Taure Jesu o te ti kpobọ Galili nọ edẹ 40 nọ ọ rọ jọ udhude na e ruemu no, o te zihe bru Jọn nọ ọ họ riẹ ame na. Nọ ọ be nya kẹle na, Jọn ọ tẹ riobọhọ iẹe je bo kẹ ahwo nọ a jọ etẹe nọ: “Rri Omogodẹ Ọghẹnẹ ọnọ ọ be wha izieraha akpọ na vrẹ! Ọnana mẹ ta kpahe na inọ: Ọzae jọ ọ rrọ emu mẹ nyaze ọnọ o kparo vi omẹ no, keme ọ kake rọ omẹ ziọ uzuazọ.” (Jọn 1:29, 30) Dede nọ Jọn ọ rọ emerae jọ vi Jesu, ọ riẹ nọ Jesu ọ rrọ no taure a te ti yẹi, okenọ ọ jọ ẹnjẹle evaọ obọ odhiwu.

Eka jọ kakao nọ i kpemu, nọ Jesu ọ nyaze te họ-ame, o wọhọ nọ o nwani mu Jọn ẹro ho sọ Jesu họ ọnọ ọ te jọ Mesaya na. Jọn ọ tubẹ ta nọ: “Makọ omẹ, mẹ riẹ riẹ hẹ, rekọ ẹjiroro nọ mẹ rọ nyaze be rọ ame họ ahwo ame họ re ọ ruẹsi dhesẹ oma via kẹ Izrẹl.”—Jọn 1:31.

Kẹsena Jọn ọ tẹ ta kẹ ahwo nọ a be gaviezọ kẹe oware nọ o via okenọ ọ họ Jesu ame, inọ: “Mẹ ruẹ ẹzi na nọ o bi no obọ odhiwu ze wọhọ erueruẹ, o te kiemu uzou riẹ. Makọ omẹ, mẹ riẹ riẹ hẹ, rekọ Ọnọ o vi omẹ inọ mẹ rọ ame họ ahwo ame ọ ta kẹ omẹ nọ: ‘Ohwo kpobi nọ whọ ruẹ nọ ẹzi na o bi no ehru bru ze ọ jẹ daji ei, ọye họ ọnọ ọ te rọ ẹzi ọfuafo họ ahwo ame na.’ Mẹ ruẹ onana no, yọ me se isẹri no inọ ọnana họ Ọmọ Ọghẹnẹ.”—Jọn 1:32-34.

Okiokiọ riẹ, Jọn Ọhọahwo-Ame na ọ jọ kugbe ilele ivẹ ọyomariẹ jọ, kẹsena ọ tẹ kparo ruẹ Jesu nọ ọ be nya bru ae ze. Jọn ọ tẹ ta nọ: “Rri Omogodẹ Ọghẹnẹ!” (Jọn 1:36) Nọ ọ ta ere no, ilele ivẹ Jọn Ọhọahwo-Ame na i te lele Jesu. Odẹ ọjọ họ Andru, yọ ẹsejọhọ ọkpọ Jọn Ọhọahwo-Ame na họ olele avivẹ na, koyehọ Jọn nọ o kere iku nana fihotọ na. O wọhọ nọ Jọn nana avọ Jesu emọ-inievo, keme Jọn yọ ọmọ Salomi. Yọ ẹsejọhọ Salomi avọ Meri inievo, yọ odẹ ọzae Salomi Zẹbẹdi.

Nọ Jesu o kuomarẹriẹ ruẹ Andru gbe Jọn nọ a bi lele iei, ọ tẹ nọ ae inọ: “Eme wha be gwọlọ?”

A tẹ nọe zihe nọ: “Rabae, diẹse whọ be rria?”

Jesu ọ tẹ kẹ ae uyo nọ: “Wha nyaze, wha te ruẹ.”—Jọn 1:37-39.

Oke u te oware wọhọ ighọjọ ene no evaọ owọwọ, yọ Andru avọ Jọn a jọ kugbe Jesu evaọ ẹdẹ yena soso. Eva e were Andru gaga nọ ọ ruẹ Saemọn oniọvo riẹ, ọnọ a re je se Pita. Ọ tẹ ta kẹe nọ: “Ma ruẹ Mesaya na no.” (Jọn 1:41) Andru ọ tẹ rehọ Pita bru Jesu. Eware nọ e via uwhremu na i dhesẹ nọ ẹsejọhọ okenọ Jọn ọ ruẹ oniọvo riẹ nọ a re se Jemis, ọ tẹ rehọ iẹe bru Jesu; rekọ Jọn o fi onana ba eware nọ o kere fihotọ kpahe uzuazọ Jesu hu.

Okiokiọ riẹ, Jesu ọ tẹ ruẹ Filip, ọnọ o no Bẹtsaida ze, okpẹwho nọ Andru avọ Pita a no ze re, onọ o rrọ ẹkpẹlobọ ovatha-ọre Abade Galili. Jesu o te zizie Filip nọ: “Jọ olele mẹ.”—Jọn 1:43.

 Filip ọ tẹ ruẹ Nataniẹl, ọnọ a re je se Batolomio, ọ tẹ ta kẹe nọ: “Ma ruẹ ọnọ Mosis o kere kpahe evaọ Uzi na gbe ọnọ Eruẹaro na a kere kpahe na no: Jesu, ọmọ Josẹf, ohwo Nazarẹt.” Rekọ avro ọ dina jọ Nataniẹl udu, ọ tẹ nọ Filip nọ: “Kọ oware uwoma jọ o sai no Nazarẹt ze?”

Filip ọ tẹ ta kẹ Nataniẹl nọ: “Nyaze re whọ ruẹ.” Nọ Jesu ọ ruẹ Nataniẹl nọ ọ be nyaze, ọ tẹ ta nọ: “Rri, ohwo Izrẹl dẹẹ ọnọ eviẹhọ e rrọ oma ha.”

Nataniẹl ọ tẹ nọe nọ: “Ẹvẹ whọ rọ riẹ omẹ?”

Jesu ọ tẹ kpahe kẹe nọ: “Taure Filip o te ti se owhẹ, nọ whọ jọ otọ ure ifigi na, mẹ ruẹ owhẹ.”

Akpọ o gbe Nataniẹl unu, kẹsena ọ tẹ kpahe kẹ Jesu nọ: “Owuhrẹ, whẹ họ Ọmọ Ọghẹnẹ, whẹ họ Ovie Izrẹl.”

Jesu ọ tẹ wariẹ nọe nọ: “Fikinọ mẹ ta kẹ owhẹ nọ mẹ ruẹ owhẹ evaọ otọ ure ifigi na whọ rọ rọwo? Whọ te ruẹ eware nọ e rro vi enana.” Kẹsena Jesu ọ tẹ ta nọ: “Uzẹme mẹ be ta kẹ owhai, wha te ruẹ odhiwu nọ o rovie gbe ikọ-odhiwu Ọghẹnẹ nọ i bi bru Ọmọ ohwo ze je zihe.”—Jọn 1:45-51.

Nọ onana o nwane vrẹ no, Jesu avọ ilele ekpokpọ riẹ nana a te no ukiekpotọ Jọdan kpobọ Galili.