Ẹlizabẹt o te eyẹ no. Anwọ emerae esa ena nọ Meri ọ rọ rrọ kugbei. Rekọ oke u te no nọ Meri ọ te rọ nya siọ Ẹlizabẹt ba, ọ vẹ nya ugbothabọ na zihe kpobọ uwou riẹ evaọ obọ Nazarẹt. Oware wọhọ emerae ezeza nọ e be tha, ọyomariẹ o ti yẹ ọmọ riẹ re.

Nọ Meri o zihe kpo no, u kri hi Ẹlizabẹt o te yẹ. A rẹ ruẹ unu gbiku eva nọ e were rai hi inọ Ẹlizabẹt o yẹ gbẹsinẹdẹ, yọ avọ ọmọ na a rrọ sasasa. Okenọ Ẹlizabẹt o dhesẹ ọmọ riẹ na kẹ erivẹ gbe imoni riẹ, aikpobi a te je lele iei ghọghọ.

Uzi nọ Ọghẹnẹ o jie kẹ emọ Izrẹl o ta nọ a rẹ yawo ọmọzae kpobi nọ a yẹ nọ edẹ eree e tẹ gba no, yọ ẹdẹ yena a re mu odẹ kẹe. (Iruo-Izerẹ 12:2, 3) Ahwo jọ a jẹ ta nọ odẹ ọsẹ ọmọ na, Zekaraya a re mu kẹ ọmọ na. Rekọ Ẹlizabẹt ọ tẹ ta nọ: “Ijo, Jọn họ odẹ nọ a re sei.” (Luk 1:60) Kareghẹhọ nọ Gebriẹl ukọ-odhiwu na ọ ta nọ Jọn a re se ọmọ na.

Rekọ ahwo nọ a gbẹ rrọ oria gbe imoni rai kpobi a tẹ se, inọ: “Ohwo ọvo evaọ udevie imoni ra o wo odẹ nana ha.” (Luk 1:61) A tẹ rọ abọ t’ẹme rọ nọ Zekaraya odẹ nọ ọ gwọlọ se ọmọzae riẹ. Zekaraya ọ tẹ rọ obọ ta nọ a kẹe ẹwẹ-akpala, o te kere fihọ iẹe nọ: “Jọn họ odẹ riẹ.”—Luk 1:63.

Nọ Zekaraya ọ nwani kere odẹ na no, o te mu ẹme họ ẹta. Kareghẹhọ nọ o dienu okenọ ọ vro ẹme nọ ukọ-odhiwu na ọ ta kẹe inọ Ẹlizabẹt o ti yẹ ọmọ. Fikiere nọ Zekaraya o mu ẹme họ ẹta, akpọ o gbe ahwo na kpobi unu a tẹ jẹ nọ ohwohwo nọ: “Oghẹrẹ ohwo vẹ ọmọ nana ọ be te jọ?” (Luk 1:66) Ahwo na a vuhumu nọ Ọghẹnẹ o wobọ evaọ odẹ nọ a mu kẹ ọmọ na.

Ẹzi ọfuafo ọ tẹ ruọ Zekaraya oma, ọ tẹ ta nọ:  “Ujiro u te Jihova, Ọghẹnẹ Izrẹl, keme o dhesẹ ohrọ-oriọ kẹ ahwo riẹ no jẹ kẹ ae esiwo no. Yọ ọ kẹ omai uzei esiwo no evaọ uwou Devidi odibo riẹ.” (Luk 1:68, 69) “Uzei esiwo” nọ ọ fodẹ na họ Jesu Olori na, ọnọ a ri yẹ hẹ na. Zekaraya ọ ta nọ ẹkwoma Jesu, Ọghẹnẹ o ti ro “siwi omai no obọ ewegrẹ no, ọ vẹ kẹ omai ọghọ ologbo nọ ma rẹ rọ gọe ababọ ozodhẹ avọ uyoyou nọ o rẹ hiẹ hẹ gbe ẹrẹreokie evaọ edẹ uzuazọ mai kpobi.”—Luk 1:74, 75.

Zekaraya ọ ruẹaro kpahe ọmọ riẹ na inọ: “Whẹ, ọmọ mẹ, a re ti se owhẹ ọruẹaro Ọnọ Ọ Mai Kpehru na, keme Jihova o ti vi owhẹ karo re whọ ruẹrẹ idhere riẹ họ, re who whowho ovuẹ esiwo kẹ ahwo riẹ, onọ a re wo ẹkwoma erọvrẹ izieraha rai, fiki ohrọ-oriọ Ọghẹnẹ mai. Fiki ohrọ-oriọ nana, elo o ti lo mu omai no obọ ehru ze, re ọ kẹ enọ e rrọ ebi gbe oria ebi imuozọ elo jẹ kpọ awọ mai evaọ edhere udhedhẹ.” (Luk 1:76-79) Eruẹaruẹ nana e kẹ omosasọ kẹhẹ.

Evaọ oke nana, Meri nọ o ri wo ọzae he na o te uwou no evaọ Nazarẹt. Kọ ẹvẹ o te jọ kẹe nọ ahwo a tẹ riẹ nọ o dihọ?