Nọ Jesu ọ tẹ ta ẹme hayo ru oware, onana u re ru ahwo dhesẹ oghẹrẹ nọ udu rai o rrọ via, sọ u woma hayo u yoma. Oware utioye na o via evaọ uwou jọ obọ Galili. Ohwo Farisi jọ nọ a re se Saemọn o zizie Jesu ziọ uwou riẹ te re emu, ẹsejọhọ re ọ riẹ ohwo nana nọ o bi ru iruo igbunu na ziezi. Jesu ọ tẹ ginẹ nya, ẹsejọhọ re ọ rọ uvẹ nana ta usiuwoma kẹ ahwo nọ a rrọ etẹe, wọhọ epanọ ọ rẹ nya anwẹdẹ nọ enọ i re mi osa-uzou gbe erahaizi i te zizie ei kẹ emuọriọ na.

Rekọ nọ Jesu o te etẹe, a ru eware nọ a jẹ hai ru kẹ ọrara kẹe he. Evaọ orẹwho yena, ovu ọ rẹ vọ idhere rai, yọ eviẹ nọ ahwo a jẹ hai fihọ oke yena i re ruru awọ họ. Fikiere nọ ọrara ọ tẹ kpahe ohwo, o jọ uruemu rai re a wozẹ awọ ọrara na. Rekọ a ru onana kẹ Jesu hu. Yọ ohwo ọvo ọ viọlọ e riẹ hẹ, wọhọ epanọ a jẹ hai ru oke yena re. Oware ofa nọ a jẹ hai ru họ, a re ku ewhri họ uzou ọrara ro dhesẹ ẹwo gbe odederehọ. A ru onana kẹ Jesu gbe he. Kọ ma sae ta nọ ohwo nọ o zizie Jesu na o gine dede iei rehọ?

Erara na a tẹ keria re a mu emu na họ ẹre. Nọ a be re na, aye jọ nọ a zizie he ọ tẹ rueva uwou na. A riẹ aye nana “wọhọ ọrahauzi evaọ ẹwho na.” (Luk 7:37) Ohwo kpobi ọrahauzi, rekọ aye nana o je yeri uzuazọ ọfariẹ-ogbe, yọ ẹsejọhọ ọ jọ ogberẹ. O sae jọnọ ọ gaviezọ kẹ iwuhrẹ Jesu jọ no, te onọ Jesu ọ jọ kẹ uzizie na inọ, ‘ahwo kpobi nọ ewha egbẹgbẹdẹ e rrọ uzou a nya bru rie ze, re ọ sasa ae oma.’ (Matiu 11:28, 29) U muẹro nọ eme nọ Jesu ọ ta gbe eware nọ o ru i duobọte aye nana udu, oye o soriẹ nọ ọ be rọ gwọlọ Jesu na.

Aye nana ọ tẹ nya bru Jesu evaọ oria nọ ọ keria, o te kigwẹ. Irui-oviẹ i te bi kie no aye na aro ze fihọ awọ Jesu, kẹsena ọ vẹ rọ eto riẹ ririe ai no. Ọ tẹ nabe viọlọ awọ riẹ je ku udẹ nọ u re gbo ore awere nọ ọ wha ze họ awọ Jesu. Oware nọ aye na o ru na o were Saemọn ho, fikiere ọ tẹ be jọ eva riẹ ta nọ: “Orọnọ ọzae nana ginọ ọruẹaro, ọ hae riẹ oghẹrẹ ohwo nọ aye nana nọ ọ be rọ obọ tei na ọ rrọ, inọ ọrahauzi.”—Luk 7:39.

Jesu ọ riẹ oware nọ Saemọn o bi roro, ọ tẹ ta kẹe nọ: “Saemọn, me wo ẹme jọ nọ mẹ gwọlọ ta kẹ owhẹ.” Saemọn ọ tẹ ta nọ: “Owuhrẹ, tae ze!” Jesu ọ tẹ ta nọ: “Ezae ivẹ jọ e reosa ohwo jọ nọ o re momo igho kẹ ahwo; ọjọ ọ reosa dinariọs egba isoi (500), ọdekọ kọ udhuvẹ-gbikpe. Nọ a wo oware ovo nọ a sae rọ hwa osa na zihe he, ọ tẹ rọvrẹ aimava na riẹriẹriẹ. Kọ evaọ usu aimava na, ọvẹ ọ rẹ mai you rie?” Ẹsejọhọ Saemọn o je roro nọ oware ovo o jọ onana tei hi, ọ tẹ kẹ uyo nọ: “Me roro nọ ọnọ ọ mae rọvrẹ bu na.”—Luk 7:40-43.

Jesu ọ tẹ ta kẹe nọ ọ ta gba. Kẹsena Jesu o te rri aye na, ọ tẹ vuẹ Saemọn nọ: “Kọ whọ be ruẹ aye nana? Nọ mẹ ruọ uwou ra, whọ kẹ omẹ ame wozẹ awọ mẹ hẹ. Rekọ aye nana o su irui-oviẹ riẹ ku awọ mẹ ọ tẹ rehọ eto riẹ ririe ae. Whọ viọlọ omẹ hẹ, rekọ aye nana, anwẹnọ mẹ rọ ruọ eva na ọ be rọ viọlọ awọ mẹ. Who ku udẹ họ uzou mẹ hẹ, rekọ aye nana o ku udẹ nọ u re gbo ore awere họ awọ mẹ.” Jesu ọ ruẹ vevẹ nọ eware nọ aye nana o bi ru na i dhesẹ nọ o gine kurẹriẹ no uzuazọ ọfariẹ-ogbe riẹ. Fikiere Jesu o te ku ẹme na họ nọ: “Mẹ be ta kẹ owhẹ nọ, dede nọ izieraha riẹ e rrọ buobu, a rehọ e rai rọvrẹ riẹ no keme o dhesẹ uyoyou ulogbo. Rekọ ọnọ a rọvrẹ kakao o re dhesẹ uyoyou kakao.”—Luk 7:44-47.

Orọnikọ Jesu ọ be ta nọ ọfariẹ-ogbe o woma ha. Ukpoye o bi dhesẹ ohrọ kẹ ahwo nọ a thọ izi ilogbo, rekinọ a kurẹriẹ bru Kristi rọkẹ ufuoma. Dai roro epanọ oma o jọ aye na nọ Jesu ọ ta kẹe nọ: “A rọ izieraha ra rọvrẹ owhẹ no. . . . Ẹrọwọ ra o siwi owhẹ no; nya kpo tou.”—Luk 7:48, 50.