O wọhọ nọ Jesu ọ gbẹ jọ Pẹria nọ ọ rrọ ofẹ ovatha-ọre Ethẹ Jọdan nọ ọ kẹ ọtadhesẹ ogodẹ nọ o vru gbe ubiugho edrakma nọ o vru na. Oware nọ ọ rehọ etadhesẹ ivẹ yena wuhrẹ họ, u fo nọ ma rẹ ghọghọ nọ ọrahauzi o te kurẹriẹ bru Ọghẹnẹ. Otu Farisi gbe otu ikere-obe na a be ta Jesu raha fikinọ o bi dede erahaizi rehọ. Kọ otu ọtaraha nana a wuhrẹ oware jọ no etadhesẹ ivẹ Jesu nana ze? Kọ a wo otoriẹ oghẹrẹ nọ o rẹ jọ Ọsẹ obọ odhiwu mai oma nọ erahaizi i te kurẹriẹ? Jesu ọ rọ ọtadhesẹ ọfa ta ẹme ro fiẹgba họ ẹme nana nọ o wuzou gaga na.

Ọtadhesẹ na o kiekpahe ọsẹ nọ o wo emezae ivẹ, yọ ọmọzae ọmaha na a mae jọ ọtadhesẹ nana ta kpahe. Otu Farisi na, otu ikere-obe gbe amọfa nọ a jẹ gaviezọ kẹ Jesu nọ o bi gbiku na a rẹ sai wuhrẹ oware jọ mi ọmọzae ọmaha na. Ghele na, u fo ho re a kpairoro vrẹ oware nọ Jesu ọ ta kpahe ọsẹ na gbe ọmọzae ọkpako na, keme a rẹ sai wuhrẹ oware jọ no uruemu nọ a dhesẹ ze. Fikiere roro kpahe oware nọ whọ rẹ sai wuhrẹ mi aimasa na nọ Jesu o bi gbiku na.

Jesu ọ ta nọ: “Ọzae jọ o wo emezae ivẹ. Ọrọ ọmaha ọ tẹ ta kẹ ọsẹ riẹ nọ, ‘Ọsẹ, rehọ ẹkabọ nọ o te omẹ evaọ eyero ra kẹ omẹ.’ Fikiere ọsẹ na ọ tẹ ghale eyero riẹ kẹ aimava na.” (Luk 15:11, 12) Muẹrohọ nọ orọnikọ ọrọ ọmaha na ọ gwọlọ ẹkabọ riẹ fikinọ ọsẹ riẹ o whu no ho. Ọsẹ riẹ ọ gbẹ rrọ uzuazọ. Rekọ ọmọ na ọ gwọlọ ẹkabọ riẹ obọnana re ọ jọ orọ obọriẹ, re ọ rọ eyero na ru epanọ u je rie. Kọ eme ọ gwọlọ ru?

Jesu ọ ta haro nọ: “Nọ umutho edẹ jọ e vrẹ no, ọmọzae ọmaha na o te koko eware riẹ kpobi họ, o te kpohọ orẹwho ugbothabọ jọ, ọ tẹ jọ obei raha eyero riẹ kufiẹ fiki uzuazọ ofafariẹ nọ o je yeri.” (Luk 15:13) Ukpenọ ọmọ na ọ jọ uwou ọsẹ riẹ nọ ọ jọ wo ufuoma, nọ ọsẹ riẹ ọ be jọ rẹrote emọ riẹ ziezi jẹ kẹ ae oware kpobi nọ a gwọlọ, ọmọ na ọ tẹ kwa kpohọ orẹwho ofa. Ọ tẹ jọ obei rọ igho riẹ kpobi yeri uzuazọ ofafariẹ, be wọ emetẹ. Kẹsena akpọ o te mu ei họ ẹbẹ wọhọ epanọ Jesu o dhesẹ evaọ iku na inọ:

 “Nọ ọ raha eyero riẹ kpobi no, ohọo ogaga u te mu evaọ orẹwho yena soso, akpọ ọ tẹ jẹ bẹe. Ọ tubẹ nyae rọ oma da ohwo orẹwho yena jọ dede, ọnọ o fi rie họ udhu riẹ re ọ rẹrote isi. Ọ jẹ gwọlọ nọ ọ rẹ re emu nọ isi na e jẹ re, rekọ ohwo ọvo ọ jẹ kẹe he.”—Luk 15:14-16.

Uzi nọ Ọghẹnẹ ọ rọ kẹ emọ Izrẹl o ta nọ isi yọ erao igbegbe, rekọ iruo isi-ithuru ọmọ nana o je ru kẹ ohwo jọ. Ohọo u re kpei aro ware te epanọ ọ rẹ rọ gwọlọ re emu isi nọ ọ be rẹrote na dede. Nọ oja o re ọmọ na gaga no, ‘ibiaro riẹ i te totọ.’ Kọ eme o ru? O te bruoma kpiroro nọ: “Ọsẹ mẹ o wo ahwo buobu nọ ọ rehọ iruo nọ e be re eva vọ kiọkọ, yọ ohọo o be jọ etenẹ kpe omẹ whu! Mẹ rẹ kpama mẹ vẹ nya bru ọsẹ mẹ, mẹ vẹ ta kẹe nọ: ‘Ọsẹ, mẹ thuzi mukpahe odhiwu gbe owhẹ. Me gbe te ọnọ a re se ọmọ ra ha. Rehọ omẹ wọhọ omọvo enọ whọ rehọ iruo.’” Kẹsena ọ tẹ wọ re o zihe bru ọsẹ riẹ.—Luk 15:17-20.

Kọ eme ọsẹ na o ti ru nọ ọ tẹ ruẹ ọmọ riẹ nọ o zihe ze? Kọ o ti muofu je ku eka họ ọmọ na oma fiki oware ugheghẹ nọ o ru nọ o ro no uwou? Kọ o ti ru wọhọ ẹsenọ ọ riẹ ọmọ na vievie he? O hae jọnọ owhẹ, eme whọ hai ti ru? Kọ ẹvẹ o hae jọ otẹrọnọ ọmọ ra?

Jesu ọ fodẹ oware nọ ọsẹ na o ru nọ ọ ruẹ ọmọ na, inọ: “Nọ [ọmọ na] ọ gbẹ jọ ugbothabọ, ọsẹ riẹ ọ tẹ kparo ruẹ e riẹ, ohrọ o tẹ riẹe, ọ tẹ dhẹ bru rie jẹ gbalọ iẹe, ọ tẹ nabe viọlọ iẹe.” (Luk 15:20) O tẹ make rọnọ ọsẹ na o yo kpahe uzuazọ ofafariẹ nọ ọmọ na o yeri, o dede i rie rehọ. Kọ isu egagọ ahwo Ju nọ i se omarai eg’Ọghẹnẹ na, a te rọ onana vuhu oghẹrẹ nọ Ọsẹ obọ odhiwu mai o re rri erahaizi nọ i kurẹriẹ? Kọ a ti je vuhumu nọ Jesu o bi dhesẹ ọkpọ uruemu nọ ọsẹ ọmọ na o dhesẹ na?

Nọ ọsẹ na ọ ruẹ oghẹrẹ nọ ọmọ na o ru oma ọkọkora kpozi gbe epanọ oware nọ o ru na o kẹ riẹ uye te, ọ tẹ ruẹ nọ ọmọ na o gine kurẹriẹ no. Yọ fikinọ ọsẹ ọmọ na họ ọnọ ọ kake dhẹ nyai dede iei, onana u ru rie lọhọ nọ ọmọ na ọ rọ ta eware nọ o ru kpobi kẹe. Jesu ọ ta nọ: “Ọmọ na ọ tẹ ta kẹe nọ, ‘Ọsẹ, mẹ thuzi mukpahe odhiwu gbe owhẹ. Me gbe te ọnọ a re se ọmọ ra ha.’”—Luk 15:21.

Ọsẹ na ọ tẹ ta kẹ idibo riẹ nọ: “Ovẹrẹ! wha rehọ ewu ze, ọnọ ọ mai woma, wha ku ei họ iẹe oma, je fi ẹmẹro họ uziobọ riẹ gbe eviẹ họ awọ riẹ. Wha rehọ ọmọ-eruẹ ọpoporiẹ na ze re, wha kpei, re ma re je ru ehaa, keme ọmọ mẹ nana o whu rekọ ọ wariẹ ziọ uzuazọ no; o vru rekọ a ruẹ e riẹ no.” Kẹsena aikpobi a te mu “akpọ họ ẹre kuoma.”—Luk 15:22-24.

Whaọ, evaọ oke nana yọ ọmọ ọkpako na ọ rrọ obọ udhu. Jesu ọ ta kpahe ọmọ ọkpako na nọ: “Nọ o je kpozi ọ jẹ kẹle uwou no, o te yo edo ile gbe ahwo nọ a bi gbile. O te se omọvo idibo na ọ tẹ nọe oware nọ o be via. Ọ tẹ ta kẹe nọ, ‘Oniọvo ra o zihe ze no, ọsẹ ra o te kpe ọmọ-eruẹ ọpoporiẹ na fikinọ o te uwou oma kọkọ.’ Rekọ eva e tẹ dhae ọ gbẹ rọwo ruọ eva ha. Kẹsena ọsẹ riẹ ọ tẹ nya bru rie ze, o te mu ei họ ẹlẹ. Ọ tẹ kpahe kẹ ọsẹ riẹ nọ, ‘Rri! Anwọ ikpe buobu mẹ be rọ gbodibo kẹ owhẹ na yọ mẹ re ghẹmeeyo kẹ owhẹ ẹsiẹvo ho, rekọ whọ re kẹ omẹ ọmọ-ẹwe ẹdẹvo ho inọ mẹ avọ  egbẹnyusu mẹ ma rọ reakpọ kuoma. Rekọ nọ ọmọ ra nana nọ ọ raha eyero ra kufiẹ kugbe igberẹ na o zihe ze, who te kpe ọmọ-eruẹ ọpoporiẹ na rọ kẹe.’”—Luk 15:25-30.

Amono a wọhọ ọmọzae ọkpako na, nọ a be ta Jesu raha fikinọ o bi dhesẹ ohrọ kẹ ahwo gheghe gbe erahaizi na? Otu Farisi gbe otu ikere-obe na. Fiki eva nọ e be dha ae inọ Jesu o bi dede erahaizi rehọ, oye o soriẹ nọ ọ rọ rehọ ọtadhesẹ nana ta ẹme na. Fikiere u fo nọ ohwo kpobi nọ eva e be dha inọ Ọghẹnẹ o bi dhesẹ ohrọ kẹ erahaizi nọ i kurẹriẹ, o re wuhrẹ no onana ze.

Nọ Jesu o je ku iku na họ, ọ ta oghẹrẹ nọ ọsẹ na ọ jẹ rọ lẹ ọmọzae ọkpako na inọ: “Ọmọ mẹ, whọ rrọ kugbe omẹ ẹsikpobi, yọ eware kpobi nọ me wo era. Rekọ u fo re ma ru ehaa jẹ ghọghọ, keme oniọvo ra o whu rekọ ọ wariẹ ziọ uzuazọ no; o vru rekọ a ruẹ e riẹ no.”—Luk 15:31, 32.

Jesu ọ ta oware nọ ọmọzae ọkpako na o ru uwhremu na ha. Rekọ, nọ Jesu o whu jẹ kparoma ze no, “izerẹ buobu i je kurẹriẹ ziọ ẹrọwọ na.” (Iruẹru Ikọ 6:7) Ẹsejọhọ, ejọ evaọ usu rai e jọ etẹe okenọ Jesu ọ kẹ ọtadhesẹ ọmọ nọ o vru na. Ẹhẹ, makọ ahwo nana dede a bruoma kpiroro, a te kurẹriẹ bru Ọghẹnẹ ze.

No umuo ẹdẹ yena vrẹ, u fo nọ ilele Jesu a re ru lele igogo eware nọ a jọ emamọ ọtadhesẹ nana wuhrẹ na. Oware ọsosuọ nọ ma re wuhrẹ họ epanọ o rrọ oware areghẹ te re ma daji udevie ahwo Ọghẹnẹ, oria ufuoma nọ Ọsẹ obọ odhiwu mai ọ be jọ dhesẹ uyoyou kẹ omai jẹ rẹrote omai ziezi, ukpenọ ma rẹ rọ fiki isiuru jọ ghoro vrẹ kpohọ “orẹwho ugbothabọ jọ.”

Oware ofa nọ ma rẹ sai wuhrẹ họ, otẹrọnọ ma ghoro no egagọ Jihova, u fo nọ ma re zihe bru Ọsẹ mai re ma sae wariẹ wo eghale riẹ.

U te no ere no, ma sai wuhrẹ oware ofa nọ ma te roro kpahe ohẹriẹ nọ o rrọ uruemu odederehọ gbe erọvrẹ ọsẹ na avọ orọ ẹgo gbe ofu nọ ọ jọ ọmọzae ọkpako na eva. Uzẹme riẹ họ, nọ ohwo nọ o kie no ukoko na o te kurẹriẹ no eva ze je zihe ziọ ‘uwou Ọsẹ na,’ idibo Ọghẹnẹ a rẹ rọvrẹ riẹ je dede iei rehọ. Jọ ma hae ghọghọ nọ oniọvo mai nọ o ‘whu ọ tẹ wariẹ ziọ uzuazọ’ gbe okenọ ọnọ “o vru” o te zihe ze.