Nọ Jesu ọ jọ Judia, o kpohọ uwou ohwo Farisi jọ nọ o zizie i rie kẹ emuọriọ. U muẹro nọ o jọ oke uvo orọnikọ owọwọ họ. (Luk 11:37, 38; wawo Luk 14:12.) Taure otu Farisi na a te ti mu emu na họ ẹre, a nabe wozẹ abọ rai te ighilabọ. Rekọ Jesu o ru ere he. (Matiu 15:1, 2) Orọnikọ ohwo ọ tẹ wozẹ abọ te ighilabọ yọ ọ thọ Uzi Ọghẹnẹ hẹ, dede na, Ọghẹnẹ o fi uzi yena họ họ.

Akpọ o gbe ohwo Farisi na unu inọ Jesu o ru epanọ a ru na ha. Nọ Jesu o vuhu oware nọ ọzae na o bi roro na mu ọ tẹ ta nọ: “Whai otu Farisi, wha rẹ wozẹ uke egho gbe uke omodhe, rekọ obeva rai o vọ avọ uvou-uthei gbe emuemu. Whai igheghẹ! Ohwo nọ o ru uke na o ru obeva na re, o gbẹ rrọ ere?”—Luk 11:39, 40.

Orọnikọ ẹme nana ẹme abọ-ọwozẹ re a tẹ te re emu hu, rekọ ẹme uruemu eviẹhọ nọ ahwo nana a bi dhesẹ evaọ egagọ Ọghẹnẹ. Otu Farisi na gbe amọfa a rẹ nabe wozẹ abọ rai te ighilabọ rekiyọ emuemu ọ vọ rai eva. Fikiere Jesu ọ tẹ kẹ ae ohrẹ nọ: “Wha rehọ eware nọ e rrọ obọ udu na kẹ ekẹ ohrọ, wha vẹ te jọ fuafo evaọ eware kpobi.” (Luk 11:41) Ẹme yena ginọ uzẹme. Okẹ nọ u no eva ze họ onọ o mai woma orọnikọ onọ a rẹ kẹ re amọfa a rọ emamọ ubiẹro rri ohwo inọ o kiẹrẹe he.

Orọnikọ ahwo nana a be kẹ okẹ hẹ hẹ. Jesu ọ ta kẹ ae vevẹ nọ: “Wha rẹ kẹ abọvo abakpe ọrọ mint gbe olugbo gbe oghẹrẹ ẹbe ọfa kpobi nọ a rẹ re, rekọ wha bi gbabọkẹ uvioziẹ gbe uyoyou Ọghẹnẹ! O gba owhai họ nọ wha re ru eware yena, rekọ orọnọ wha re gbabọkẹ eware edekọ họ.” (Luk 11:42) Uzi Ọghẹnẹ o ta nọ a rẹ kẹ abọvo abakpe ọrọ ekakọ. (Iziewariẹ 14:22) Onana u kugbe mint gbe olugbo gbe oghẹrẹ ẹbe ọfa kpobi nọ a re ro there emu nọ o rẹ lẹliẹ emu gbore awere. Otu Farisi na a rẹ romatotọ hwa abọvo abakpe ọrọ ẹbe, kọ ẹvẹ kpahe eware nọ e mai wuzou nọ Uzi na o ta nọ a re ru wọhọ uvioziẹ gbe omaurokpotọ?—Maeka 6:8.

Jesu ọ ta haro nọ: “Uye u te owhai, otu Farisi, keme wha rẹ gwọlọ keria egbara obaro evaọ iwou-egagọ, jẹ gwọlọ nọ ahwo a yere owhai evaọ eria eki! Uye u te owhai, keme wha wọhọ iki nọ a rẹ kaki rri mu hu, nọ ahwo a rẹ nya ehru rai vrẹ yọ a rẹ riẹ hẹ!” (Luk 11:43, 44) Evaọ uzẹme, ahwo a rẹ nya ehru iki itieye na vrẹ nọ a rẹ riẹ hẹ, onọ u re ru ai fihọ gbegbe wọhọ epanọ Uzi na o ta. Jesu ọ rehọ onana dhesẹ epanọ egbegbe otu Farisi na o siomano te.—Matiu 23:27.

Ọzae jọ nọ ọ riẹ Uzi na lafi ọ tẹ kpahe kẹe nọ: “Owuhrẹ, whọ be rọ eme ra na la omai eka re.” Ghele na, o gwọlọ nọ a rẹ vuẹ ezae nana vevẹ nọ a bi fiobọhọ kẹ ahwo nọ a rrọ otọ rai hi, wọhọ epanọ u fo nọ o rẹ jọ. Jesu ọ ta nọ: “Uye u te owhai re, whai enọ e riẹ Uzi na lafi, keme wha re kru ewha egbẹgbẹdẹ họ ahwo uzou, rekọ wha rẹ rehọ uziobọ rai te ai hi! Uye u te owhai, keme wha be bọ iki eruẹaro na, dede nọ esẹ rai họ enọ i kpe rai!”—Luk 11:45-47.

Ewha egbẹgbẹdẹ nọ Jesu ọ fodẹ na họ iruemu oke anwae nọ a bi ru lele gbe oghẹrẹ nọ otu Farisi na a be fotọ Uzi na. A je ru akpọ bẹ ahwo na. Yọ a jẹ ta nọ o gbahọ nọ ohwo kpobi o re ru lele oghẹrẹ nọ ae omarai a wo otoriẹ Uzi na, onana o tẹ jọ owha ogbẹgbẹdẹ kẹ ahwo na. Esẹ-ode rai i kpe eruẹaro Ọghẹnẹ, no umuo Ebẹle ze. Obọnana, a bi ru wọhọ ẹsenọ a be rọ orro kẹ eruẹaro na ẹkwoma iki rai nọ a be bọ, rekiyọ a be rọ aro kele uruemu esẹ-ode rai na. A be tubẹ gwọlọ epanọ a re ro kpe Ọruẹaro Ọghẹnẹ nọ ọ mae rro. Jesu ọ ta nọ Ọghẹnẹ ọ te rọ oge nana guẹdhọ. Yọ ere o via nọ oware wọhọ ikpe 38 e vrẹ no evaọ ukpe 70 C.E.

Jesu ọ ta haro nọ: “Uye u te owhai enọ e riẹ  Uzi na lafi, keme wha si usiavẹ eriariẹ Ọghẹnẹ no. Whai omarai wha ruọ eva ha, yọ wha be whaha enọ e gwọlọ ruọ eva!” (Luk 11:52) Otu Farisi na nọ u fo nọ a re wuhrẹ ahwo ẹme Ọghẹnẹ, a tẹ be whaha ahwo uvẹ nọ a re ro wuhrẹ jẹ riẹ kpahe Ọghẹnẹ.

Eme otu Farisi na gbe otu ikere-obe na a ru? Nọ Jesu ọ be nyavrẹ na, a tẹ be ta eme egaga kẹe je bi fi enọ sei. Orọnikọ a be nọ re a riẹ hẹ. Ukpoye, a be gwọlọ bẹbẹ Jesu họ re ọ ta ẹme jọ thọ re a ruẹ oware nọ a re ro mu ei.