Jesu o zizie ilele ene re a jọ ikuori ahwo, yọ edẹ rai họ Pita, Andru, Jemis, gbe Jọn. Whaọ evaọ ẹdijala, aikpobi a te kpohọ uwou-egagọ obọ Kapaniọm. Jesu o te je wuhrẹ evaọ etẹe, yọ oghẹrẹ nọ o je ro wuhrẹ ahwo na u je gbe ai unu wọhọ epanọ o jọ evaọ obọ Nazarẹt. Ọ jẹ ta ẹme avọ udu, orọnikọ o je wuhrẹ ai wọhọ otu ikere-obe rai hi.

Evaọ ẹdẹ nana nọ ọ jọ Ẹdijala na, ọzae jọ nọ o wo ẹzi ogbegbe ọ jọ etẹe re. Nọ a rrọ eva uwou-egagọ na, ọzae na o te bo nọ: “Eme ma wo kugbe owhẹ, whẹ Jesu ohwo Nazarẹt? Kọ whọ nyaze te raha omai no? Mẹ riẹ ohwo nọ whọ rrọ dẹẹ, Ọrẹri Ọghẹnẹ!” Jesu ọ tẹ whọku ẹzi ogbegbe na, inọ: “Fibo, je noi oma ze!”—Mak 1:24, 25.

Ẹsiẹvo na, ẹzi ogbegbe na o te gele ọzae na kie, o te bi kie ewawa je bi bo gaga. Ẹzi ogbegbe na o te noi oma “ababọ oma nọ ọ nwa riẹ.” (Luk 4:35) Akpọ o te gbe ahwo nọ a wariẹ e riẹ họ evaọ uwou-egagọ na unu gaga. A tẹ be ta kẹ ohwohwo nọ: “Kinọ ojọ? . . . Ọ be tubẹ ta họ izi igbegbe obọ dede, yọ a bi yoẹme kẹe.” (Mak 1:27) Agbẹta nọ usi nana u ro do ruọ oria kpobi evaọ ubrotọ Galili na.

Nọ Jesu avọ ilele riẹ a no uwou-egagọ na, a te kpobọ uwou Saemọn, ọnọ a re se Pita re. Nọ a te obei, a tẹ ruẹ oni-aye Pita nọ ifiva egaga i kru. A tẹ lẹ Jesu nọ o siwi ei. Jesu ọ tẹ nya tei oma, o te kru rie obọ kpama. Ẹyao na ọ tẹ nwani noi oma no, ọ tẹ be gbodibo kẹ Jesu avọ ilele riẹ, ẹsejọhọ o je there emu nọ a rẹ re.

Nọ oke u muhọ ekpo no, ahwo buobu a te bi no eria sa-sa ziọ uwou Pita, be rehọ ahwo rai nọ e be mọ ze. U kri hi, o tẹ wọhọ nọ ẹwho na soso o kokohọ aro uwou Pita. Fikieme? A gwọlọ usiwo. Evaọ uzẹme, “ahwo kpobi a tẹ rehọ ahwo rai nọ a be mọ oghoghẹrẹ eyao ro sei. Ọ tẹ rọ abọ kpahe ae omomọvo, o te siwi ae.” (Luk 4:40) Jesu o siwi oghẹrẹ ẹyao kpobi nọ ahwo na a wo, wọhọ epanọ a ruẹaro riẹ. (Aizaya 53:4) O tube le izi igbegbe no ahwo oma. Nọ idhivẹri i bi no ahwo na oma na, yọ i bi bo nọ: “Whẹ họ Ọmọ Ọghẹnẹ.” (Luk 4:41) Rekọ Jesu ọ whọku ai, yọ ọ jẹ kẹ ae uvẹ ta ẹme he. A riẹ nọ Jesu họ Kristi na, yọ Jesu ọ gwọlọ nọ idhivẹri na a ru wọhọ ẹsenọ a be gọ Ọghẹnẹ uzẹme na ha.