Otu Farisi na a rọwo nọ Jesu họ ọnọ o gine rovie aro ọzae nọ a yẹ tuaro na ha, fikiere a tẹ nyai se ọsẹgboni ọzae na ze. Ọsẹgboni na a riẹ nọ a rẹ yọroma keme isu egagọ na a sai ‘le ohwo no uwou-egagọ na.’ (Jọn 9:22) Nọ a te le ai no uwou-egagọ na, u ti ru nọ ahwo Ju efa a ti ro siomano ai, onọ o te wha ọbẹwẹ se uviuwou na.

Otu Farisi na a nọ ọsẹgboni na enọ ivẹ, inọ: “Kọ ọmọ rai nọ wha ta nọ a yẹ tuaro na ọna? Kọ ẹvẹ ọ be rọ ruẹ ude enẹna?” Ọsẹgboni na a tẹ kuyo nọ: “Ma riẹ inọ nọ ọmọ mai gbe nọ o tuaro okenọ ma yẹi. Rekọ epanọ o ro mu ude họ ẹruẹ, ma riẹ hẹ; yọ ma riẹ ohwo nọ o rovie ibiaro riẹ hẹ.” O tẹ make rọnọ ọmọ na ọ vuẹ rai oware nọ o via, ọsẹgboni na a be yọroma kpahe ẹme nọ a rẹ ta kẹ ae, fikiere a tẹ ta kẹ otu Farisi na nọ: “Wha nọe. Ọ kpako te ohwo no. Jọ ọye ọvo ọ rọ unu riẹ ta.”—Jọn 9:19-21.

Otu Farisi na a tẹ wariẹ se ọzae na ze, be gwọlọ ru ei nwene iroro riẹ. A ta kẹe nọ: “Kẹ Ọghẹnẹ oruaro; ma riẹ nọ ọzae nana yọ ọrahauzi.” Ọzae nọ o tuaro vẹre na ọ tẹ rọ areghẹ kpahe ẹme kẹ ae nọ: “Sọ ọrahauzi ọ rrọ mẹ riẹ hẹ. Oware nọ mẹ riẹ họ, me tuaro vẹre, rekọ enẹna mẹ be ruẹ ude.”—Jọn 9:24, 25.

Rekọ ẹme na ọ re vọ otu Farisi na eva ghele he, a tẹ wariẹ nọ ọzae na nọ: “Eme o ru kẹ owhẹ? Ẹvẹ o ro rovie ibiaro ra?” Ọzae na ọ tẹ gbaudu ta kẹ ae nọ: “Mẹ vuẹ owhai no vẹre, rekọ wha gaviezọ họ. Fikieme wha rọ gwọlọ wariẹ yoi? Manikọ wha gwọlọ jọ ilele riẹ re?” Eva e tẹ dha otu Farisi na gaga, a tẹ ta kẹe nọ: “Whẹ yọ olele ọzae yena, rekọ mai yọ ilele Mosis. Ma riẹ nọ Ọghẹnẹ ọ ta ẹme kẹ Mosis, rekọ ọzae nana, ma riẹ obonọ o no ze he.”—Jọn 9:26-29.

Ẹme nọ a ta na o gbe ọzae na unu gaga, ọ tẹ kpahe kẹ ae nọ: “Onana u gbunu kẹhẹ, inọ wha riẹ obonọ o no ze he, yọ o rovie ibiaro mẹ.” Ọzae nọ o tuaro vẹre na ọ tẹ ta ẹme jọ nọ o wo areghẹ gaga ro dhesẹ ohwo nọ Ọghẹnẹ o re yo ẹme riẹ gbe ọnọ ọ rẹ jẹ rehọ, inọ: “Ma riẹ nọ Ọghẹnẹ ọ rẹ gaviezọ kẹ erahaizi hi, rekọ ohwo o te wo ozodhẹ Ọghẹnẹ je bi ru oreva riẹ, ọ rẹ gaviezọ kẹe. No anwae ze ma ri yo ho inọ ohwo jọ o rovie ibiaro ohwo nọ a yẹ tuaro.” O te ku ẹme na họ nọ: “Ọzae nana o gbe no obọ Ọghẹnẹ ze he, ọ hae sai ru oware ovo vievie he.”—Jọn 9:30-33.

Fikinọ otu Farisi na a gbẹ ruẹ ẹme ọvo kpahe kẹ ọzae na ha, a tẹ be poviẹe nọ: “A yẹ owhẹ avọ izieraha nọ e da owhẹ oma fia, ghele na who bi wuhrẹ omai?” A te lei no uwou-egagọ na.—Jọn 9:34.

Jesu o yo oware nọ o via na, kẹsena nọ ọ ruẹ ọzae nọ o siwi na, ọ tẹ nọe nọ: “Kọ who fi ẹrọwọ họ Ọmọ ohwo?” Ọzae na ọ tẹ nọe nọ: “Ọga, ono họ ọye, re me fi ẹrọwọ họ iẹe?” Jesu ọ tẹ ta kẹe vevẹ nọ: “Whọ ruẹ e riẹ no, evaọ uzẹme, ọye o bi lele owhẹ ta ẹme na.”—Jọn 9:35-37.

Ọzae na ọ tẹ ta kẹe nọ: “Olori, me fi ẹrọwọ họ iẹe.” Avọ omaurokpotọ gbe ẹrọwọ, ọzae na o te guzou kpotọ kẹ Jesu, kẹsena Jesu ọ tẹ ta nọ: “Fiki ẹdhoguo nana mẹ rọ ziọ akpọ na, re enọ e be ruẹ ude he a ruẹse ruẹ ude, gbe re enọ e be ruẹ ude a ruẹsi tuaro.”—Jọn 9:38, 39.

Otu Farisi nọ e jọ etẹe a riẹ nọ a tuaro ho. Ghele na, kọ a be ginẹ ruẹ ude be sai su ahwo nọ e rrọ otọ rai ziezi? A kpahe kẹ Jesu nọ: “Kọ ma tuaro re?” Jesu ọ tẹ ta kẹ ae nọ: “O hae jọnọ wha tuaro, wha hai ti wo uzioraha ovo ho. Rekọ wha be ta nọ, ‘Ma be ruẹ ude.’ A te rọ izieraha rai rọvrẹ owhai hi.” (Jọn 9:40, 41) Ogbẹrọnọ ahwo nana yọ iwuhrẹ nọ e riẹ Uzi na ha, ẹse nọ a se Mesaya na o hai yoma tere he. Rekọ fikinọ a riẹ Uzi na ziezi, Mesaya na nọ a se na yọ uzioraha ulogbo.