O jọ amara Asa hayo Ane. Oke u te no nọ Josẹf avọ uviuwou riẹ, gbe imoni avọ egbẹnyusu rai a re ro kpohọ erẹ nọ a rẹ nya kukpe kukpe evaọ obọ Jerusalẹm. A re kpohọ obei nyai ru ehaa Ọnyavrẹ na wọhọ epanọ Uzi na o ta. (Iziewariẹ 16:16) No Nazarẹt te Jerusalẹm o thabọ te emaele 75. O jọ oke evawere kẹ ohwo kpobi gbe oke nọ a rẹ rọ ruẹrẹ eware buobu họ kẹ ehaa na. Jesu nọ ọ kpako te ikpe 12 no, ọ be rọ ọwhọ rẹro ehaa nana gbe evawere nọ o ti wo evaọ obọ etẹmpol na wọhọ epanọ o be hae jọ anwẹdẹ.

Rọkẹ Jesu avọ uviuwou riẹ, orọnikọ ehaa Ọnyavrẹ na ọvo a bi rẹro riẹ hẹ. Nọ a te ru ehaa Ọnyavrẹ na no, ẹdẹ nọ o lele i rie nọ o rrọ “ẹdẹ ọsosuọ ọrọ ehaa Ebrẹdi nọ Ọ Kare Ẹvi na,” a ve mu ehaa Ebrẹdi nọ Ọ Kare Ẹvi na họ, onọ o rẹ rehọ edẹ ihrẹ. (Mak 14:12) A rehọ onana fihọ abọjọ ehaa Ọnyavrẹ na. Oke nọ o rẹ rẹhọ uviuwou na re a no Nazarẹt te Jerusalẹm, ru ehaa na, je zihe kpobọ uwou rai u re te enwenọ eka ivẹ. Rekọ evaọ onana nọ a nya na o rehọ e rai vrẹ eka ivẹ fiki oware jọ nọ o via kẹ Jesu. A muẹrohọ ẹbẹbẹ jọ nọ a je no Jerusalẹm kpo.

Nọ a bi kpo na, Josẹf avọ Meri a je roro nọ Jesu ọ rrọ kugbe imoni gbe egbẹnyusu rai nọ a gbẹ rrọ usu bi zurie kpo na. Rekọ nọ a wohọ oria nọ a te wezẹ asohẹrioke, a tẹ ruẹ nọ Jesu ọ riẹ hẹ. A te mu ei họ ẹgwọlọ evaọ udevie ahwo nọ a gbẹ rrọ erẹ na, rekọ a ruẹ e riẹ hẹ. A gwọlọ oria na kpobi, a ruẹ e riẹ ghele he. Josẹf avọ Meri a te mu ei họ ẹgwọlọ zihe kpobọ Jerusalẹm.

A gwọlọ e riẹ okpẹdoke soso, a ruẹ e riẹ hẹ. A gwọlọ e riẹ ẹdẹ avọ ivẹ okikpo, a ruẹ e riẹ hẹ. Kẹsena evaọ ẹdẹ avọ esa, a tẹ ruẹ Jesu evaọ ọgwa jọ evaọ etẹmpol na. Ọ keria udevie iwuhrẹ ahwo Ju jọ. Ọ be gaviezọ kẹ ae, be nọ ae enọ, yọ akpọ o bi gbe iwuhrẹ na unu fiki oghẹrẹ nọ o wo otoriẹ eware na te.

Meri ọ tẹ nọe nọ: “Ọmọ, fikieme who je ru omai enẹ? Mẹ avọ ọsẹ ra ma rrọ awawa anwọ ẹsiẹe be gwọlọ owhẹ.”—Luk 2:48.

U te gbe Jesu unu inọ a riẹ oria nọ ọ rrọ họ. Ọ tẹ nọ ae nọ: “Fikieme wha jẹ rọ gwọlọ omẹ? Kọ wha gbẹ riẹ nọ mẹ rẹ jọ uwou Ọsẹ mẹ?”—Luk 2:49.

Nọ a ruẹ e riẹ no, Jesu o te lele Josẹf avọ Meri zihe kpobọ Nazarẹt yọ o je yoẹme kẹ ae wọhọ epanọ o bi ru anwẹdẹ. Nọ Jesu ọ be rro na yọ areghẹ riẹ o bi vihọ. Dede nọ ọ gbẹ maha, o wo ọjẹrehọ Ọghẹnẹ gbe ahwo. Ẹhẹ, no emaha riẹ ze, Jesu o fi emamọ oriruo h’otọ kẹ omai kpahe epanọ u wuzou te re ma rọ egagọ Ọghẹnẹ karo jẹ rọ adhẹẹ kẹ esẹgbini mai.