Nọ Jọn Ọhọahwo-Ame na ọ ta usiuwoma te oware wọhọ emerae ezeza no, Jesu nọ ọ kpako te enwenọ ikpe 30 no ọ tẹ nya bru ei ziọ Ethẹ Jọdan. Eme ọ nyai ru? Orọnikọ o weze bru rie ze gheghe he. Yọ orọnikọ ọ nyai rri epanọ iruo Jọn e nyaharo te no gbe he. Ukpoye, ọ nya re Jọn ọ họe ame.

Wọhọ epanọ ma rẹ sai rẹro riẹ, Jọn ọ se inọ: “Whẹ u fo nọ whọ rẹ họ omẹ ame, kọ whọ tẹ be nya bru omẹ ze?” (Matiu 3:14) Jọn ọ riẹ nọ Jesu yọ Ọmọ ọghaghae Ọghẹnẹ. Kareghẹhọ nọ Jọn o duola avọ oghọghọ evaọ edhede oni riẹ evaọ okenọ Meri nọ o dieva Jesu họ o weze bru Ẹlizabẹt oni Jọn. Ababọ avro, Ẹlizabẹt ọ vuẹ Jọn ọmọ riẹ kpahe onana. Yọ u muẹro nọ a vuẹ riẹ kpahe epanọ ikọ-odhiwu i ro whowho nọ a yẹ Jesu no gbe epanọ e rọ romavia kẹ ithuru-igodẹ evaọ aso nọ a ro yẹ Jesu.

Jọn ọ riẹ nọ ahwo nọ a kurẹriẹ no izieraha rai họ enọ ọ rẹ họ ame. Rekọ Jesu yọ ọrahaizi hi. Dede nọ Jọn ọ se, Jesu ọ ta nọ: “Jọ o jọ enẹ evaọ oke nana, keme ere oruo ma sai ro ru eware kpobi nọ e rrọ oreva Ọghẹnẹ gba.”—Matiu 3:15.

Fikieme o rọ gwọlọ nọ Jesu ọ rẹ họ-ame? Orọnikọ Jesu ọ be họ-ame ro dhesẹ nọ o kurẹriẹ no izieraha jọ họ. Ukpoye, ame-ọhọ riẹ u dhesẹ nọ ọ gwọlọ roma kẹ eruo oreva Ọsẹ riẹ. (Ahwo Hibru 10:5-7) Iruo ekapenta Jesu ọ rrọ anwẹdẹ, rekọ obọnana iruo odibọgba nọ Ọsẹ obọ odhiwu riẹ o vi rie ziọ akpọ ti ru o bi ti muhọ na. Kọ who roro nọ Jọn o bi rẹro nọ oware igbunu jọ o te via evaọ okenọ ọ te họ Jesu ame?

Whaọ, Jọn ọ ta uwhremu na nọ: “Ọnọ o vi omẹ inọ mẹ rọ ame họ ahwo ame ọ ta kẹ omẹ nọ: ‘Ohwo kpobi nọ whọ ruẹ nọ ẹzi na o bi no ehru bru ze ọ jẹ daji ei, ọye họ ọnọ ọ te rọ ẹzi ọfuafo họ ahwo ame na.’” (Jọn 1:33) Fikiere Jọn o je rẹro nọ ẹzi Ọghẹnẹ ọ te ro ohwo jọ oma evaọ okenọ ọ te rọ họe ame. Nọ Jesu ọ nwane va no ame ze, ẹsejọhọ u gbe Jọn unu hu nọ ọ ruẹ “ẹzi Ọghẹnẹ nọ o bi bru [Jesu] ze wọhọ erueruẹ.”—Matiu 3:16.

Rekọ oware nọ o via oye ọvo ho evaọ oke ame-ọhọ Jesu. ‘Odhiwu o rovie’ kẹ Jesu. Kọ eme oyena u dhesẹ? U muẹro nọ oke nọ Jesu ọ rọ họ-ame na, ọ kareghẹhọ uzuazọ nọ o yeri no  vẹre evaọ obọ odhiwu. Jesu ọ kareghẹhọ epanọ ọ rọ jọ omama ẹzi evaọ obọ odhiwu, gbe eware nọ Ọghẹnẹ o wuhrẹ i rie taure ọ tẹ te ziọ otọakpọ.

U te no ere no, evaọ oke ame-ọhọ Jesu, urru jọ o ta ẹme no obọ odhiwu ze, inọ: “Ọnana họ Ọmọ mẹ, oyoyou mẹ na, ọnọ mẹ jẹrehọ.” (Matiu 3:17) Ono ọ ta ẹme na? O sae jọ Jesu hu keme ọ rrọ etẹe kugbe Jọn. Ọghẹnẹ họ ọnọ ọ ta ẹme na. O rrọ vevẹ inọ Jesu yọ Ọmọ Ọghẹnẹ, orọnikọ Ọghẹnẹ hẹ.

Jesu yọ ọmọ Ọghẹnẹ evaọ otọakpọ, wọhọ epanọ Adamu ọ jọ na. Nọ Luk olele na o kere kpahe ame-ọhọ Jesu no, o kere nọ: “Okenọ Jesu omariẹ o mu iruo riẹ họ, ọ jọ oware wọhọ ikpe ọgba, nọ ọ jọ ọmọ Josẹf, ọmọ Hilai, . . . ọmọ Devidi, . . . ọmọ Abraham, . . . ọmọ Noa, . . . ọmọ Adam, ọmọ Ọghẹnẹ.”—Luk 3:23-38.

Wọhọ epanọ Adamu ọ jọ “ọmọ Ọghẹnẹ” evaọ otọakpọ na, ere Jesu ọ jọ re. Nọ Jesu ọ họ-ame no, o te wo obọdẹ usu ọfa kugbe Ọghẹnẹ, ọ roma mudhe kẹ oreva Ọghẹnẹ uruo. Fikiere Jesu o te ohwo nọ o re wuhrẹ amọfa kpahe Ọghẹnẹ je dhesẹ oghẹrẹ nọ a sai ro wo uzuazọ kẹ ae. Uzuazọ nọ Jesu ọ salọ no umuo oke yena vrẹ u ti ru nọ a ti ro kpei, nọ ọ te rọ rehọ uzuazọ riẹ dhe idhe kẹ ahwo-akpọ nọ a rrọ erahaizi.