Jesu o ru eware buobu no evaọ ẹdẹ nana. Nọ a bi okọ no ẹkwotọ Dẹkapọlis ze no, o te siwi aye jọ nọ o je hwẹ azẹ jẹ kpare ọmọtẹ Jairọs no uwhu ze. Rekọ o ru eware efa. Nọ Jesu ọ nwani no uwou Jairọs no, ezae ivẹ jọ nọ i tuaro i te bi lele iei, je bi bo nọ: “Jọ ohrọ mai o re owhẹ, Ọmọ Devidi.”—Matiu 9:27.

“Ọmọ Devidi” nọ ezae nana a se Jesu na u dhesẹ nọ a rọwo nọ Jesu họ Mesaya na, ọnọ ọ te keria agbara-uvie Devidi. Jesu ọ jẹ kake kpọ ae unu hu, ẹsejọhọ re ọ riẹ sọ a te ruabọhọ ayare rai na, yọ ere a gine ru. Nọ Jesu ọ ruọ uwou jọ, ezae ivẹ na a te lele iei ruọ uwou na. Jesu ọ tẹ nọ ae nọ: “Kọ wha wo ẹrọwọ nọ mẹ sai ru onana?” A tẹ ta avọ imuẹro nọ: “Ee, Olori.” Kẹsena Jesu ọ tẹ rọ obọ te ibiaro rai, ọ tẹ ta nọ: “Jọ o via kẹ owhai epaọ ẹrọwọ rai.”—Matiu 9:28, 29.

Ẹsiẹvo na, a te mu ude họ ẹruẹ. Wọhọ epanọ Jesu o re ru vẹre na, ọ tẹ ta kẹ ae nọ a vuẹ ohwo ọvo kpahe oware nọ o ru na ha. Rekọ fiki oghọghọ nọ o da rai oma fia, a te whowho usi na te oria kpobi.

Nọ ezae ivẹ nana a be nyavrẹ na, ahwo a tẹ rọ ọzae jọ nọ o dienu nọ ẹzi ogbegbe ọ rrọ oma se Jesu. Jesu o te le ẹzi ogbegbe na noi oma, ọzae na o te mu ẹme họ ẹta. Akpọ o te gbe ogbotu na unu, a tẹ be ta nọ: “A re ruẹ oware utiona evaọ Izrẹl vievie he.” Otu Farisi a jọ etẹe re. A rẹ sae vro vievie he inọ eware enana e via ha, fikiere a tẹ be ta Jesu raha, inọ: “Ogaga osu idhivẹri na o bi ro le idhivẹri na no.”—Matiu 9:33, 34.

Nọ oyena o nwane vrẹ no, Jesu ọ tẹ ruọ edhere bi kpobọ Nazarẹt ẹwho riẹ, yọ ilele riẹ a rrọ kugbei. Evaọ oware wọhọ ẹgbukpe nọ u kpemu, ọ jọ uwou-egagọ nọ o rrọ Nazarẹt wuhrẹ ahwo. Nọ o mu ai họ ewuhrẹ obọ, akpọ o je gbe ai unu, rekọ uwhremu na eva e tẹ dha ae fiki oware jọ nọ o wuhrẹ i rai, a tẹ jẹ gwọlọ nọ a re kpei no. Whaọ, Jesu ọ be wariẹ zihe re ọ daoma fiobọhọ kẹ ahwo ẹwho riẹ na.

Evaọ Ẹdijala, o te zihe kpobọ uwou-egagọ na re o wuhrẹ ahwo. Akpọ o gbe ahwo buobu nọ a jẹ gaviezọ kẹe unu, a tẹ be nọ inọ: “Diẹse ọzae nana o jo wo areghẹ nana gbe ogaga nọ o bi ro ru iruo igbunu enana?” A tẹ jẹ be ta nọ: “Kọ ogbẹrọnọ ọmọ ekapenta na ọna? Kọ oni riẹ a re se Meri, inievo riẹ kọ Jemis gbe Josẹf gbe Saemọn gbe Judas? Yọ inievo-emetẹ riẹ, aikpobi a rrọ kugbe omai na? Kọ diẹse o jo wo areghẹ gbe ogaga nana kpobi?”—Matiu 13:54-56.

Ahwo na a je roro nọ Jesu yọ ohwo gheghe. A jẹ jọ eva rai ta nọ, ‘Iraro mai ọ jọ whẹro na, kọ ẹvẹ ọ sae rọ jọ Mesaya na?’ Fikiere, ghelọ eware igbunu buobu nọ Jesu o je ru gbe areghẹ ologbo riẹ na, ahwo na a se riẹ. Fikinọ a riẹ Jesu te uwou, makọ ahwo uviuwou riẹ dede a je rri rie epọvo na, onọ o soriẹ nọ Jesu ọ rọ ta nọ: “Ọruẹaro o re wo ọghọ evaọ oria kpobi ajokpaọ evaọ ẹwho riẹ gbe uwou riẹ.”—Matiu 13:57.

Evaọ uzẹme, u gbe Jesu unu gaga inọ a kare ẹrọwọ. Fikiere ọ gbẹ jọ etẹe ru iruo igbunu evuevo ho, “ajokpaọ obọ nọ ọ rọ kpahe umutho ahwo jọ nọ a jẹ mọ o te siwi ae.”—Mak 6:5, 6.