Nọ Jesu ọ nwani wuhrẹ ahwo kpahe erọvrẹ no evaọ obọ uwou ohwo Farisi nọ a re se Saemọn, ọ tẹ ruọ edhere bi kpobọ Galili re o mu erẹ usiuwoma ota avivẹ riẹ họ. Ukpe avọ ivẹ iruo usiuwoma ota riẹ ona, yọ orọnikọ ọye ọvo o bi kpohọ erẹ na ha. Ikọ 12 riẹ a rrọ kugbei, gbe eyae jọ nọ o “le izi imuomu no oma je siwi eyao rai.” (Luk 8:2) Ejọ rai họ, Meri Magdalini, Suzana, gbe Joana nọ ọzae riẹ ọ jẹ rẹrote eyero Herọd Antipas, ovie na.

Nọ ahwo buobu a bi yo kpahe Jesu na, a te mu eme buobu họ ẹta kpahe iruo riẹ. Oware utiona o via evaọ okenọ a rọ ọzae jọ nọ idhivẹri e jọ oma nọ o tuaro je dienu ro se Jesu, o te siwi ei. Whaọ obọnana, idhivẹri i gbe bi kpokpo ọzae nana ha, o mu ẹme họ ẹta no jẹ be ruẹ ude. Akpọ o te gbe ahwo na kpobi unu, a tẹ be ta nọ: “Kọ ogbẹrọnọ Ọmọ Devidi na ọna?”—Matiu 12:23.

Ahwo nọ a su ziọ uwou nọ Jesu ọ jọ na a bu te epanọ ọyomariẹ avọ ilele riẹ a gbẹ jẹ ruẹ uvẹ re emu hu. Rekọ, orọnikọ ahwo na kpobi a roro nọ Jesu họ “Ọmọ Devidi” nọ a ya eyaa riẹ na ha. Otu ikere-obe gbe ahwo Farisi jọ a no ugbo obọ Jerusalẹm ze, orọnikọ re a wuhrẹ mi Jesu hayo re a thae uke he. A nyaze be ta kẹ ahwo nọ: “O wo ẹzi Beelzebọb,” koyehọ “ogaga osu idhivẹri na” o bi ro ru iruo riẹ. (Mak 3:22) Nọ ẹvohẹ na o do te imoni Jesu oma, a tẹ nyaze re a kru rie kpo. Fikieme?

Whaọ, evaọ oke nana, inievo Jesu a re rọwo nọ Jesu yọ Ọmọ Ọghẹnẹ hẹ. (Jọn 7:5) U je gbe ai unu inọ Jesu nana nọ a gbẹ whẹro evaọ obọ Nazarẹt na ọye ọ be wha ẹvohẹ nana kpobi ze na. A tẹ jẹ ta nọ: “Iroro riẹ e gbẹ gba ha.”—Mak 3:21.

Kọ ẹme nọ a ta na ọ gba? Whaọ obọnana  Jesu o siwi ọzae nọ idhivẹri e jọ oma na, yọ o mu ẹme họ ẹta no jẹ be ruẹ ude. Ohwo ọvo ọ sae vro onana ha. Fikiere otu ikere-obe gbe ahwo Farisi na a tẹ be gwọlọ edhere nọ a rẹ rọ ta Jesu raha. A ta nọ: “Ogaga Beelzebọb, osu idhivẹri na oye ohwo nana o bi ro le idhivẹri no.”—Matiu 12:24.

Jesu ọ riẹ oware nọ otu ikere-obe avọ ahwo Farisi na a bi roro, fikiere ọ tẹ vuẹ ae nọ: “Uvie kpobi nọ ahwo a be jọ họre omoma rai u re kie, yọ ẹwho hayo uviuwou kpobi nọ a be jọ họre u re dikihẹ hẹ. Epọvo na re, otẹrọnọ Setan o bi le Setan no, koyehọ ọ be họre omobọ riẹ; kọ ẹvẹ uvie riẹ o sai ro dikihẹ?”—Matiu 12:25, 26.

Ẹme riẹ na ọ gba kerọ ọka. Otu Farisi na a riẹ nọ ahwo Ju jọ a re le izi igbegbe no ahwo oma. (Iruẹru Ikọ 19:13) Fikiere Jesu ọ tẹ nọ ae nọ: “Otẹrọnọ ogaga Beelzebọb me bi ro le idhivẹri no, kọ ogaga ono ahwo rai a bi ro le ai no?” Ẹme nọ Jesu ọ be ta na họ, otẹrọnọ ogaga idhivẹri o bi ro ru iruo riẹ, koyehọ ogaga utioye ahwo rai a bi ro le idhivẹri re. Kẹsena Jesu o te ru ẹme na vẹ kẹ ae nọ: “Rekọ, otẹrọnọ ẹkwoma ẹzi Ọghẹnẹ me bi ro le idhivẹri na no, kiyọ Uvie Ọghẹnẹ o ginẹ vrẹ owhai no.”—Matiu 12:27, 28.

Re Jesu o dhesẹ kẹ ae nọ izi imuomu nọ o bi le no ahwo oma na u dhesẹ nọ o wo ogaga vi Setan, ọ tẹ kẹ ae ọtadhesẹ nana inọ: “Ẹvẹ ohwo ọ sae rọ ruọ uwou ọgba ọ vẹ kwa eyero riẹ? Ajokpanọ ọ rẹ kake gba ọzae na fihọ otọ, ẹsiẹe ọ sae rọ kwa eware uwou riẹ. Ohwo kpobi nọ ọ rrọ abọ mẹ hẹ yọ o mukpahe omẹ, yọ ohwo kpobi nọ o bi kuomagbe omẹ koko ahwo họ họ, o bi le ahwo no omẹ oma.” (Matiu 12:29, 30) Avro ọ riẹ hẹ, otu ikere-obe avọ ahwo Farisi na a mukpahe Jesu, onọ u dhesẹ vevẹ nọ ae omarai yọ ikọ Setan. A bi le ahwo no Ọmọ Ọghẹnẹ oma, ọnọ Jihova o bi ro ru iruo.

Jesu ọ tẹ vẹvẹ ikọ Setan nana unu nọ: “A te rehọ oghẹrẹ eware kpobi rọvrẹ ahwo, makọ oghẹrẹ uzioraha kpobi gbe eme-aghọ kpobi nọ a ta. Rekọ ohwo kpobi nọ ọ be ta eme-aghọ mukpahe ẹzi ọfuafo na o wo erọvrẹ bẹdẹ bẹdẹ hẹ rekọ ọ reabe uzioraha ebẹdẹ bẹdẹ.” (Mak 3:28, 29) Uye u ti te ahwo nọ a be ta nọ ogaga Setan Jesu o bi ro ru eware nọ ọ be rọ ẹgba ẹzi Ọghẹnẹ ru.