Jesu ọ gbẹ rrọ Jerusalẹm rọkẹ Ehaa Iwou-Udhu (hayo Iwou-Owhre) na. Eva e were riẹ nọ “ibuobu evaọ ogbotu na a fi ẹrọwọ họ iẹe.” Rekọ onana o were isu egagọ na ha. A te vi elakpa rai nyai mu Jesu. (Jọn 7:31, 32) Rekọ, Jesu o dhere fiki rai hi.

Ukpoye, ọ ruabọhọ ahwo nọ o je wuhrẹ evaọ Jerusalẹm, be ta nọ: “Omoke kakao mẹ te gbẹ jọ kugbe owhai re me te zihe bru Ọnọ o vi omẹ ze. Wha te gwọlọ omẹ, rekọ wha te ruẹ omẹ hẹ, yọ oria nọ mẹ te jọ wha te sae nyaze iẹe he.” (Jọn 7:33, 34) Ahwo Ju na a wo otoriẹ ẹme riẹ na ha, fikiere a tẹ be ta kẹ ohwohwo nọ: “Bovẹ ọzae nana ọ be gwọlọ nya nọ ma te gbẹ rọ ruẹ e riẹ hẹ? Kọ ọ be gwọlọ nya bru ahwo Ju nọ e vaha fihọ udevie ahwo Griki re o wuhrẹ ahwo Griki re? Eme họ otọ ẹme riẹ na inọ, ‘Wha te gwọlọ omẹ, rekọ wha te ruẹ omẹ hẹ, yọ oria nọ mẹ te jọ wha te sae nyaze iẹe he’?” (Jọn 7:35, 36) Rekọ Jesu ọ be ta kpahe uwhu gbe ẹkparomatha riẹ kpobọ odhiwu, yọ ewegrẹ riẹ a te sai lele iei kpohọ obei hi.

Ẹdẹ avọ ihrẹ ehaa na o te ti te. Kohiohiẹ kohiohiẹ evaọ etoke ehaa na, ozerẹ o re ku ame nọ a jẹ no Ẹtẹre Siloam fihọ oria nọ o rẹ jọ su kpohọ otọ agbada-idhe nọ ọ rrọ etẹmpol na. Ẹsejọhọ fikinọ Jesu ọ gwọlọ kareghẹhọ ahwo na uruemu nana, ọ tẹ ta nọ: “Otẹrọnọ uruame u bi kpe ohwo jọ, jọ ọ nya bru omẹ ze re ọ da. Ohwo kpobi nọ o fi ẹrọwọ họ omẹ, o te via kẹe wọhọ epanọ ikereakere na e ta inọ: ‘Eyeri-ame nọ ọ rẹ kẹ uzuazọ o ti kpo hwẹ no obọ edidi eva riẹ ze.’”—Jọn 7:37, 38.

Jesu ọ be ta kpahe oware nọ o te via evaọ okenọ a tẹ rehọ ẹzi ọfuafo wholo ilele riẹ no re a jọ enọ i ti kpobọ odhiwu. A te rehọ ẹzi ọfuafo wholo ilele na nọ Jesu o te whu no. Muhọ no ẹdẹ Pẹntikọst ọrọ ukpe nọ u lele i rie vrẹ, eyeri-ame  nọ ọ rẹ kẹ uzuazọ o te muhọ ekporo ruọ oria kpobi, nọ ilele na a muọ usiuwoma na họ ẹta kẹ ahwo no.

Ahwo jọ nọ a jẹ gaviezọ kẹ Jesu a tẹ ta nọ: “Ababọ avro, ọruẹaro nọ ọ be tha na ọna,” ẹsejọhọ a be ta kpahe ọruẹaro nọ a ta nọ ọ be tha nọ ọ te rro vi Mosis na. Amọfa a ta nọ: “Ọna họ Kristi na.” Rekọ ejọ e jẹ vravro nọ: “Kristi na o ti no Galili ze he, manikọ ere he? Kọ ikereakere na e gbẹ ta nọ Kristi na o ti no uyẹ Devidi gbe Bẹtlẹhẹm ze, ẹwho nọ Devidi ọ jọ?”—Jọn 7:40-42.

Ogbotu na a tẹ be ta ọvuọ ọriẹ. Dede nọ ejọ e gwọlọ nọ a mu Jesu, ohwo ọvo o mu rie he. Nọ elakpa na a zihe bru isu egagọ na ababọ, ilori izerẹ gbe otu Farisi na a tẹ nọ ae nọ: “Fikieme wha gbe ro mu ei ze he?” Elakpa na a tẹ kuyo nọ: “Ma re ruẹ ohwo nọ ọ ta ẹme enẹ vievie he.” Eva e dha isu egagọ na gaga, a tẹ be nọ ae nọ: “Thakpinọ a su owhai thọ no re ha? Kọ osu mai jọ hayo ohwo Farisi jọ o fi ẹrọwọ họ iẹe no? Rekọ ogbotu nana nọ a riẹ Uzi na ha na yọ ahwo nọ a duwu iyei.”—Jọn 7:45-49.

Kẹsena Nikodimọs, nọ ọ rrọ omọvo otu Farisi ọ tẹ jẹ rrọ omọvo ogbẹgwae Sanhẹdrin ọ tẹ ta ẹme jọ re ọ thọ Jesu. Evaọ oware wọhọ ikpe ivẹ gbe emerae ezeza nọ i kpemu, Nikodimọs ọ lẹlẹ nya bru Jesu evaọ aso jẹ ta nọ o fi ẹrọwọ họ Jesu. Obọnana Nikodimọs ọ ta kẹ ahwo na nọ: “Wọhọ epanọ Uzi mai o ta, ma re brukpe ohwo ho ajokpanọ ma re yo mi ei tao jẹ riẹ oware nọ o bi ru, o gbẹ rrọ ere?” Kọ eme ahwo na a kpahe kẹe? A ta nọ: “Whẹ yọ ohwo Galili re? Nabe kiẹ, whọ te ruẹ oria ovo nọ a jọ ta nọ ọruẹaro jọ o ti no Galili ze he.”—Jọn 7:51, 52.

Ikere na e nwane ta gbiae he inọ ọruẹaro jọ o ti no Galili ze. Rekọ Ebaibol na ọ ta eme nọ i dhesẹ nọ etẹe Kristi na o ti no ze; eruẹaruẹ jọ e ta nọ a te ruẹ “elo ologbo” evaọ “Galili ọrọ ahwo erẹwho efa” na. (Aizaya 9:1, 2; Matiu 4:13-17) U te no ere no, wọhọ epanọ a ruẹaro riẹ, a yẹ Jesu evaọ ẹwho Bẹtlẹhẹm, o te je no uyẹ Devidi ze. Dede nọ ẹsejọhọ otu Farisi na a riẹ onana, o wọhọ nọ ae ọvona a be ta Jesu raha kẹ ogbotu na.