Nọ Jesu avọ ilele ene riẹ a be jọ “iwou-egagọ rai ta usi uwoma evaọ ẹkwotọ Galili soso” na, usi eware igbunu nọ Jesu o bi ru u te do ruọ oria kpobi. (Mak 1:39) Usi iruo igbunu riẹ u te ti do te ọmoti jọ oma evaọ obọ ẹwho riẹ. Luk nọ ọ rrọ edọkita ọ ta nọ “oti ọ vọ [ọzae na] oma.” (Luk 5:12) Nọ ẹyao oyoma nana ọ tẹ rrọ ohwo oma kri no, o re bru abọ oma na sa-sa no.

Fikiere a rẹ ruẹ unu gbiku edada nọ e rrọ ọmoti na oma ha, yọ Uzi na o ta nọ ọ rẹ rria kugbe ahwo ho. U te no ere no, ọ tẹ ruẹ ohwo nọ ọ be nya bru rie o re bo nọ “ọnọ ọ fo ho, ọnọ ọ fo ho,” re ohwo na ọ gbẹ nya kẹle iẹe he keme ẹyao na o re vo. (Iruo-Izerẹ 13:45, 46) Kọ eme ọmoti nana o ru? Ọ nya bru Jesu je kie fihọ aro riẹ be lẹe nọ: “Olori, o tẹ ruọ owhẹ, whọ sai ru omẹ fo.”—Matiu 8:2.

Ọzae nana o gine fi ẹrọwọ họ Jesu. Dai roro epanọ ẹyao nana o gboja kẹe te no. Kọ eme Jesu o ti ru? O hae jọnọ whọ rrọ etẹe, eme whọ hai ti ru? Ohrọ ọzae na o re Jesu, fikiere Jesu ọ tẹ rọ obọ tei jẹ ta kẹe nọ: “O ruọ omẹ! Jọ oma ra o fo.” (Matiu 8:3) Ẹyao oti nọ ọ rrọ ọzae na oma na ọ tẹ nwani kpo, dede nọ o sae jọ bẹbẹ kẹ ahwo buobu re a rọwo oware nana nọ o via na.

Kọ ẹvẹ o rẹ jọ owhẹ oma nọ who te wo ovie nọ o wo ohrọ-oriọ gbe ogaga wọhọ Jesu? Oware nọ Jesu o ru kẹ ọmoti na o kẹ omai imuẹro nọ okenọ Jesu o ti su akpọ na soso, eruẹaruẹ Ebaibol nana i ti rugba, inọ: “Ọ be re ohrọ eyẹlẹ gbe iruori, o te bi siwi uzuazọ iruori.” (Olezi 72:13) Ẹhẹ, Jesu o ti fiobọhọ kẹ enọ e be ruẹ uye kpobi, oye họ oware nọ ọ gwọlọ ru.

Kareghẹhọ nọ taure Jesu o te ti siwi ọmoti nana, iruo odibọgba riẹ e be were ahwo na no vẹre. Obọnana, ahwo a ti je yo kpahe oware igbunu nana nọ o ru na. Rekọ Jesu ọ gwọlọ nọ ahwo a fi ẹrọwọ họ iẹe fiki iku nọ a yo ọvo ho. Ọ riẹ nọ eruẹaruẹ Aizaya e ta nọ, ‘o re ti ru re a yo urru riẹ evaọ osuore he,’ koyehọ re ahwo a koyẹ kẹe. (Aizaya 42:1, 2) Fikiere Jesu ọ tẹ vẹvẹ ọmoti na unu nọ: “Ruẹ nọ whọ vuẹ ohwo ọvo ho, rekọ nyai dhesẹ oma ra kẹ ozerẹ na, re who dhe idhe wọhọ epanọ Uzi Mosis o ta.”—Matiu 8:4.

Wọhọ epanọ o rẹ jọ ohwo kpobi oma na, eva nọ e be were ọzae na e ga te epanọ ọ gbẹ sae rọ ko oware na dhere he. Ọ be nyavrẹ na yọ o bi whowho usi na evaọ eria kpobi. Onana u te ru nọ ahwo kpobi a jẹ rọ gwọlọ nọ a rẹ ruẹ Jesu. U tube te epanọ Jesu ọ jẹ hae rọ lẹlẹ nya ruọ ẹwho, yọ evaọ omoke jọ dede, ọ jẹ hae jọ oria nọ ohwo ọvo ọ rrọ họ. Ghele na, ahwo a jẹ hai no eria sa-sa ze re o wuhrẹ ae je siwi eyao rai.