Nọ Jesu ọ dhẹ vabọ no obọ ahwo Nazarẹt nọ a jẹ gwọlọ iẹe kpe no, o te kpobọ Kapaniọm, okpẹwho nọ ọ kẹle Abade Galili, nọ a re je se “awa Gẹnesarẹt.” (Luk 5:1) Onana u ru eruẹaruẹ nọ e rrọ obe Aizaya gba inọ ahwo Galili nọ a be rria akotọ abade a te ruẹ elo ologbo.—Aizaya 9:1, 2.

Jesu ọ ruabọhọ usi uwhowho na evaọ Galili inọ “Uvie odhiwu o kẹle no.” (Matiu 4:17) Jesu o te se imane re a jọ ilele riẹ. A kaki lele iei kpohọ erẹ evaọ oke nọ u kpemu, rekọ nọ a lele Jesu zihe no obọ Judia ze, a te kpohọ okọ iye-ikpe rai nọ a jọ vẹre. (Jọn 1:35-42) Rekọ obọnana, o gwọlọ nọ a rẹ jọ kugbe Jesu oke kpobi, re ọ sai wuhrẹ ai iruo usiuwoma ota na nọ a te ruabọhọ nọ Jesu o te zihe kpobọ odhiwu no.

Nọ Jesu ọ be nya akotọ unueri na vrẹ na, ọ tẹ ruẹ Saemọn Pita avọ oniọvo riẹ nọ a re se Andru, gbe amọfa nọ a be wozẹ iriri rai. Jesu ọ tẹ ruọ okọ Pita, ọ tẹ ta kẹe nọ o bi okọ na no okpa omojọ. Nọ a bi ruọ ame na omojọ no, Jesu ọ tẹ keria, o te muọ ogbotu nọ i kokohọ unueri na họ ewuhrẹ kpahe Uvie na.

Nọ Jesu o ku ẹme riẹ họ no, ọ tẹ ta kẹ Pita nọ: “Bi kpohọ oria udidi, re wha fi iriri rai họ ame.” Saemọn ọ tẹ ta kẹe nọ: “Owuhrẹ, aso na soso ma daoma bẹ rekọ ma kpe oware ovo ho, rekọ me ti fi iriri na họ wọhọ epanọ whọ ta na.”—Luk 5:4, 5.

Nọ a fi iriri rai họ a te kpe iyei buobu, te epanọ iriri na i ro muhọ ẹbẹre dede. Ezae nana a tẹ kpare unu se erivẹ rai nọ e rrọ okọ odekọ re a nyaze kpata kpata ti fiobọhọ kẹ ae. Ekọ ivẹ na e tẹ te vọ avọ iyei te epanọ i ro muhọ ezue. Nọ Pita ọ ruẹ onana, o te kigwẹ fihọ aro Jesu jẹ ta nọ: “Nyasiọ omẹ ba, Olori, keme mẹ yọ ọrahauzi.” Jesu ọ tẹ ta kẹe nọ: “Whọ gbẹ dhozọ họ. No enẹna vrẹ whọ te hai mu ahwo ọkpokpọ.”—Luk 5:8, 10.

Jesu ọ tẹ ta kẹ Pita avọ Andru nọ: “Wha lele omẹ, me ti ru owhai ikuori ahwo.” (Matiu 4:19) O se ikuori ivẹ efa re, Jemis avọ Jọn, emezae Zẹbẹdi. Ae omarai a te lele iei ababọ oke oraha. Imane nana a nyasiọ iruo iyei-ikpe rai ba, a te zihe ruọ ilele ọsosuọ Jesu nọ i je lele iei oke kpobi.