Ikọ Jesu a be ta usiuwoma evaọ Galili, rekọ Jọn Ọhọahwo-Ame na nọ o dhesẹ Jesu kẹ ahwo evaọ oke ẹdẹ o wo ufuoma utioye he. Ọ rrọ uwou-odi enwenọ ikpe ivẹ soso.

Jọn ọ ta kẹ Herọd Antipas ovie na vevẹ nọ Herodias aye oniọvo riẹ nọ a re se Filip nọ ọ rehọ na o thọ. Herọd ọ siọ aye ọsosuọ riẹ, ọ tẹ rehọ Herodias. Wọhọ epanọ Uzi nọ Ọghẹnẹ ọ rọ kẹ Mosis o ta, onọ Herọd ọ ta nọ o bi koko na, oghẹrẹ orọo utionana o thọ, o tẹ jẹ rrọ ẹnwae-obro. Fikinọ Jọn ọ whọku Herọd, o te fi Jọn họ uwou-odi, yọ ẹsejọhọ Herodias họ ohwo nọ ọ bẹbẹ e riẹ họ ru onana.

Herọd ọ riẹ oware nọ o re ru Jọn he, keme ahwo “a rehọ Jọn fihọ ọruẹaro.” (Matiu 14:5) Rekọ oware nọ Herodias ọ gwọlọ ru Jọn o riẹe eva. “O wo ẹgo họ eva kpahe Jọn,” yọ ọ be tubẹ gwọlọ nọ o re kpei no. (Mak 6:19) Uwhremu na, uvẹ na u te rovie.

Omoke jọ taure oke ehaa Ọnyavrẹ ọrọ 32 C.E. u te ti te, Herọd o te se ehaa ilogbo kẹ ẹdẹ-eyẹ riẹ. O zizie ahwo ologbo egọmeti, enọ i wuzou elakpa, gbe ahwo nọ a riẹ odẹ ziezi evaọ Galili ziọ ehaa na. Nọ ehaa na e be nyaharo na, Salomi ọmọtẹ Herodias nọ o yẹ kẹ Filip ọzae riẹ vẹre o te je gbile kẹ enọ a zizie na. Ile nọ o gbe na e were ezae na gaga.

Ile nọ ọmọtẹ na o gbe na e were Herọd te epanọ ọ rọ ta kẹe nọ: “Yare omẹ oware kpobi nọ whọ gwọlọ, mẹ te rehọ iẹe kẹ owhẹ.” O te duwu iyei nọ: “Oware kpobi nọ whọ yare mi omẹ, mẹ te rehọ iẹe kẹ owhẹ, makọ abọvo uvie mẹ dede.” Taure Salomi ọ tẹ te fodẹ oware nọ ọ rẹ kẹe, ọ tẹ nyae nọ oni riẹ nọ: “Eme mẹ rẹ yare?”—Mak 6:22-24.

Uvẹ nọ Herodias ọ be gwọlọ anwẹdẹ na ona. Ọ ta kẹ ọmọtẹ riẹ nọ: “Uzou Jọn Ọhọahwo-Ame na.” Ababọ oke oraha, Salomi o te zihe bru Herọd, ọ tẹ ta kẹe nọ: “Mẹ gwọlọ nọ who fi uzou Jọn Ọhọahwo-Ame na họ omodhe ọkpakpala kẹ omẹ obọnana.”—Mak 6:24, 25.

Oware nana o kẹ Herọd uye gaga, rekọ ahwo nọ o zizie na a yo nọ o je duwu iyei kẹ Salomi. O rri rie nọ o mai woma re o kpe ọzae nọ o ru oware ovo thọ họ na, viukpenọ ahwo a rẹ rọ oghẹrẹ ubiẹro jọ rri rie. Fikiere, Herọd o te vi alakpa jọ kpobọ uwou-odi na re o bru uzou Jọn ze. O raha oke he, alakpa na o te bru uzou riẹ fihọ omodhe ọkpakpala ze. Ọ tẹ rehọ iẹe kẹ Salomi, Salomi ọ tẹ rehọ iẹe se oni riẹ.

Nọ ilele Jọn a yo oware nọ o via na, a tẹ nyaze te wọ ori riẹ vrẹ, a te ki ei. Ilele Jọn a tẹ nyae vuẹ Jesu oware nọ o via.

Uwhremu na, nọ Herọd o yo kpahe epanọ Jesu o bi ro siwi ahwo je le izi igbegbe no ahwo oma, ozọ u te mu ei gaga. O je roro nọ Jesu nọ o bi ru eware nana, yọ Jọn Ọhọahwo-Ame na nọ “ọ kparoma no uwhu ze.” (Luk 9:7) Fikiere Herọd Antipas ọ tẹ be gwọlọ edhere nọ ọ rẹ rọ ruẹ Jesu. Orọnikọ ọ be gwọlọ iẹe re o yo usiuwoma nọ Jesu ọ be ta ha. Ukpoye, Herọd ọ gwọlọ nọ ọ rẹ ruẹ Jesu re ọ riẹ sọ Jesu ginọ Jọn nọ ọ kparoma no uwhu ze.