Nọ Jesu o no oria nọ ọ jọ rẹriẹ na ze je siwi ọmọzae nọ ẹzi ogbegbe ọ jọ oma na no evaọ ubrotọ Sisaria Filipai, o te bi kpobọ Kapaniọm. Ọyomariẹ avọ ilele riẹ ọvo a jọ usu, re ogbotu na a gbẹ “riẹ kpahe iẹe he.” (Mak 9:30) Onana o kẹ riẹ uvẹ nọ ọ be rọ wariẹ vuẹ ilele riẹ kpahe uwhu riẹ, jẹ ruẹrẹ ae họ kẹ iruo nọ a ti ru nọ o te whu no. Ọ ta kẹ ae nọ: “A ti vivie Ọmọ ohwo họ obọ ahwo, a ve ti kpei, ẹdẹ avọ esa ọ vẹ kparoma ze.”—Matiu 17:22, 23.

Orọnikọ onana họ orọ ọsosuọ nọ Jesu ọ be rọ vuẹ ae ẹme nana ha. Jesu ọ vuẹ rai no vẹre inọ a ti kpei, dede nọ Pita ọ rọwo nọ oyena o te via ha. (Matiu 16:21, 22) Yọ okenọ Jesu ọ rẹriẹ, ikọ esa riẹ a jọ etẹe, a te je yo eme nọ a jẹ ta kpahe “ezihe vrẹ” Jesu. (Luk 9:31) Fiki ẹme uwhu riẹ nọ Jesu ọ ta kẹ ilele riẹ na, “uweri ogaga o tẹ jarai oma,” dede nọ a nwani wo otoriẹ ẹme nọ ọ be ta na ha. (Matiu 17:23) Ghele na, a be sae nọe re o ru ẹme na vẹ kẹ ai hi fiki ozọ.

Kẹsena a te ti te Kapaniọm, oria nọ Jesu ọ be mae jọ ru iruo riẹ, o tẹ jẹ rrọ ẹwho nọ ikọ na buobu a no ze. Nọ a te etẹe, ezae nọ i re mi osa-uzou etẹmpol na a tẹ nya bru Pita ze. Ẹsejọhọ fikinọ a be gwọlọ oware nọ a re ro kru Jesu inọ ọ rẹ hwa osa-uzou hu, a tẹ nọ Pita nọ: “Kọ owuhrẹ rai ọ rẹ hwa osa-uzou ibiugho edrakma ivẹ na?”—Matiu 17:24.

Pita ọ tẹ kuyo nọ: “Ee.” Nọ a jọ eva uwou, yọ Jesu ọ riẹ oware nọ o via na no. Fikiere o du hẹrẹ re Pita o mu ẹme na họ họ, ọ tẹ nọe nọ: “Saemọn, ẹvẹ who roro? Amono ivie akpọ na i re mi azọhọ hayo osa-uzou? Emọ rai manikọ erara?” Pita ọ tẹ kẹe uyo nọ: “Erara.” Jesu ọ tẹ ta kẹe nọ: “Koyehọ, emọ na e rẹ hwa osa-uzou ho.”—Matiu 17:25, 26.

Ọsẹ Jesu họ Ovie ehrugbakpọ na, yọ Ọye a be jọ etẹmpol na gọ. Fikiere, u fo ho re Ọmọ Ọghẹnẹ ọ hwa osa-uzou etẹmpol na. Jesu ọ tẹ ta nọ: “Rekọ re ma siọ ae ba eru zoruẹ, kpobọ abade, who fi oghọlọ họ ame, whọ vẹ rehọ eri ọsosuọ nọ o ti mu, who te rovie unu riẹ whọ te ruẹ ubiugho isiliva. Rehọ iẹe kẹ ae rọ hwa osa-uzou mẹ avọ ọra.”—Matiu 17:27.

U kri hi, ilele na kpobi a te kokohọ, a gwọlọ nọ Jesu kpahe ohwo nọ ọ te jọ ọnọ ọ mae rro evaọ Uvie na. Kẹle na, ozọ o jarae nọ Jesu kpahe uwhu riẹ hẹ, rekọ obọnana a be te nọe kpahe oghẹrẹ nọ uzuazọ rai o te jọ evaọ obaro. Jesu ọ riẹ oware nọ o rrọ ae eva. A be jọ emu Jesu vravro oware jọ anwọ ẹsiẹ nọ a rrọ edhere bi kpobọ Kapaniọm na. Fikiere Jesu ọ tẹ nọ ae nọ: “Eme wha jẹ vravro kpahe eva edhere?” (Mak 9:33) A sae kpahe ẹme ọvo ho fiki omovuọ, keme a jẹ vravro kpahe ohwo nọ ọ mae rro. Kẹsena ikọ na a tẹ nọ Jesu onọ nọ o rrọ ae eva anwẹsiẹ na, inọ: “Ono ọ ginẹ mae rro evaọ Uvie odhiwu?”—Matiu 18:1.

U gbunu kẹhẹ inọ ilele na a rẹ gbẹ vravro otiọye evaọ oke nana nọ a ruẹ uruemu Jesu je yo ẹme riẹ te enwenọ ikpe esa no na. Rekọ a gba ha. Yọ a whẹro evaọ oria nọ ahwo nọ a se omarai eg’Ọghẹnẹ a rẹ jọ gwọlọ ọkwa gbe okpodẹ. U te no ere no, kẹle na Jesu ọ ya eyaa kẹ Pita nọ ọ te kẹe “isiavẹ” Uvie na. Kọ o sae jọnọ onana u ru rie bi roro nọ o kpehru vi ikọ edekọ? Ẹsejọhọ Jemis avọ Jọn a bi roro epọvo na keme a jọ etẹe okenọ Jesu ọ rẹriẹ.

Oghẹrẹ kpobi nọ o rrọ kẹhẹ, Jesu ọ kpọ iroro  rai vi. O se ọmọ jọ, ọ tẹ rehọ iẹe dikihẹ udevie rai, jẹ vuẹ ilele riẹ nọ: “Uzẹme mẹ be ta kẹ owhai, ajokpanọ wha re nwene re wha jọ wọhọ emaha, o gbẹ rrọ ere he, wha sae ruọ Uvie odhiwu vievie he. Fikiere, ohwo kpobi nọ ọ rẹ romakpotọ wọhọ ọmaha nana họ ọnọ ọ mae rro evaọ Uvie odhiwu; yọ ohwo kpobi nọ o dede ọmaha otiọna rehọ fiki odẹ mẹ o dede omẹ rehọ re.”—Matiu 18:3-5.

A rẹ ruẹ obọ edhere nana nọ Jesu o ro wuhrẹ ai na ha. O muofu kẹ ilele na ha, yọ o se rai ahwo nọ a wo uvou uthethei nọ e be gwọlọ okpodẹ hẹ. Ukpoye, ọ rehọ oware nọ a sae kareghẹhọ wuhrẹ ai. Emaha a wo okpodẹ hayo ọkwa ha. Fikiere Jesu o bi wuhrẹ ilele riẹ nọ u fo nọ a re rri omarai epọvo na re. Kẹsena Jesu o te ku ẹme na họ kẹ ilele riẹ nọ: “Ohwo nọ o ru omariẹ wọhọ ọnọ ọ mae kawo evaọ udevie rai kpobi họ ọnọ ọ rrọ ruaro.”—Luk 9:48.