Evaọ etoke odibọgba Jesu, ọ ta unuẹse buobu kpahe epanọ omaurokpotọ u wuzou te. (Luk 14:8-11) O jariẹ oja re ọ gwọlọ ezae gbe eyae nọ e ginẹ gwọlọ gọ Ọghẹnẹ avọ omaurokpotọ. Ejọ evaọ usu rai a jọ ahwo nọ a riẹ ziezi wọhọ ikpehre ahwo.

Otu Farisi avọ ikere-obe na a muẹrohọ nọ ahwo otiọye na nọ a rri nọ a fioka ha na a be hae jọ kugbe Jesu jẹ be gaviezọ kẹ ovuẹ riẹ. A tẹ be go nọ: “Ọzae nana o re dede erahaizi rehọ je lele ae re emu.” (Luk 15:2) Otu Farisi gbe ikere-obe na a re rri omarai nọ a kpehru vi ahwo gheghe na, tube rri rai wọhọ uluhu nọ o rrọ evawọ rai. Yọ fiki oghẹrẹ nọ a rri ahwo na tọtọ te, a jẹ hae rọ ẹme Hibru na ‛am ha·’aʹrets ro se ai, onọ otofa riẹ o rrọ “ahwo otọ [hayo otọakpọ] na.”

Rekọ Jesu ọ jọ ere he, ọ jọ wowou, jẹ kẹ ahwo adhẹẹ, yọ o je dhesẹ ọdawẹ kẹ ahwo re. Fikiere, iruori gbe ahwo jọ nọ a riẹ wọhọ erahaizi, a jẹ daoma rai kpobi re a gaviezọ kẹ Jesu. Kọ eme Jesu o ru kpahe unu nọ ahwo na a be rọ raha iẹe fikinọ o bi fiobọhọ kẹ iruori na?

Ma rẹ ruẹ uyo onọ nana vevẹ evaọ ọtadhesẹ jọ nọ Jesu ọ rọ ta ẹme, onọ o wọhọ ọtadhesẹ jọ nọ ọ ta kpahe no vẹre evaọ obọ Kapaniọm. (Matiu 18:12-14) Jesu ọ jọ ọtadhesẹ na ta kpahe otu Farisi na wọhọ ahwo nọ a kiẹrẹe, nọ a wo ọjẹrehọ Ọghẹnẹ. Evaọ abọdekọ riẹ, ọ tẹ jẹ ta kpahe iruori nọ a bi se ‛am ha·’aʹrets na wọhọ enọ i ghoro no edhere Ọghẹnẹ. Jesu ọ ta nọ:

“Ọzae vẹ evaọ usu rai o re wo igodẹ udhusoi, nọ ọvo jọ o te vru, ọ gbẹ nyasiọ udhone gbe ikpegbizii na ba udhude he re ọ nyae gwọlọ ọvo nọ o vru na bẹsenọ ọ rẹ ruẹ e riẹ? Nọ ọ tẹ ruẹ e riẹ no ọ vẹ wọe fihọ ikoko riẹ be ghọghọ. Nọ o te te uwou, o ve se egbẹnyusu riẹ gbe ahwo nọ a gbẹ rrọ okegbe koko, be ta kẹ ae nọ: ‘Wha lele omẹ ghọghọ, keme mẹ ruẹ ogodẹ mẹ nọ o vru no.’”—Luk 15:4-6.

Ẹvẹ Jesu o ro ru ọtadhesẹ riẹ na vẹ? Ọ ta nọ: “Mẹ be ta kẹ owhai nọ, ere ọvona, a rẹ jọ obọ odhiwu ghọghọ fiki ọrahauzi ọvo nọ o kurẹriẹ viọ fiki ahwo ikiẹrẹe udhone gbe ikpegbizii nọ i du gwọlọ ekurẹriẹ hẹ.”—Luk 15:7.

Ẹme ekurẹriẹ nọ Jesu ọ ta na o gbe otu Farisi na unu gaga. A rri omarai nọ a kiẹrẹe gbe nọ a du gwọlọ ekurẹriẹ hẹ. Okenọ ejọ rai e jẹ fo Jesu evaọ imikpe jọ nọ e vrẹ fikinọ o je lele imiazọhọ gbe erahaizi re emu, Jesu ọ ta nọ: “Erahaizi mẹ nyaze ti se, orọnikọ ahwo ikiẹrẹe he.” (Mak 2:15-17) Otu Farisi nọ i rri omarai kiẹrẹe na, a roro nọ a gwọlọ ekurẹriẹ hẹ. Fikiere, a rẹ sai ru  ohwo ọvo oghọghọ evaọ obọ odhiwu hu. Rekọ, ọrahauzi o te kurẹriẹ no eva ze, oghọghọ o rẹ jọ obọ odhiwu.

Re Jesu o gbe fiẹgba họ ẹme na inọ ekurẹriẹ ọrahauzi o rẹ wha oghọghọ ulogbo ze evaọ obọ odhiwu, ọ tẹ rọ ọtadhesẹ ọfa ta ẹme, orọ oware nọ o rẹ sae via evaọ uviuwou, inọ: “Aye vẹ o re wo ibiugho edrakma ikpe, nọ ọvo jọ o te vru, ọ gbẹ rehọ ukpẹ tu je hwere uwou riẹ hẹ, ọ vẹ romatotọ gwọlọ iẹe bẹsenọ ọ rẹ ruẹ e riẹ? Nọ ọ tẹ ruẹ e riẹ no, o re se egbẹnyusu riẹ gbe enọ a gbẹ rrọ okegbe koko, inọ: ‘Wha lele omẹ ghọghọ, keme mẹ ruẹ ubiugho edrakma mẹ nọ u vru no.’”—Luk 15:8, 9.

Oware nọ Jesu ọ rehọ ọtadhesẹ ogodẹ nọ o vru na wuhrẹ na, oye ovona ọ rehọ ọtadhesẹ nana wuhrẹ re. Ọ ta nọ: “Mẹ be ta kẹ owhai nọ, ere ọvona re, ikọ-odhiwu Ọghẹnẹ a rẹ ghọghọ fiki ọrahauzi ọvo nọ o kurẹriẹ.”—Luk 15:10.

Dai roro ei, eva e rẹ were ikọ-odhiwu gaga nọ ọrahauzi ọvo o te kurẹriẹ. Onana u gbunu kẹhẹ, keme otẹrọnọ ọrahauzi yena nọ o kurẹriẹ na ọ rrọ omọvo enọ Ọghẹnẹ ọ salọ re a su evaọ obọ odhiwu, o ti kpehru vi ikọ-odhiwu na. (1 Ahwo Kọrint 6:2, 3) Ghele na, ikọ-odhiwu a be re ihri hi. Kọ ẹvẹ u fo nọ o rẹ jọ omai oma nọ iruori hayo erahaizi a te kurẹriẹ no eva ze bru Ọghẹnẹ?