Jesu ọ rọ ọtadhesẹ jọ ro wuhrẹ ilele riẹ no vẹre kpahe epanọ u wuzou te re a ruabọhọ olẹ. (Luk 11:5-13) Obọnana ọ rrọ Sameria hayo Galili, yọ ọ jọ oria na wariẹ wuhrẹ epanọ u wuzou te re a hae lẹ ẹsikpobi. Ọ rọ ọtadhesẹ ọfa ru onana vẹ, inọ:

“Evaọ okpẹwho jọ, obruoziẹ jọ ọ jariẹ nọ ọ rẹ dhozọ Ọghẹnẹ hẹ, yọ ọ rẹ daezọ ohwo ọvo ho. Aye-uku jọ ọ jọ okpẹwho yena re nọ ọ jẹ hae nya bru rie kẹse kẹse, be ta nọ, ‘Ruẹ nọ who bru uvioziẹ kẹ omẹ evaọ ẹdhọ nọ me wo kugbe ohwo ọdekọ na.’ Evaọ omoke jọ, ọ jẹ daezọ họ, rekọ uwhremu na ọ tẹ ta kẹ omariẹ nọ, ‘Dede nọ mẹ be dhozọ Ọghẹnẹ hẹ jẹ daezọ ohwo ọvo ho, fikinọ aye-uku nana o bi kpokpo omẹ kẹse kẹse, mẹ te ruẹ nọ me bru uvioziẹ kẹe re o gbe dhe ẹnyẹnyaze te lẹ omẹ dọ no ho.’”—Luk 18:2-5.

Jesu ọ f’otọ ọtadhesẹ na nọ: “Wha yo ẹme nọ obruoziẹ na ọ ta dede nọ o kiẹrẹe he! Evaọ uzẹme, kọ Ọghẹnẹ o gbe ti bruoziẹ kẹ ahwo riẹ nọ ọ salọ, enọ i bi bo sei taso tuvo, yọ o bi wo odiri kẹ ae na?” (Luk 18:6, 7) Kọ eme Jesu ọ be ta kpahe Ọsẹ riẹ na?

Orọnikọ Jesu ọ be ta ha inọ Jihova Ọghẹnẹ ọ wọhọ obruoziẹ yena nọ o kiẹrẹe he na. O bi dhesẹ ohẹriẹ nọ o rrọ Jihova avọ obruoziẹ yena, inọ otẹrọnọ obruoziẹ nọ o kiẹrẹe he ọ rẹ gaviezọ kẹ ohwo nọ ọ ruabọhọ ayare, koyehọ u re mu omai ẹro nọ Ọghẹnẹ o re ru epọvo na re. Ọghẹnẹ o kiẹrẹe ọ tẹ jẹ rrọ wowou, fikiere o re yo olẹ idibo riẹ nọ e ruabọhọ ayare rai. Ma rẹ sae ruẹ onana vevẹ evaọ ẹme nọ Jesu ọ wariẹ ta, inọ: “Mẹ be ta kẹ owhai nọ, [Ọghẹnẹ] o ti bruoziẹ kẹ ae vẹrẹ vẹrẹ.”—Luk 18:8.

Ẹsibuobu ahwo a re kienyẹ iruori gbe iyogbere na, rekọ ikpahwo akpọ na họ enọ a re bruoziẹ kẹ. Ọghẹnẹ ọ rrọ ere he. Nọ oke nọ o fihọ u te te, ọ te raha irumuomu ọ vẹ kẹ idibo riẹ uzuazọ ebẹdẹ bẹdẹ.

Ono o wo ẹrọwọ wọhọ aye-uku yena? Bro ahwo a ginẹ rọwo nọ Ọghẹnẹ o ti “bruoziẹ kẹ ae vẹrẹ vẹrẹ”? Obọnana Jesu ọ rọ ọtadhesẹ ta epanọ u wuzou te re a ruabọhọ olẹ na. Kẹsena ọ tẹ nọ kpahe ẹrọwọ nọ ohwo o re wo inọ Ọghẹnẹ o ti yo olẹ riẹ, inọ: “Nọ Ọmọ ohwo ọ te nyaze, kọ ọ te ginẹ jọ otọakpọ na ruẹ ẹrọwọ nana?” (Luk 18:8) Otọ ẹme riẹ na họ, ẹsejọhọ oghẹrẹ ẹrọwọ otiọye na ọ te jariẹ tere he evaọ oke nọ Kristi ọ te nyaze.

Ahwo jọ evaọ usu enọ e be gaviezọ kẹ Jesu na a bi rri omarai nọ a wo ẹrọwọ. A rri omarai nọ a kiẹrẹe gaga, gbe nọ a woma vi amọfa. Oghẹrẹ ahwo otiọye na Jesu ọ rọ fiki rai kẹ ọtadhesẹ nana, inọ:

“Ezae ivẹ jọ a kpobọ etẹmpol nyae lẹ, ọjọ ohwo Farisi ọdekọ kọ ọnọ o re mi osa-uzou. Ohwo Farisi na o te dikihẹ o te muhọ ẹlẹ họ eva inọ, ‘O Ọghẹnẹ, me yere owhẹ nọ mẹ wọhọ amọfa kpobi hi—enọ i re fru amọfa re, enọ i kiẹrẹe he, ibruẹnwae—hayo wọhọ ọnana nọ o re mi osa-uzou na. Mẹ rẹ siọ emuọriọ ba isiava ẹkpoka; mẹ rẹ kẹ abọvo abakpe ọrọ eware kpobi nọ me wo.’”—Luk 18:10-12.

Ahwo a riẹ otu Farisi na inọ a re dhesẹ oma  wọhọ ẹsenọ a kiẹrẹe gaga. A re ru onana re ahwo a rri rai kpekpehru. Edẹ nọ a rẹ mae siọ emuọriọ ba họ Ẹdọvo-Oka gbe Edene-Oka, edẹ nọ a rẹ thueki ologbo evaọ ẹwho na re ahwo buobu a ruẹse ruẹ e rai. Yọ a rẹ rọ obọ kotọ hwa abọvo abakpe oware kpobi, makọ ọrọ ekakọ nọ e rrọ kakao dede. (Luk 11:42) Umutho emerae jọ nọ e vrẹ, a ta ẹme nọ u dhesẹ nọ ahwo gheghe na a fioka ha evaọ aro rai, inọ: “Ogbotu nana nọ a riẹ Uzi na ha na [wọhọ epanọ otu Farisi a rri rai,] yọ ahwo nọ a duwu iyei.”—Jọn 7:49.

Jesu ọ ta haro nọ: “Rekọ ọnọ o re mi osa-uzou na o dikihẹ ugbo, ọ jẹ gwọlọ kpare ovao rri ehru hu, rekọ ọ jẹ tehe igbama riẹ inọ, ‘O Ọghẹnẹ, jọ ohrọ mẹ o re owhẹ, mẹ yọ ọrahauzi.’” Ẹhẹ, ọzae nana nọ o re mi osa-uzou na o vuhumu nọ ọyomariẹ ọrahauzi. Jesu o te ku ẹme riẹ na họ nọ: “Mẹ be ta kẹ owhai nọ, nọ ọzae nana o zihe kpobọ uwou riẹ, ọ jọ aro Ọghẹnẹ kiẹrẹe vi ohwo Farisi yena. Keme ohwo kpobi nọ ọ kpare oma riẹ kpehru a re ti hrẹ riẹ kpotọ, rekọ ohwo kpobi nọ o ru oma riẹ kpotọ a rẹ te kpare iẹe kpehru.”—Luk 18:13, 14.

Enẹ Jesu o ro ru ei vẹ kẹ ahwo kpobi epanọ u wuzou te re a wo omaurokpotọ. Ohrẹ nana u ti fiobọhọ kẹ ilele Jesu gaga keme udevie otu Farisi nọ i se okpodẹ gbe ọkwa gboja gaga na a jọ yọrọ ae. Yọ ohrẹ nana u wuzou gaga kẹ ilele Jesu kpobi.