Nọ Jesu avọ ilele riẹ a no Galili, a tẹ fa kpohọ abọdekọ Ethẹ Jọdan, kẹsena a tẹ rọ ovao rri obọze ovatha-ọre bi kpobọ Pẹria. Nọ Jesu o kpobọ Pẹria whremu, ọ vuẹ otu Farisi na oghẹrẹ nọ Ọghẹnẹ o rri orọo-ofa. (Luk 16:18) Obọnana a tẹ wariẹ rọ ẹme ọvona ze re a rọ ere dawo Jesu.

Mosis o kere nọ ọzae ọ sae siọ aye riẹ otẹrọnọ ọ ruẹ “egbegbe” eva obọ riẹ. (Iziewariẹ 24:1) Ahwo a wo eriwo sa-sa kpahe oware nọ a jọ etenẹ se egbegbe nọ a sae rọ fiki riẹ fa orọo na. Ahwo jọ a roro nọ onana u kugbe eware nọ i tulo ho. Fikiere otu Farisi na a tẹ nọ Jesu nọ: “Kọ u fo re ọzae ọ siọ aye riẹ fiki oghẹrẹ oware kpobi?”—Matiu 19:3.

Ukpenọ Jesu ọ ta eriwo ohwo-akpọ, ọ rọ onaa ta kpahe oghẹrẹ nọ Ọghẹnẹ ọ rọ tuọ orọo họ, inọ: “Kọ wha ri se inọ ọnọ ọ ma rai no emuhọ ze ọ ma rai ọzae avọ aye jẹ ta nọ: ‘Fiki onana ọzae ọ rẹ nyasiọ ọsẹ gbe oni riẹ ba ọ vẹ talamu aye riẹ, aimava na a vẹ jọ uwo ovo’? A gbẹ rrọ uwo ivẹ hẹ rekọ uwo ovo. Fikiere, onọ Ọghẹnẹ o kugbe no, ajọ ohwo ọvo ọ hẹriẹ iẹe he.” (Matiu 19:4-6) Okenọ Ọghẹnẹ ọ tuọ orọo Adamu avọ Ivi họ, o ru ọruẹrẹfihotọ orọo-ofa ha.

Otu Farisi na a te bi lele Jesu vro avro, inọ: “O tẹ rrọ ere, kọ fikieme Mosis ọ rọ ta nọ a sae kẹ aye obe-udu orọo-ofa a vẹ se iẹe?” (Matiu 19:7) Jesu ọ tẹ ta kẹ ae nọ: “Fiki udu-ogaga rai Mosis ọ rọ kẹ owhai uvẹ nọ wha sae siọ eyae rai, orọnikọ ere o rrọ no emuhọ ze he.” (Matiu 19:8) “Emuhọ” nọ Jesu ọ fodẹ na orọnikọ edẹ Mosis hi, rekọ okenọ Ọghẹnẹ ọ tuọ orọo họ evaọ ọgbọ Idẹn.

Kẹsena Jesu ọ tẹ ta obọdẹ ẹme jọ, inọ: “Mẹ be ta kẹ owhai nọ ohwo kpobi nọ ọ siọ aye riẹ o gbẹ rrọ fiki ọfariẹ-ogbe he [evaọ Griki, por·neiʹa], ọ jẹ rehọ ọfa o bruẹnwae.” (Matiu 19:9) Fikiere, ọfariẹ-ogbe ọvo họ oware nọ Ọghẹnẹ ọ kuvẹ riẹ nọ a sae rọ fa orọo.

Onana u gbe ilele na unu, a tẹ ta nọ: “Otẹrọnọ ere orọo o rrọ, kiyọ u fo ho re ohwo ọ rọo.” (Matiu 19:10) Nọ o rrọ ere na, ohwo nọ ọ be jiroro orọo ọ rẹ riẹ nọ orọo yọ oware nọ o rẹ jọ bẹdẹ bẹdẹ.

Jesu ọ ta kpahe seba-ẹrọo inọ a yẹ ezae jọ ewharọ, enọ e rẹ sae rọo ho keme a sai lele aye wezẹ hẹ. Amọfa a rrọ ewharọ fikinọ ahwo-akpọ a whare rai. Yọ efa e rehọ obọ nyẹ isiuru orọo onọ a rẹ jọ reawere owezẹ. A ru onana re a tẹrovi iruẹru Uvie na ziezi. Jesu ọ ta kẹ ahwo nọ a be gaviezọ kẹe nọ: “Jọ ọnọ ọ rẹ sai ru ere [seba ẹrọo] o ru ere.”—Matiu 19:12.

Ahwo a tẹ be rọ emọ eboba rai bru Jesu ze. Rekọ ilele riẹ a tẹ be whọku ahwo na, ẹsejọhọ fikinọ a gwọlọ nọ a rọ emọ na kpokpo Jesu hu. Nọ Jesu ọ ruẹ onana eva e tẹ dhae, ọ tẹ ta kẹ ae nọ: “Wha vu emaha na wa re a nya bru omẹ ze; wha whaha ae he, keme Uvie Ọghẹnẹ o rrọ kẹ itieye na. Uzẹme mẹ be ta kẹ owhai, ohwo kpobi nọ ọ jẹ Uvie Ọghẹnẹ rehọ wọhọ epaọ ọmaha ha, ọ sae ruọ Uvie na vievie he.”—Mak 10:14, 15; Luk 18:15.

Obọdẹ oware Jesu o wuhrẹ na. Re ma sae ruọ Uvie Ọghẹnẹ, ma rẹ jọ wọhọ emọ eboba nọ i wo omaurokpotọ, nọ a rẹ sai wuhrẹ lọlọhọ. Jesu o te dhesẹ nọ o you emọ eboba nọ ọ wọ ae jẹ be lẹ ẹro kẹ ae. Yọ ere o you ahwo kpobi nọ a “jẹ Uvie Ọghẹnẹ rehọ wọhọ epaọ ọmaha.”—Luk 18:17.