹ? Whaọ, diẹse Adamu ọ jọ vẹre taore Jihova ọ tẹ tẹ mae no ovu-otọ ze? Ọ jọ oria ovo ho. Ọ jọ ẹzi nọ a yẹ eva obọ odhiwu hu. Ọ jọ uzuazọ họ. Fikiere nọ Jihova ọ ta kẹ Adamu nọ “who reti zihe kpo ẹkpẹ,” otọ riẹ họ Adamu o re ti whuẹ. Ọ favrẹ kpohọ akpọ izi hi. Eva oke uwhu, Adamu ọ tẹ zoma se uzuazọ ba ewo, se ba ẹria. Uwhu yọ se uzuazọ ba ẹjọ.

Rekọ ẹvẹ kpahọ amọfa nọ a whu no? Kọ a gbẹ rọ uzuazọ họ? Ebaibol e kẹ u yo nnọ:

•  “Ai kpobi [te ahwo te erao] oria ovo a rẹ nya. Ai kpobi ovu a nọze, jẹ ruọ ovu a re ti zihe rua.”—Ọtausiuwoma Na 3:20.

• “Iwhuowhu na . . . a riẹ oware ovo ho.”—Ọtausiuwoma Na 9:5.

• “Uyoyou gbe egrẹ gbe ihrieriọ rai kpobi i whu no.”—Ọtausiuwoma Na 9:6.

• “Keme iruo hayo iroro hayo eriariẹ hayo areghẹ e rọ eva ọ Sheol hu [uki na], obo nọ who bi kpohọ na.”—Ọtausiuwoma Na 9:10.

• “[Ohwo] o ve zihe kpo ẹkpẹ; eva ẹdẹ ọvo ọyena iroro riẹ evẹ raha.”—Olezi 146:4.

Kọ o rọ ẹbẹbẹ k’owhẹ re whọ rọwo ikere enana? Otẹrọ ere, roro kpahe iẹe: Eva iviuwou buobu, ọzae na ọ rẹ kokọ re o ro fiobọhọ kẹ ekru riẹ. Ọzae na o te whu, yọ ọbẹwẹ ọ ze uviuwou na no. Ẹse jọ aye gbe emọ riẹ ugho nọ a wo u gbe te ae dẹ emu-ore he. Tubọ dede, ewegrẹ ọzae na a rẹ ta eme iyoma kẹ ae. Whọ nọ oma ra onọ:  ‘Otẹrọnọ ọzae nana ọ be ria obọ akpọ izi, eme o gbe bi fiobọhọ kẹ uviuwou riẹ hẹ? Eme ọ gbẹ be thọ uviuwou riẹ no obọ ahwo omuomu hu?’ Orọ ere keme ikere na e rẹ gbagba. Ọzae ọyena ọ gbẹrọ uzuazọ họ, ọ gbẹ sai ru oware ovo ho.—Olezi 115:17.

Kọ onana u dhesẹ nọ iwhuowhu na a gbe ti zihe ze uzuazọ ofa ha? Ijo, orọ ere he. Ma rẹ te ta kpahọ ẹkparomatha na okeofa. Rekọ onana u dhesẹ nnọ ahwo whuowhu a riẹ oware nọ who bi ru hu. A rẹ sae ruẹ owhẹ hẹ, je yo ẹme ra, hayo ẹmeọta k’owhẹ hẹ. U fo re whọ dhozọ rai hi. A rẹ sai fiobọhọ k’owhẹ hẹ, yọ a rẹ sae nwa owhẹ oma ha.—Ọtausiuwoma Na 9:4; Aizaya 26:14.