Ahwo izi na kpobi nọ Jihova ọ ma a jọ ziezi. Kẹsena ẹnjẹle ọvo jọ o te zi yoma. Ọye họ Setan Ẹdhọ na. Setan ọ gwọlọ ahwo akpọ na re a gọ e vi kpe ọ Jihova. Onana họ oware nọ ovia:

Eva ogege Idẹn, ire buobu e jọ eva riẹ nọ e jẹ mọ ibi ire awere. Jihova ọ tẹ takẹ Adamu avọ aye riẹ, Ivi, nnọ a rẹ sae jọ ibi ire na re odode. Rekọ ure ovo jọ ojọ nọ Ọghẹnẹ ọ ta nnọ a rẹ jarọ ria ha. Ọ ta nnọ otẹrọnọ a jarọ re, a re ti whuẹ.—Emuhọ 2:9, 16, 17.

Ẹdẹjọ nọ Ivi ọvo ọ jọ araomuomu ọ tẹ ta ẹme kẹ e. Yọ orọnikọ araomuomu na ọ jẹ ghinẹ ta ẹme na ha; Setan Ẹdhọ na họ ọnọ o ru rie i wọhọ nọ araomuomu na ọ be ta ẹme na. Setan ọ ta kẹ Ivi nnọ otẹrọnọ ọ jọ ubi-ure aghọ na re, o re ti wo areghẹ wọhọ Ọghẹnẹ. Ọ tẹ jẹ ta re nnọ o re ti whuẹ hẹ. Eko eme ivẹ enana ọvo ọrọ uzẹme he. Ghele na, Ivi ọrọwo Setan ọ tẹ re ubi-ure na. Uwhremu riẹ, ọ tẹ rehọ ọ jọ kẹ Adamu, ọ tẹ re re.—Emuhọ 3:1-6.

Eva ọ ikuigbe uzẹme nana, ma wuhrẹ nọ Setan yọ ohwo ọwọsuọ gbe oguilaya. Ọ ta kẹ Ivi nnọ ọ tẹ ghẹmeeyo kẹ Ọghẹnẹ, o re ti whuẹ hẹ. Oyena yọ ọrue. O ghine whu jẹ ruọ ere Adamu owhu re. Setan o whu eva oke yena ha, dede o re ti whuẹ keme ọ thọ uzi. Rekọ enẹna ọ gbẹ rọ uzuazọ o te je bi su ahwo akpọ thọ. Ọ gbẹrọ oguilaya, ọ tẹ jẹ be dao oma re oru ahwo raha izi Ọghẹnẹ.—Jọn 8:44.

Uwhremuna, enjẹl efa i te zi yoma. Enjẹle nana a fi ẹro họ emetẹ iwoma akpọ a tẹ gwọlọ nnọ a re bru-ẹnwae kugbe ai. Fikiere a tẹ ze otọakpọ a te nwene oma ezae fihọ oma rai. A te mu eyae na họ ẹrehọ kẹ omobọ rai. Onana umukpahe ẹjiroro Ọghẹnẹ.—Emuhọ 6:1, 2; Jud 6.

Onana o tẹ jẹ wha uye buobu se ohwo akpọ. Eyae enjẹle enana a yẹ emọ, rekọ a jọ emọ aruro ho. A rro fihọkẹ ozighi gbe eguara muomu. Ukuhọriẹ nọ otọakpọ na o te vọ avọ ozighi no Jihova ọ tẹ jẹ iroro nnọ ọ rẹ rehọ ẹvo ologbo kpe ahwo omuomu na. Uviuwou Noa ohwo okiẹrẹre na ọvo họ enọ e zọ vrẹ Ẹvo na.—Emuhọ 6:4, 11; 7:23.

Enjẹle imuomu na dede, a te ti zihe kpo akpọ izi; a whu hu. Rekọ uye ute rai. A gbẹ kẹ ai uvẹ re a wariẹ zihe ruọ uviuwou enjẹle ikiẹrẹre Ọghẹnẹ hẹ. Ofariẹ, Jihova ọ gbẹ kẹ ae uvẹ re a rehọ oma ahwo akpọ họ. Ukuhọ riẹ kọ a re ti whuẹ eva ẹdhoguo ologbo na.—2 Pita 2:4; Jud 6.

Eva abọ emuhọ ọrọ udhukpe-usoi mai na, ẹmo ọjọ obọ odhiwu. Obe Eviavia ọ Ebaibol na u dhesẹ oware nọ ovia: “Ẹmo o te du lahwe eva obọ odhiwu: Maekẹl [Jesu Kristi nọ a kpare no uki ze na] avọ enjẹle [iwoma] riẹ a te fiẹmo kugbe odudu na [Setan], yọ odudu na avọ enjẹle [iyoma] riẹ a họre, rekọ o gbe fikparobọ họ, hayo kọ a gbe duku oria kẹ ae ofa eva obọ odhiwu hu. Koyehọ a gele odudu ologbo na fihọ otọ, araumuemu ọsosuọ na, ọnọ a se Ẹdhọ gbe Setan na, nọ o bi su akpọ na kpobi thọ na; a gele i rie fihọ obọ otọakpọ yọ a gele enjẹle [iyoma] riẹ lele ie re.”

Eme ono rie i ze? Ekere na ọ gbẹ ta họ aro: “Fiki onana, wha ghọghọ whai idhiwu gbe enọ e be ria eva rai!” Enjẹle iwoma enana a rẹ sae ghọghọ keme Setan gbe enjẹle iyoma riẹ, hayo izi, a gbẹrọ eva obọ odhiwu hu. Rekọ kọ ẹvẹ kpahọ ahwo otọakpọ? Ebaibol na e ta nọ: “Uye u te akpọ gbe abade keme Ẹdhọ na ọ ze otọ bru owhai ze i no, ọ vọ avọ ofu ologbo, keme ọ riẹ nọ oke kpẹkpẹe ọvo o woi.”—Eviavia 12:7-9, 12.

Ẹhẹ, Setan avọ ikọ imuomu riẹ a bi su ahwo thọ jẹ be wha iye ilogbo se ahwo akpọ. Enjẹle imuomu enana a re se ai idhivẹri. Ewegrẹ Ọghẹnẹ a rọ. Ai kpobi a re muomu.