Jesu avọ ilele riẹ a be nya rri ofẹ ẹkpẹlobọ-ọre bi kpobọ Galili. O jọ amara Asa hayo Ane, yọ eka e rrọ edhere nọ a be nya vrẹ na. Nọ ohọo u kpe ilele riẹ no, a tẹ kọrọ eka be re. Rekọ ẹdẹ nana Ẹdijala, yọ otu Farisi na a ruẹ e rai.

Kareghẹhọ nọ kẹle na ahwo Ju jọ evaọ obọ Jerusalẹm a jẹ gwọlọ epanọ a re ro kpe Jesu no, keme a ta nọ ọ thọ uzi Ẹdijala. Whaọ, otu Farisi na a tẹ wariẹ muọ Jesu họ ẹfo fiki oware nọ ilele riẹ a ru na. A ta nọ: “Rri! Ilele ra a bi ru oware nọ o wọso uzi Ẹdijala.”—Matiu 12:2.

Otu Farisi na a ta nọ re a kọrọ eka jẹ rọ obọ thahe ae yọ iruo eka-ekọrọ gbe eka-ivoro. (Ọnyano 34:21) Eware nọ a je kele dhe iruo evaọ Ẹdijala o lẹliẹ uzi Ẹdijala na jọ owha ogbẹgbẹdẹ, ukpenọ o rẹ jọ oke evawere gbe omosasọ evaọ egagọ Jihova wọhọ epaọ ẹjiroro nọ a ro fi uzi na họ. Jesu ọ kẹ rai iriruo sa-sa ro dhesẹ kẹ ae nọ oghẹrẹ nọ a bi si uzi Ẹdijala na, ere Jihova Ọghẹnẹ ọ gwọlọ nọ o rẹ jọ họ.

Oriruo jọ nọ Jesu ọ kẹ rai họ, orọ Devidi avọ ahwo riẹ. Okenọ ohọo u je kpe ai, a ruọ evaọ uwou Ọghẹnẹ, a tẹ re ebrẹdi nọ a ro mudhe kẹ Ọghẹnẹ. Ebrẹdi nana nọ a ro mudhe kẹ Jihova vẹre nọ a rọ ekpokpọ nwene no na, izerẹ na ọvo họ enọ e rẹ re ae. Ghele na, fiki epanọ eware e jọ, a brukpe Devidi avọ ahwo riẹ hẹ.—Iruo-Izerẹ 24:5-9; 1 Samuẹle 21:1-6.

Oriruo avọ ivẹ nọ Jesu ọ kẹ rai họ: “Kọ wha re jọ Uzi na se inọ izerẹ a rẹ jọ etẹmpol na  ru iruo evaọ Ẹdijala, rekọ a rẹ reabe uzi Ẹdijala ha?” Otọ ẹme riẹ na họ, makọ evaọ Ẹdijala dede, izerẹ na a re kpe erao nọ a re ro dhe idhe, a ve je ru iruo efa evaọ etẹmpol na. Jesu ọ tẹ ta kẹ ae nọ: “Rekọ mẹ be ta kẹ owhai nọ, ohwo nọ ọ rro vi etẹmpol na ọ rrọ etenẹ.”—Matiu 12:5, 6; Ikelakele 28:9.

Jesu ọ tẹ wariẹ rọ Ikereakere na ro ru ẹme riẹ vẹ, inọ: “Otẹrọnọ wha wo otoriẹ ẹme nana, ‘Ohrọ-oriọ mẹ gwọlọ orọnikọ idheidhe he,’ wha hai ti brukpe enana nọ e kare abe na ha.” Kẹsena o te ku ẹme na họ nọ: “Keme Ọmọ ohwo yọ Olori Ẹdijala na.” Jesu ọ be jọ etenẹ ta kpahe esuo odu-ikpe riẹ nọ udhedhẹ o te jọ evaọ Uvie Ọghẹnẹ.—Matiu 12:7, 8; Hosia 6:6.

U kri no nọ ohwo-akpọ ọ be rọ reoja evaọ otọ esuo Setan nọ ozighi gbe ẹmo-ofio ọ dafia na. Ohẹriẹ ulogbo o te jariẹ evaọ etoke Ẹdijala ologbo orọ esuo Kristi na, onọ ma te jọ wo eriosehọ nọ mai kpobi ma gwọlọ na.