Jesu avọ ilele riẹ a te ti te Bẹtsaida. Ahwo a tẹ rọ ọzae jọ nọ o tuaro bru Jesu ze, be lẹe nọ ọ rọ obọ te ọzae na re o siwi ei.

Jesu o te kru ọzae na obọ, ọ tẹ rehọ iẹe kpohọ otafe iwhre na. Nọ Jesu o je eya ku ibiaro ọzae na no, ọ tẹ nọe nọ: “Kọ whọ be ruẹ oware jọ?” Ọzae na ọ tẹ ta nọ: “Mẹ be ruẹ ahwo, rekọ a wọhọ ire nọ e be nya.” (Mak 8:23, 24) Jesu ọ tẹ rọ obọ te ibiaro riẹ, kẹsena ọzae na o te mu ude họ ẹruẹ. Jesu ọ tẹ vuẹe nọ o du zihe kpobọ iwhre na ha rekọ ọ nwani kpobọ uwou riẹ ovavo.

Kẹsena Jesu avọ ilele riẹ a tẹ rọ ovao rri ubrotọ Sisaria ọrọ Filipai nọ o rrọ ofẹ ẹkpẹlobọ ovatha-ọre. Oria na u thabọ te emaele 25. Iwhre nọ a bi kpohọ na ọ rrọ ugbehru nọ u kpehru te irula odu ọvo gbe udhuhrẹ gbe ikpe (1,150), yọ Ugbehru Hẹmọn nọ ekpalekpa-ame e rrọ ehru riẹ, o rrọ ofẹ ẹkpẹlobọ ovatha-ọre riẹ. Ẹsejọhọ onya na o te rehọ ae edẹ buobu.

Nọ a jọ edhere, Jesu ọ tẹ wẹriẹ oria jọ nyae lẹ. Emerae izii hayo ikpe ọvo i kiọkọ re o te ti whu, yọ Jesu o bi roro kpahe ilele riẹ gaga. Ahwo buobu nọ a jọ ilele riẹ vẹre a gbe bi lele iei hi, yọ u muẹro nọ u wo eware buobu nọ makọ enọ i bi lele iei na a ri wo otoriẹ rai hi. Ẹsejọhọ u bi gbe ai unu oware nọ o soriẹ nọ Jesu ọ gbẹ rọ rọwo nọ a rehọ iẹe mu ovie he, hayo oware nọ o soriẹ nọ ọ gbẹ rọ rehọ oka dhesẹ oghẹrẹ ohwo nọ ọ rrọ via ha.

Nọ ilele na a nya bru Jesu kpohọ oria nọ ọ be jọ lẹ, Jesu ọ tẹ nọ ae nọ: “Ono ahwo a be ta nọ Ọmọ ohwo ọ rrọ?” A tẹ ta nọ: “Ejọ e be ta nọ Jọn Ọhọahwo-Ame na, efa Elaeja, efa kọ Jerimaya hayo omọvo eruẹaro na.” Ahwo a bi roro nọ ẹsejọhọ Jesu yọ ohwo jọ evaọ usu ahwo yena nọ ọ kparoma no uwhu ze. Re Jesu ọ riẹ oware nọ o rrọ ilele riẹ eva, ọ tẹ nọ ae nọ: “Kọ owhai, ono wha roro nọ mẹ rrọ?” Saemọn Pita ọ tẹ nwane kuyo nọ: “Whẹ họ Kristi na, Ọmọ Ọghẹnẹ nọ ọ rrọ uzuazọ na.”—Matiu 16:13-16.

Jesu ọ ta nọ jọ eva e were Pita keme Ọghẹnẹ họ ọnọ o rovie oware nọ ọ ta na via kẹe, ọ ta nọ: “Mẹ be jẹ ta kẹ owhẹ nọ: Whẹ họ Pita, yọ ehru utho nana mẹ te bọ ukoko mẹ fihọ, yọ inuẹthẹ Uki e te ga obọ vi ei hi.” Ẹme nọ Jesu ọ be ta na họ, ọyomariẹ ọ te bọ ukoko, yọ enọ e rrọ ukoko na nọ i kru ẹrọwọ rai te urere evaọ otọakpọ, makọ Uki dede o te whaha ae ewo osohwa rai hi. Jesu ọ ya eyaa kẹ Pita nọ: “Mẹ te kẹ owhẹ isiavẹ Uvie odhiwu.”—Matiu 16:18, 19.

Orọnikọ Jesu ọ be ta nọ Pita o wuzou vi ikọ edekọ họ, hayo kọ ọye ọ te jọ otọhotọ ukoko na ha. Jesu họ Utho nọ a te bọ ukoko riẹ fihọ. (1 Ahwo Kọrint 3:11; Ahwo Ẹfẹsọs 2:20) Rekọ a te kẹ Pita isiavẹ esa. Pita o wo uvẹ-ọghọ nọ o ti ro rovie uvẹ fihọ kẹ eko ahwo sa-sa re a ruọ Uvie odhiwu.

 Pita ọ te rọ usiavẹ ọsosuọ rovie kẹ ahwo evaọ Pẹntikọst ọrọ 33 C.E., nọ o ti dhesẹ oware nọ o gwọlọ nọ ahwo Ju gbe enọ i kurẹriẹ ruọ egagọ ahwo Ju a re ru re a sai wo esiwo. Ọ te rọ usiavẹ avọ ivẹ rovie kẹ ahwo Sameria nọ a kurẹriẹ re a ruọ Uvie Ọghẹnẹ. Kẹsena evaọ ukpe 36 C.E., Pita ọ vẹ rọ usiavẹ avọ esa rovie uvẹ yena kẹ ahwo Erẹwho na nọ a yawo ho, Kọniliọs gbe amọfa.—Iruẹru Ikọ 2:37, 38; 8:14-17; 10:44-48.

Nọ Jesu ọ be ta ẹme kẹ ikọ na, o da rai gaga nọ ọ vuẹ ae nọ uviemenẹ ọ te ruẹ uye je whu evaọ obọ Jerusalẹm. Fikinọ Pita ọ riẹ nọ Jesu ọ te kparoma no uwhu ze kpobọ odhiwu hu, o te se Jesu họ akotọ, o te mu ei họ ẹwhọku nọ: “Whọ rọ uye bẹ omara ha Olori; onana o rẹ via kẹ owhẹ vievie he.” Rekọ nọ Jesu o kuomarẹriẹ, ọ tẹ ta kẹe nọ: “Ruọ emu mẹ, Setan! Whẹ yọ utho ezoruẹ kẹ omẹ keme iroro ahwo-akpọ who bi roro na orọnikọ erọ Ọghẹnẹ hẹ.”—Matiu 16:22, 23.

Jesu o te se ogbotu na kẹle oma, ọ tẹ ta kẹ ae nọ o lọhọ tere he re ohwo ọ jọ olele riẹ. Ọ ta nọ: “Otẹrọnọ ohwo jọ ọ gwọlọ lele omẹ, jọ ọ vro omobọ riẹ jẹ wọ ure-oja riẹ je lele omẹ ẹsikpobi. Keme ohwo kpobi nọ ọ be gwọlọ siwi uzuazọ riẹ, uzuazọ riẹ u ti vru, rekọ ohwo kpobi nọ uzuazọ riẹ u vru fiki mẹ gbe fiki usi uwoma na ọ te wariẹ woi.”—Mak 8:34, 35.

Evaọ uzẹme, re ohwo ọ sae jọ olele Jesu, o re wo udu je gbobọnẹ eware jọ. Jesu ọ ta nọ: “Ohwo kpobi nọ oma o be vo fiki mẹ avọ eme mẹ evaọ oge ibruẹnwae nana nọ o rrọ muomu na, oma riẹ o te vo Ọmọ ohwo re okenọ ọ te nyaze evaọ oruaro Ọsẹ riẹ avọ ikọ-odhiwu erẹri na nọ e rrọ kugbei.” (Mak 8:38) Ẹhẹ, nọ Jesu ọ tẹ nyaze, ọ te “hwosa kẹ ohwo kpobi wọhọ epaọ iruo riẹ.”—Matiu 16:27.