Odẹ Jesu u bi do gaga anwọ okenọ ọ rọ họ-ame na. Ahwo Ju buobu a ruẹ iruo igbunu nọ o ru no, yọ usi eware nọ o bi ru u do ruọ oria kpobi no. Obọnana nọ ahwo a ziọ Jerusalẹm rọkẹ Ehaa Iwou-Udhu (hayo Iwou-Owhre) na, a be gwọlọ Jesu.

Ahwo a be ta eme sa-sa kpahe Jesu. Ejọ e be ta nọ: “Emamọ ohwo ọ rrọ.” Efa nọ: “Emamọ ohwo ọ rrọ họ. O bi su ogbotu na thọ.” (Jọn 7:12) Obọ emuhọ ehaa na ahwo a jẹ rọ ta eme nana. Rekọ ohwo ọvo ọ gbaudu thọ othọ Jesu hu, keme ozọ isu egagọ ahwo Ju na u bi mu ai.

Nọ ehaa na e be nyaharo na, Jesu ọ tẹ romavia evaọ etẹmpol na. Oghẹrẹ onaa nọ o je ro wuhrẹ u gbe ibuobu unu. O kpohọ isukulu ikpehru ahwo Ju hu, fikiere u te bi gbe ahwo na unu nọ: “Ẹvẹ ọzae nana ọ sae rọ riẹ Ikereakere na te enẹ kpakiyọ o kpohọ isukulu egagọ mai hi?”—Jọn 7:15.

Jesu ọ tẹ ta kẹ ae nọ: “Eware nọ me bi wuhrẹ emẹ hẹ, rekọ erọ ọnọ o vi omẹ ze. Ohwo jọ ọ tẹ gwọlọ ru oreva Ọghẹnẹ, ọ te riẹ sọ obọ Ọghẹnẹ eware nọ me bi wuhrẹ na i no ze hayo orọ obọmẹ mẹ be ta.” (Jọn 7:16, 17) Eware nọ Jesu o bi wuhrẹ e rọwokugbe Uzi Ọghẹnẹ, fikiere o rrọ vevẹ nọ Ọghẹnẹ họ ọnọ Jesu ọ gwọlọ rọ orro kẹ orọnikọ omobọ riẹ hẹ.

Kẹsena Jesu ọ tẹ ta nọ: “Mosis ọ kẹ owhai Uzi na, o gbẹ rrọ ere? Rekọ whai ọvuọvo o bi koko Uzi na ha. Fikieme wha be rọ gwọlọ omẹ kpe?” Ejọ evaọ udevie ogbotu na, ẹsejọhọ erara nọ i no ewho efa ze na, e riẹ onahona ha. U bi gbe ai unu oware nọ ohwo jọ ọ rẹ rọ gwọlọ kpe emamọ owuhrẹ otiọna. Fikiere, ogbotu na a te bi roro nọ oware jọ o thọ kugbe Jesu nọ ọ be rọ ta oghẹrẹ eme itieye. A tẹ ta kẹe nọ: “Idhivẹri ọ rrọ owhẹ oma. Ono ọ be gwọlọ owhẹ kpe?”—Jọn 7:19, 20.

Evaọ ẹgbukpe gbe emerae ezeza nọ i kpemu, isu egagọ ahwo Ju a jẹ gwọlọ kpe Jesu nọ o siwi ọzae jọ evaọ Ẹdijala. Jesu ọ tẹ ta ẹme areghẹ jọ ro dhesẹ epanọ oware nọ a bi roro na o thọ te. Ọ kareghẹhọ ae nọ evaọ otọ Uzi na, a rẹ yawo ọmọzae nọ ọ tẹ gba edẹ eree no dede nọ ẹdẹ yena o kiehọ Ẹdijala. Kẹsena ọ tẹ nọ ae nọ: “Otẹrọnọ re a siọ Uzi Mosis ba ẹraha, a rẹ sae yawo ohwo evaọ ẹdijala, kọ wha be dheva kẹ omẹ fikinọ me siwi ohwo nọ ọ be mọ evaọ ẹdijala? Wha gbẹ rọ eware okafe gheghe ro bruoziẹ hẹ, rekọ wha bruoziẹ okiẹrẹe.”—Jọn 7:23, 24.

Ahwo nọ a be rria Jerusalẹm nọ a riẹ oware nọ o be via a tẹ ta nọ: “Kọ ogbẹrọnọ ọzae nọ [isu na] a be gwọlọ kpe na ọna? Rekọ, rri! ọ be jọ ẹgbede ta ẹme, yọ a be kpọe unu hu. Kọ o sae jọnọ isu na a vuhumu no inọ ọye họ Kristi na?” Kọ fikieme ahwo na a gbẹ rọwo nọ Jesu họ Kristi na ha? A ta nọ: “Ma riẹ oria nọ ọzae nana o no ze; rekọ nọ Kristi na ọ te nyaze, ohwo ọvo ọ te riẹ oria nọ o no ze he.”—Jọn 7:25-27.

Jesu ọ tẹ nwane kpahe fihọ ẹme rai na evaọ etẹmpol na nọ: “Wha riẹ omẹ wha tẹ jẹ riẹ oria nọ me no ze. Yọ udu obọmẹ mẹ rọ nyaze he, rekọ Ọnọ o vi omẹ ze ọ ginẹ rrọ, yọ wha riẹ riẹ hẹ. Mẹ riẹ riẹ, keme mẹ yọ ọtota riẹ, Ọye o vi omẹ ze.” (Jọn 7:28, 29) Nọ a yo eme Jesu nana, a tẹ be gwọlọ epanọ a re ro kru rie re a fi ei họ uwou-odi hayo re a kpei no. Rekọ a sai kru rie he keme oke nọ Jesu o re ro whu u ri te he.

Rekọ ahwo buobu a fi ẹrọwọ họ Jesu, wọhọ epanọ u fo nọ a re ru. Jesu ọ nya evaọ ehru  ame, o ru ẹkporo serihọ, ọ rọ edhere igbunu rọ umutho ebrẹdi gbe imiyei ko idu ahwo buobu, o siwi enọ e jẹ mọ, o ru enọ e ko nya, o rovie aro ahwo nọ i tuaro, o siwi emoti, jẹ tubẹ kpare enọ i whu no. Agbẹta nọ a rọ nọ inọ: “Nọ Kristi na ọ tẹ ze, kọ o ti ru eware igbunu nọ i vi erọ ọzae nana?”—Jọn 7:31.

Nọ otu Farisi a yo eme nana nọ ogbotu na a be ta, te ai te ilori izerẹ na a te vi elakpa nyai mu Jesu.