Ababọ avro, eva e be were ahwo Nazarẹt. Ekapenta Jesu ọ jọ taure o te ti no ẹwho bru Jọn re ọ họe ame evaọ oware wọhọ ẹgbukpe nọ ọ vrẹ. Rekọ enẹna a riẹ Jesu fihọ ohwo nọ o bi ru iruo igbunu. Ahwo ẹwho na a bi rẹro nọ Jesu o ti ru eware igbunu jọ kẹ ae nọ o te te ẹwho.

Ahwo na a bi rri kiọkiọkiọ nọ Jesu ọ nya ruọ uwou-egagọ nọ o rrọ ẹwho na, wọhọ epaọ uruemu riẹ. Nọ a te bi ru egagọ evaọ etẹe a rẹ lẹ, a ve se abọ Ikereakere na nọ Mosis o kere, wọhọ epanọ a jẹ “hae jọ iwou-egagọ [ru] evaọ ẹdijala kpobi.” (Iruẹru Ikọ 15:21) A jẹ hai se abọ Ikereakere na nọ eruẹaro na a kere re. Nọ Jesu ọ kparoma re o se, ẹsejọhọ o vuhu ahwo buobu nọ a jẹ hae gbẹ ziọ uwou-egagọ na evaọ oke nọ u kpemu. A tẹ rọ uko-obe Aizaya ọruẹaro na kẹe. O te rovie kpohọ oria nọ o ta kpahe Ọnọ Jihova ọ rọ ẹzi riẹ wholo, yọ ma rẹ jọ obe Aizaya 61:1, 2 duku eme nọ o se na nẹnẹ.

Jesu o se kpahe epanọ Ọnọ a ruẹaro kpahe na o ti ro whowho usi obusino kẹ enọ e rrọ igbo gbe ude-oruẹ kẹ enọ i tuaro, o ve je whowho oke nọ a ti ro wo ọjẹrehọ Jihova. Jesu ọ tẹ rọ uko-obe na kẹ ọnọ ọ rẹ rẹrote ebe na, ọ tẹ keria. Ahwo na kpobi a tẹ tẹrovi ei. Kẹsena o te mu ẹme họ ẹta kẹ ahwo na, yọ ẹsejọhọ ọ ta eme buobu kẹ ae. Usu eme jọ nọ ọ ta họ ọnana nọ o wuzou gaga na, inọ: “Ikere nana nọ wha yo na i rugba nẹnẹ.”—Luk 4:21.

Akpọ o gbe ahwo na unu fiki “eme iwoma nọ i bi no unu riẹ ze.” A tẹ be ta kẹ ohwohwo nọ: “Nọ ọmọ Josẹf, o gbẹ rrọ ere?” Rekọ nọ Jesu ọ ruẹ nọ a gwọlọ nọ o ru oghẹrẹ iruo igbunu nọ a yo nọ o ru evaọ ewho efa na, ọ tẹ ta kẹ ae nọ: “Wha te siọ ẹme nana ba ẹta kpahe omẹ hẹ inọ, ‘Edọkita, siwi omara. Jọ ẹwho ra ru eware nọ ma yo nọ whọ jọ obọ Kapaniọm ru na.’” (Luk 4:22, 23) U muẹro nọ ahwo na a je roro nọ ẹwho riẹ u fo nọ ọ rẹ jọ kaki ru iruo igbunu na ro fiobọhọ kẹ ahwo riẹ orọnikọ ewho efa ha. Fikiere a sai roro nọ Jesu o ru rai oja.

Nọ Jesu o muẹrohọ oware nọ o rrọ ae eva, ọ tẹ fodẹ eware jọ nọ e via oke anwae evaọ Izrẹl. Ọ vuẹ rai nọ eyae-uku buobu e jọ Izrẹl evaọ oke Elaeja, rekọ a vi Elaeja bru ọvuọvo evaọ usu rai hi. Ukpoye, Ọghẹnẹ o vi rie bru aye-uku jọ nọ ọ rrọ ohwo Izrẹl he evaọ obọ Zarẹfat, ẹwho nọ ọ kẹle Saedọn, etẹe ọ jọ ru iruo igbunu nọ o ro siwi uzuazọ ahwo. (1 Ivie 17:8-16) Yọ evaọ oke Elaesha, emoti buobu e jọ Izrẹl, rekọ ọruaro na o siwi ọvuọvo ho ajokpaọ Neaman ohwo Siria na ọvo.—2 Ivie 5:1, 8-14.

Ẹvẹ iku nana nọ Jesu o gbe kẹ ahwo ẹwho riẹ ro dhesẹ kẹ ae nọ a wo oriobọ jẹ kare ẹrọwọ na o jarae oma? Eva e dha ahwo nọ a jọ uwou-egagọ na te epanọ a rọ sakpama, họrọ mu Jesu, je si ei kpohọ otafe ẹwho na. A rehọ e riẹ kpohọ ẹroro ugbehru nọ a bọ Nazarẹt fihọ, re a gele iei no etẹe fihọ otọ. Rekọ Jesu ọ dhẹ vabọ. Ọ tẹ ruọ edhere bi kpobọ Kapaniọm, nọ o rrọ obọze ukiediwo-ọre Abade Galili.