Ezae jọ i no obọ Ovatha-Ọre ze. Ezae nana ebuẹva-isi, ebuẹva-isi yọ ahwo nọ a ta nọ a rẹ sai rri isi obehru na a vẹ rehọ ae vuẹ ohwo oghẹrẹ nọ uzuazọ riẹ o te jọ. (Aizaya 47:13) A ruẹ “esi” jọ evaọ obonọ a be rria evaọ obọ Ovatha-Ọre, a te lele esi nana emaele buobu kpobọ Jerusalẹm, orọnikọ obọ Bẹtlẹhẹm ho.

Nọ ezae nana a te Jerusalẹm, a tẹ nọ inọ: “Diẹse ovie ahwo Ju nọ a yẹ na ọ rrọ? Keme ma ruẹ esi riẹ evaọ obọ Ovatha-Ọre, yọ ma nyaze re ma rọ uzou kpotọ kẹe.”—Matiu 2:1, 2.

Nọ Herọd ovie na o yo onana, eva e dha riẹ gaga. O te se ilori izerẹ gbe ilori egagọ ahwo Ju efa koko, ọ tẹ nọ ae oria nọ a te jọ yẹ Kristi na. A tẹ ta kẹe wọhọ epanọ ikere na e ta inọ: “Evaọ Bẹtlẹhẹm.” (Matiu 2:5; Maeka 5:2) Herọd ọ tẹ lẹlẹ se ebuẹva-isi na, ọ tẹ ta kẹ ae nọ: “Wha nya re wha romatotọ gwọlọ ọmọ na, nọ wha tẹ ruẹ e riẹ no, wha zihe ze te vuẹ omẹ re mẹ nyae rọ uzou kpotọ kẹe re.” (Matiu 2:8) Rekọ, ọ gwọlọ riẹ oria nọ ọmọ na ọ rrọ re o kpei no.

Nọ ebuẹva-isi na a nyavrẹ no, oware igbunu jọ o tẹ via. “Esi” ọvona nọ a ruẹ evaọ obọ Ovatha-Ọre na ọ tẹ wariẹ mu ai họ esuo. O rrọ vevẹ nọ esi nana ọrọ igheghe he, ohwo jọ ọ be rọ esi na su ai na. Ebuẹva-isi na a lele esi nana bẹsenọ ọ rọ daji ehru uwou nọ Josẹf avọ Meri gbe ọmọ rai a be rria.

Nọ ebuẹva-isi na a rueva uwou na, a tẹ ruẹ Meri avọ ọmọ riẹ Jesu. Ebuẹva-isi na a te guzou kpotọ kẹ Jesu. A tẹ kẹe ekẹ, a kẹ riẹ igoru gbe frankinsẹs, gbe mọr. Nọ a jẹ gwọlọ zihe bru Herọd, Ọghẹnẹ ọ tẹ jọ ewezẹ vẹvẹ ae unu nọ a zihe bru rie vievie he. Fikiere, a tẹ nya edhere ọfa kpohọ obonọ a no ze.

Ono who roro nọ ọ jẹ rọ “esi” na su ebuẹva-isi na? Kareghẹhọ nọ esi na o su rai bru Jesu evaọ obọ Bẹtlẹhẹm ovavo ho. Obọ Jerusalẹm esi na ọ kaki su ai kpohọ, obonọ Herọd ovie nọ ọ gwọlọ kpe Jesu na ọ be rria. Yọ ọ hai ti gine kpe Jesu, Ọghẹnẹ ọ gbẹ vẹvẹ ebuẹva-isi na unu nọ a nya bru Herọd vievie he. O rrọ vevẹ nọ Setan ọwegrẹ Ọghẹnẹ nọ ọ gwọlọ Jesu kpe na, ọye ọ be gwọlọ rọ edhere nana ru ẹjiroro riẹ gba na.