Jesu ọ kẹ ikọ riẹ emamọ ithubro kpahe epanọ a rẹ rọ ta usiuwoma nọ o bi vi ai vrẹ imimava na. Rekọ, oware nọ o ru oye ọvo ho. Ọ vẹvẹ e rai unu kpahe ahwo ọwọsuọ, inọ: “Rri! Me bi vi owhai wọhọ igodẹ evaọ udevie ijera; . . . Wha yọroma kẹ ahwo, keme a rẹ te rehọ owhai kpobọ ekọto rai jẹ te fa owhai eviaviẹ evaọ iwou-egagọ rai. A rẹ te rehọ owhai kpohọ aro eba gbe ivie fiki mẹ.”—Matiu 10:16-18.

Avro ọ riẹ hẹ, ilele Jesu a te nyaku ukpokpoma, rekọ Jesu ọ ya eyaa kẹ ae nọ: “Nọ a tẹ rehọ owhai nya, wha du ruawa ẹme nọ wha rẹ ta gbe epanọ wha te rọ tae he, keme a te kẹ owhai ẹme nọ wha te ta evaọ auwa yena; keme orọnikọ whai họ enọ e be ta ẹme na ha, rekọ ẹzi Ọsẹ rai ọ be rọ owhai ta ẹme na.” Jesu ọ ta haro nọ: “Oniọvo o re ti vivie oniọvo riẹ re a kpei, ọsẹ o ti vivie ọmọ riẹ, emọ e te wọso esẹgbini rai, je vivie ai re a kpe ai. Ahwo kpobi a ti mukpahe owhai fiki odẹ mẹ, rekọ ọnọ o thihakọ te urere a ti siwi ei.”—Matiu 10:19-22.

Fikinọ iruo usiuwoma ota na i wuzou vi oware ofa kpobi, Jesu ọ ta kẹ ilele riẹ nọ a re wo areghẹ re a sai ru iruo nana gba. Ọ ta nọ: “A te kpokpo owhai evaọ ẹwho jọ, wha dhẹ kpohọ ọfa; keme uzẹme mẹ be ta kẹ owhai, wha te sae ta usi uwoma na nya ẹkwotọ Izrẹl soso re vievie he bẹsenọ Ọmọ ohwo ọ rẹ te nyaze.”—Matiu 10:23.

Ithubro, unuovẹvẹ, gbe uduotahawọ nọ Jesu ọ kẹ ikọ 12 riẹ na i kiehọ kẹhẹ. Orọnikọ ikọ na ọvo ọ ta eme nana kẹ hẹ, rekọ ohwo kpobi nọ ọ te ta usiuwoma na nọ Jesu o te whu jẹ kparoma no. Ma riẹ ere keme ọ ta nọ “ahwo kpobi a ti mukpahe” ilele riẹ, koyehọ orọnọ oke ikọ na ọvo ho rekọ rite oke mai na. U te no ere, ma jọ oria ovo se nọ a rehọ ikọ na kpohọ aro eba gbe ivie evaọ etoke ọkpẹkpẹe nọ a rọ ta usiuwoma evaọ Galili na ha, yọ ahwo uviuwou rai a vivie i rai re a kpe ai gbe he.

O rrọ vevẹ nọ eware nọ Jesu ọ jẹ ta kẹ ikọ na yọ eware nọ e te via evaọ obaro. Kareghẹhọ nọ Jesu ọ ta nọ ilele riẹ a te sae ta usi uwoma na nya ẹkwotọ Izrẹl soso re he, “bẹsenọ Ọmọ ohwo ọ rẹ te nyaze.” Ẹme nọ Jesu ọ be ta na họ ilele riẹ a te sae ta usiuwoma Uvie na te eria kpobi hi, taure Jesu Kristi nọ ọ rrọ Ovie na ọ tẹ te nyaze wọhọ oguẹdhọ nọ Ọghẹnẹ o ro mu.

Nọ ikọ na a be ta usiuwoma na, a bi rẹro nọ ukpokpoma u ti te ai, keme Jesu ọ ta nọ: “Olele  ọ rro vi owuhrẹ riẹ hẹ, yọ ọrigbo ọ rro vi olori riẹ hẹ.” Ẹme Jesu na ọ rrọ vevẹ. Ahwo a wọso ẹe je kpokpo iei nọ ọ jẹ ta usiuwoma Uvie Ọghẹnẹ, yọ ere a ti ru ilele riẹ re. Rekọ ọ kẹ rai uduotahawọ nọ: “Wha dhozọ enọ i re kpe ugboma na ha, nọ e rẹ sae raha uzuazọ họ; ukpoye wha dhozọ ọnọ ọ rẹ sae raha uzuazọ gbe ugboma evaọ Gehena.”—Matiu 10:24, 28.

Jesu o fi oriruo nana họ otọ. O thihakọ bẹsenọ o ro whu, viukpenọ o re kie no abọ Jihova, ọnọ o wo ogaga kpobi na. Ọghẹnẹ Erumeru na họ ọnọ o wo ogaga nọ ọ rẹ rọ raha “uzuazọ” (koyehọ ọraha ababọ ẹkparomatha), gbe ogaga nọ ọ rẹ rọ kpare ohwo na ze re ọ reawere uzuazọ ebẹdẹ bẹdẹ. Avro ọ riẹ hẹ, eme nana e kẹ ikọ na omosasọ ulogbo.

Jesu ọ rọ ọtadhesẹ ta kẹ ilele riẹ kpahe epanọ Ọghẹnẹ o you rai te, inọ: “Ubiugho osese a be hae zẹ imuedi ivẹ, o gbẹ rrọ ere? Ghele na, ọvuọvo rai o re kie fihọ otọ ababọ Ọsẹ rai nọ ọ rẹ riẹ hẹ. . . . Fikiere, ozọ u mu owhai hi; wha ghare vi imuedi buobu.”—Matiu 10:29, 31.

Ovuẹ nọ ilele Jesu a bi whowho na o te whae ze nọ ahwo a te rọ hẹriẹ oma, ejọ e te jẹe rehọ, efa e vẹ se iẹe. Jesu ọ ta nọ: “Wha du roro ho inọ mẹ nyaze ti fi udhedhẹ họ otọakpọ na.” Ẹhẹ, o gwọlọ udu re ohwo ọ sae jẹ uzẹme Ebaibol rehọ. Jesu ọ ta haro nọ: “Ohwo kpobi nọ o you ọsẹ hayo oni riẹ vi omẹ o te ọnọ ọ rẹ jọ olele mẹ hẹ; yọ ohwo kpobi nọ o you ọmọzae hayo ọmọtẹ riẹ vi omẹ o te ọnọ ọ rẹ jọ olele mẹ hẹ.”—Matiu 10:34, 37.

Ghele na, ahwo jọ a ti dede ilele na rehọ. Jesu ọ ta nọ: “Ohwo kpobi nọ ọ kẹ ọjọ evaọ usu esese nana makọ egho ame odhedhẹ fikinọ olele mẹ ọ rrọ, uzẹme mẹ be ta kẹ owhai, o ti wo osohwa riẹ.”—Matiu 10:42.

Nọ Jesu ọ kẹ ikọ riẹ ithubro, unuovẹvẹ, gbe uduotahawọ no, a tẹ “nya ẹkwotọ na duwu no iwhre ruọ iwhre, bi whowho usi uwoma na je bi siwi ahwo evaọ oria kpobi.”—Luk 9:6..