Evaọ ẹdẹ urere Ehaa Iwou-Udhu na, koyehọ ẹdẹ avọ ihrẹ na, Jesu o bi wuhrẹ ahwo evaọ “oria nọ a fi ekpẹti okẹ-unevaze họ” evaọ etẹmpol na. (Jọn 8:20; Luk 21:1) U muẹro nọ oria nana o rrọ eva Ọgwa Eyae na, yọ oria nana ahwo a re fi unevaze rai họ.

Evaọ etoke ehaa na, a rẹ rọ ikpẹ tu fihọ oria nana evaọ aso. Ikpẹ ilogbo ene e rrọ etẹe, yọ ikpẹ na kpobi i wo ọvuọ idhe ilogbo ene riẹ nọ a ku ewhri họ nọ i bi ru ai lo. Ikpẹ nana i re lo thabọ gaga. O sae jọnọ ahwo nọ a jẹ gaviezọ kẹ Jesu a kareghẹhọ onana nọ ọ ta nọ: “Mẹ họ elo akpọ na. Ohwo kpobi nọ o bi lele omẹ ọ te nya evaọ ebi vievie he, rekọ o ti wo elo uzuazọ.”—Jọn 8:12.

Otu Farisi na a rọwo fihọ ẹme Jesu nana ha, a tẹ ta nọ: “Who bi se isẹri kpahe omobọ ra; isẹri ra yọ uzẹme he.” Jesu ọ tẹ kpahe kẹ ae nọ: “O tẹ make rrọ nọ me bi se isẹri kpahe omobọ mẹ, isẹri mẹ uzẹme, keme mẹ riẹ obonọ me no ze gbe obonọ mẹ be nya. Rekọ wha riẹ obonọ me no ze gbe obonọ mẹ be nya ha.” Jesu o fibae nọ: “A jọ Uzi obọrai kere nọ: ‘Isẹri imava yọ uzẹme.’ Me bi se isẹri kpahe omobọ mẹ, yọ Ọsẹ na ọnọ o vi omẹ ze o bi se isẹri kpahe omẹ.”—Jọn 8:13-18.

Otu Farisi na a rọwokugbe ẹme Jesu na ghele he, a tẹ nọe nọ: “Bovẹ Ọsẹ ra ọ rrọ?” Jesu ọ tẹ kpahe kẹ ae vevẹ nọ: “Wha riẹ omẹ hayo Ọsẹ mẹ hẹ. Wha hae riẹ omẹ, wha hae riẹ Ọsẹ mẹ re.” (Jọn 8:19) Dede nọ otu Farisi na a gbẹ gwọlọ mu Jesu, ohwo ọvo ọ sai dhobọ tei hi.

Jesu ọ tẹ wariẹ ẹme jọ nọ ọ ta no vẹre nọ: “Mẹ be nyavrẹ, yọ wha te gwọlọ omẹ, rekọ wha ti whu evaọ izieraha rai. Oria nọ me bi kpohọ wha te sae nyaze iẹe he.” Ahwo Ju na a wo otoriẹ ẹme Jesu na vievie he, a tẹ be ta kẹ omoma rai nọ: “Kọ o bi ti kpe omariẹ? Keme ọ be ta nọ, ‘Oria  nọ me bi kpohọ wha te sae nyaze iẹe he.’” A wo otoriẹ ẹme Jesu na ha keme a riẹ obonọ o no ze he. Jesu o ru ẹme na vẹ kẹ ae nọ: “Whai yọ erọ otọakpọ na; obọ ehru me no ze. Akpọ nana wha no ze; me no akpọ nana ze he.”—Jọn 8:21-23.

Jesu ọ be ta kpahe uzuazọ nọ ọ jẹ rria evaọ obọ odhiwu gbe nọ ọye họ Mesaya hayo Kristi nọ a ya eyaa riẹ na, ọnọ isu egagọ na a bi rẹro riẹ anwẹdẹ na. Ghele na, a nọ riẹ avọ evedha nọ: “Whẹ yọ ono?”—Jọn 8:25.

Fikinọ a se riẹ jẹ be wọso ẹe, Jesu ọ tẹ kẹ ae uyo nọ: “Fikieme me bi ro lele owhai ta ẹme dede?” Ghele na, Jesu ọ ta kpahe Ọsẹ riẹ je ru ei vẹ kẹ ahwo Ju na oware nọ u ro fo nọ a rẹ gaviezọ kẹ Ọmọ na, inọ: “Ọnọ o vi omẹ ze yọ ọrọ uzẹme, yọ eware nọ me yo mi ei mẹ be ta evaọ akpọ na.”—Jọn 8:25, 26.

Kẹsena Jesu ọ tẹ ta eme nọ i dhesẹ nọ o fievahọ Ọsẹ riẹ dede nọ ahwo Ju nana a fievahọ Ọsẹ riẹ hẹ, inọ: “Nọ wha tẹ kpare Ọmọ ohwo kpehru no, ẹsiẹe wha te riẹ nọ mẹ họ ọye, gbe nọ mẹ be rọ udu obọmẹ ru oware ovo ho; rekọ wọhọ epanọ Ọsẹ na o wuhrẹ omẹ ere mẹ be ta eware nana. Yọ Ọnọ o vi omẹ ze ọ rrọ kugbe omẹ; ọ nyase omẹ ọvo ba ha, keme ẹsikpobi me bi ru eware nọ e rẹ were iẹe.”—Jọn 8:28, 29.

Rekọ ahwo Ju jọ a fi ẹrọwọ họ Jesu, yọ Jesu ọ vuẹ rai nọ: “Wha te bi koko eme mẹ ẹsikpobi, yọ whai ginọ ilele mẹ, yọ wha te riẹ uzẹme na, uzẹme na u ve ti si owhai no igbo.”—Jọn 8:31, 32.

Ahwo jọ nọ a jọ etẹe a rọwo fihọ ẹme nọ Jesu ọ ta kpahe esino igbo na ha. A tẹ ta kẹe nọ: “Mai yọ emọ Abraham, yọ ma re jọ erigbo kẹ ohwo ọvo ẹdẹvo ho. Emejabọ whọ be rọ ta nọ, ‘Wha ti no igbo’?” Ahwo Ju a riẹ nọ a rẹ jọ otọ esuo ahwo orẹwho ofa ẹsejọ, rekọ a rri omarai fihọ erigbo ho. Rekọ Jesu ọ ta kẹ ae nọ a gbẹ rrọ erigbo, inọ: “Uzẹme uzẹme mẹ be ta kẹ owhai, ohwo kpobi nọ ọ be raha uzi yọ ọrigbo uzioraha.”—Jọn 8:33, 34.

Ahwo Ju na a rọwo nọ a rrọ igbo uzioraha ha, yọ onana o te wha uye se ai. Jesu o ru ẹme na vẹ nọ: “Ọrigbo ọ rẹ jọ uwou olori riẹ bẹdẹ bẹdẹ hẹ; ọmọ olori na ọ rẹ jariẹ bẹdẹ bẹdẹ.” (Jọn 8:35) Ọrigbo ọ sae reuku eware olori riẹ hẹ, yọ a sai lei no uwou na oke kpobi. Ọmọ nọ olori na o yẹ hayo nọ ọ yọrọ evaọ uwou riẹ ọvo ọ rẹ sae jọ uwou na “bẹdẹ bẹdẹ,” koyehọ edẹ uzuazọ riẹ kpobi.

Fikiere, uzẹme kpahe Ọmọ na họ uzẹme nọ u re si ahwo no igbo uzioraha gbe uwhu bẹdẹ bẹdẹ. Agbẹta nọ Jesu ọ rọ ta nọ: “Ọmọ na o te si owhai no igbo, yọ wha gine zihe ruọ emuyẹ no.”—Jọn 8:36.