Ẹwho nọ a re se Bẹtani ọ rrọ ofẹ ovatha-ọre Ugbehru Olivi yọ o rehọ emaele ivẹ thabọ no Jerusalẹm. (Jọn 11:18) Jesu o kpohọ ẹwho yena, o te weze kpohọ uwou inievo ivẹ jọ nọ a re se Mata avọ Meri. Te ai te oniọvo-ọmọzae rai nọ a re se Lazarọs yọ egbẹnyusu Jesu, aimasa na a dede Jesu rehọ.

Ọghọ riẹ ọ rro kẹhẹ inọ Mesaya na ọ kpahe rai. Mata ọ be dhogbo epanọ ọ rẹ rọ ghọ Jesu ziezi, fikiere ọ tẹ be ruẹrẹ eware họ re o there okpemu kẹ Jesu. Nọ Mata o bi ru iruo emu othere na, yọ Meri oniọvo riẹ ọ keria kẹle awọ Jesu be gaviezọ kẹe. Nọ omoke jọ o vrẹ no, Mata ọ tẹ ta kẹ Jesu nọ: “Olori, kọ whọ be daezọ inọ oniọvo mẹ ọ nyasiọ omẹ ọvo ba bi ru eware? Ta kẹe nọ ọ nyaze ti fiobọhọ kẹ omẹ.”—Luk 10:40.

Jesu ọ whọku Meri hi, ukpoye ọ tẹ kẹ Mata ohrẹ fikinọ ọ be ruawa hrọ, inọ: “Mata, Mata, whọ be ruawa kpahe eware buobu. Rekọ umutho eware ma gwọlọ, hayo ọvo dede. Meri ọ salọ abọ owoma, yọ a te rehọ iẹe mi ei hi.” (Luk 10:41, 42) Jesu o ru rie vẹ kẹe nọ u du gwọlọ nọ ọ rẹ raha oke buobu there okpemu hu. Rekọ umutho emu o te.

Orọnikọ oware nọ Mata o bi ru na o thọ họ. Ọ gwọlọ ghọ ọrara riẹ ziezi. Rekọ oke nọ ọ be raha there okpemu na u bi ru nọ obọdẹ iwuhrẹ nọ i bi no obọ Ọmọ Ọghẹnẹ ze i bi ro vru mi ei. Jesu ọ ta nọ Meri ọ salọ onọ o mai woma nọ o te wha erere ebẹdẹ ze, o tẹ jẹ rrọ oware nọ mai kpobi ma re wuhrẹ no ze.

Evaọ oke ofa, Jesu o wuhrẹ ahwo oware ofa jọ nọ u wuzou gaga re. Olele riẹ jọ ọ ta kẹe nọ: “Olori, wuhrẹ omai epanọ a rẹ lẹ, wọhọ epanọ Jọn o wuhrẹ ilele riẹ na.” (Luk 11:1) Jesu o wuhrẹ i rai epanọ a rẹ lẹ no vẹre oware wọhọ ẹgbukpe gbe emerae ezeza nọ i kpemu evaọ Ovuẹ obọ Ugbehru na. (Matiu 6:9-13) Rekọ, o wọhọ nọ evaọ oke yena olele nana ọ jariẹ hẹ, fikiere Jesu ọ tẹ wariẹ igogo eware nọ o wuhrẹ vẹre na. Kẹsena ọ tẹ rọ ọtadhesẹ jọ wuhrẹ epanọ u ro fo re ma ruabọhọ olẹ.

Ọ ta nọ: “Ma rehọ iẹe nọ whai ọjọ o wo ogbẹnyusu, whọ tẹ nya bru rie evaọ udevie aso jẹ ta kẹe nọ, ‘Ogbẹnyusu, momo ikulu ebrẹdi esa kẹ omẹ, keme ogbẹnyusu mẹ jọ ọ nyaze te kpahe omẹ obọnana yọ me wo uvumọ oware nọ mẹ rẹ rọ ghọe he.’ Rekọ ogbẹnyusu ra na ọ tẹ jọ obeva uwou kpunu nọ: ‘Siọ omẹ ba ekpokpo. A kare ẹthẹ na no, yọ emọ mẹ a kiẹzẹ kugbe omẹ evaọ ehwa. Mẹ sae kpama kẹ owhẹ oware ovo ho.’ Mẹ be ta kẹ owhai nọ, ọ gbẹ make rọ fiki egbẹnyusu nọ a rrọ kpama re ọ kẹe oware jọ họ, ọ te kpama jẹ kẹe oware kpobi nọ ọ gwọlọ fikinọ ọ gbaudu ruabọhọ bi kporo ẹthẹ na.”—Luk 11:5-8.

Orọnikọ Jesu ọ be ta nọ Jihova ọ wọhọ ogbẹnyusu yena nọ a lẹ bẹ re o te ti fiobọhọ na ha. Ukpoye, ọ be ta nọ otẹrọnọ ọzae na o ru ẹgwọlọ ogbẹnyusu riẹ kẹe fikinọ ọ ruabọhọ jẹ lẹe, u re mu omai ẹro nọ Ọsẹ oyoyou mai nọ ọ rrọ obọ odhiwu o re ru ẹgwọlọ idibo riẹ nọ e be lẹ sei kẹ ae. Jesu ọ ta haro nọ: “Mẹ be ta kẹ owhai nọ, wha ruabọhọ ẹyare, a te kẹ owhai; wha ruabọhọ ẹgwọlọ, wha te ruẹ; wha ruabọhọ ekporo, a ti rovie kẹ owhai. Keme ohwo kpobi nọ ọ be yare, a rẹ kẹe, ohwo kpobi nọ ọ be gwọlọ, ọ rẹ ruẹ, yọ ohwo kpobi nọ o bi kporo, a ti rovie kẹe.”—Luk 11:9, 10.

Jesu ọ tẹ rọ oriruo ọsẹ avọ ọmọ ru ẹme riẹ na vẹ, inọ: “Ọsẹ vẹ evaọ usu rai ọmọ riẹ ọ rẹ yare eri, ọ vẹ rehọ araomuomu kẹe viukpọ eri? Hayo ọ tẹ yare eke-arifẹ, ọ vẹ rehọ ọwhọhro-omuomu kẹe? Fikiere, otẹrọnọ whai nọ wha rrọ erahaizi wha riẹ epanọ wha rẹ rehọ emamọ eware kẹ emọ rai, ẹvẹ Ọsẹ na nọ ọ rrọ obọ odhiwu ọ rẹ rehọ ẹzi ọfuafo kẹ enọ e be yare iẹe te!” (Luk 11:11-13) Onana o kẹ omai imuẹro nọ u no Ọsẹ obọ odhiwu mai eva ze re ọ gaviezọ kẹ elẹ mai je ru ẹgwọlọ mai kẹ omai.