Nọ Jesu avọ ilele riẹ a nya no Pẹria be kẹle Jerusalẹm no, a tẹ fa Ethẹ Jọdan vrẹ evaọ oria nọ o kẹle Jẹriko. Amọfa a rrọ kugbe ai nọ a gbe bi kpohọ ehaa Ọnyavrẹ ọrọ 33 C.E.

Jesu ọ karo kẹ ilele riẹ be nya vẹrẹ vẹrẹ keme ọ gwọlọ nọ o re te obei evaọ ẹruoke rọkẹ ehaa Ọnyavrẹ na. Rekọ ozọ u bi mu ilele na. Kẹle na nọ Jesu ọ ta nọ o bi no Pẹria kpobọ Judia fiki Lazarọs nọ o whu, Tọmọs ọ ta kẹ ilele edekọ nọ: “Wha joma nya re, re ma ruẹsi lele iei whu.” (Jọn 11:16, 47-53) Fikiere oware uyoma o sae via kẹ ae evaọ obọ Jerusalẹm, agbẹta nọ ozọ u bi ro mu ilele na.

Re Jesu ọ ruẹrẹ ae kpahe kẹ oware nọ o te via evaọ obaro, o te se ikọ na họ akotọ jẹ ta kẹ ae nọ: “Jerusalẹm ma be nya na, yọ a te rehọ Ọmọ ohwo kẹ ilori izerẹ gbe otu ikere-obe na. A ti bruoziẹ uwhu kpei, a vẹ te rehọ iẹe kẹ ahwo erẹwho na re a rehọ iẹe jijehwẹ jẹ fae jẹ kare iẹe fihọ ure kpe; ẹdẹ avọ esa ọ vẹ te kparoma ze.”—Matiu 20:18, 19.

Onana họ orọ avọ isiasa nọ Jesu ọ be rọ ta kẹ ilele riẹ kpahe uwhu gbe ẹkparomatha riẹ na. (Matiu 16:21; 17:22, 23) Rekọ evaọ onana, ọ ta kẹ ae nọ a te kare iẹe fihọ ure kpe. A gaviezọ kẹ ẹme riẹ na, rekọ a wo otoriẹ ẹme na ha. Ẹsejọhọ a bi rẹro nọ Jesu o ti zihe uvie Izrẹl ziọ otọakpọ, ae omarai a ve ti wo oruaro kugbe Kristi na evaọ uvie obọ otọakpọ obonẹ.

Salomi, oni Jemis avọ Jọn ikọ Jesu ọ jọ usu ahwo nọ a rrọ kugbe Jesu evaọ erẹ na. Jesu ọ kẹ ikọ ivẹ nana odẹ nọ otofa riẹ o rrọ “Emọ Egbrara,” fikinọ ofu o re kru ai emu hu. (Mak 3:17; Luk 9:54) Anwọ oke jọ ze na, ikọ ivẹ nana a be gwọlọ epanọ a re ro wo ọkwa ologbo evaọ Uvie Kristi. Oni rai ọ riẹ kpahe onana. Ọ tẹ rọ fiki emọ riẹ nyabru Jesu, rọ uzou kpotọ kẹe jẹ  ta kẹe nọ ọ gwọlọ yare oware jọ. Jesu ọ tẹ ta kẹe nọ: “Eme whọ gwọlọ?” Ọ tẹ ta nọ: “Mẹ be yare inọ emezae ivẹ mẹ nana a keria kẹle owhẹ evaọ Uvie ra, ọjọ obọze ra ọdekọ ẹkpẹlobọ ra.”—Matiu 20:20, 21.

Jemis avọ Jọn họ enọ e be yare onana dede nọ oni na ọ nya. Obọnana Jesu ọ ta kpahe epanọ a te rọ rehọ iẹe jijehwẹ je kpomovuọ họ iẹe oma na, fikiere ọ tẹ ta kẹ ikọ ivẹ na nọ: “Wha riẹ oware nọ wha be yare na ha. Kọ wha sae da egho nọ mẹ be te da na?” A tẹ kuyo nọ: “Ee.” (Matiu 20:22) Ghele na, o wọhọ nọ a wo otoriẹ oware nọ a bi yo Ee kẹ na ha.

Jesu ọ ta kẹ ae nọ: “Wha te ginẹ da egho mẹ, rekọ orọnọ mẹ ọ rẹ salọ enọ e rẹ keria obọze gbe ẹkpẹlobọ mẹ hẹ, rekọ oria yena o rrọ rọkẹ enọ Ọsẹ mẹ ọ ruẹrẹ e riẹ họ kẹ.”—Matiu 20:23.

Nọ ikọ ikpe nọ i kiọkọ a yo kpahe ayare Jemis avọ Jọn na, eva e dha rai gaga. Evaọ oke nọ u kpemu nọ ikọ na a jẹ vro avro kpahe ohwo nọ ọ mae rro, kọ o sae jọnọ Jemis avọ Jọn họ enọ e jẹ mai si ẹme na? (Luk 9:46-48) Oghẹrẹ nọ o jọ kpobi kẹhẹ, ayare rai na u dhesẹ nọ ikọ 12 na a fi ohrẹ nọ Jesu ọ kẹ rai na họ iruo ho, onọ ọ jọ ta kẹ ae nọ a rri omarai wọhọ enọ e mae kawo. A gbẹ be gwọlọ ọkwa ghele.

Jesu ọ tẹ jiroro nọ o re ru oware jọ kpahe ẹbẹbẹ nọ ọ rrọ otọ na gbe ẹwhọ nọ onana o wha ze. O se ikọ 12 na koko, ọ tẹ rọ urru uwowolẹ kẹ ae ohrẹ inọ: “Wha riẹ nọ enọ e rrọ isu erẹwho na a re ru omarai ilori kẹ enọ a bi su, yọ ahwo ologbo rai a rẹ rọ obọ ogaga su ae. O rẹ jọ ere evaọ udevie rai vievie he; ukpoye, ohwo kpobi nọ ọ gwọlọ jọ ruaro evaọ udevie rai ọ rẹ jọ ọgbodibo rai, yọ ohwo kpobi nọ ọ gwọlọ jọ ohwo ọsosuọ evaọ udevie rai ọ rẹ jọ ọrigbo kẹ ahwo na kpobi.”—Mak 10:42-44.

Kẹsena Jesu ọ tẹ kẹ ae oriruo nọ u fo nọ a re lele, oriruo ọyomariẹ. Ọ ta nọ: “Ọmọ ohwo ọ nyaze, orọnikọ re a gbodibo kẹe he, rekọ re ọ gbodibo o ve je siobọno uzuazọ riẹ rọkẹ ẹtanigbo ọrọ ahwo buobu.” (Matiu 20:28) Enwenọ ikpe esa ena nọ Jesu ọ be rọ gbodibo kẹ amọfa na. Yọ o ti gbe ru ere, te epanọ o ti ro whu kẹ ahwo-akpọ dede. U fo nọ ilele na a re wo ọkpọ uruemu riẹ na, onọ a rẹ rọ gbodibo kẹ amọfa je ru omarai họ enọ e mae kawo viukpenọ a rẹ wọ oma kpehru re amọfa a gbodibo kẹ ae.