Re Whọ rọ Aro Kele Jesu, Dhesẹ Iruemu Nana . . .
OHRỌ
Jesu ọ jọ ohwo ọgbagba, fikiere ebẹbẹ gbe awaọruọ buobu nọ ahwo-akpọ edekọ a wo, o wo rai hi. Ghele na, ọ jẹ re ohrọ ahwo. Ọ jẹ dawo ẹgba riẹ kpobi re o fiobọhọ kẹ ahwo, makọ obufihọ nọ ahwo a rẹro rai dede he. Ẹhẹ, ohrọ nọ o wo o jẹ lẹliẹe fiobọhọ kẹ amọfa. Se kpahe ohrọ riẹ evaọ Uzou avọ 32, 37, 57, gbe 99.
OHWO NỌ A RẸ SAE TA ẸME KẸ LỌLỌHỌ
Te emaha te ekpako a jẹ sae nyabru Jesu lọlọhọ keme ọ jẹ wọ oma kpehru hu yọ o je ru wọhọ ẹsenọ iruo e vọe abọ họ. Nọ a vuhumu nọ Jesu ọ gwọlọ ewoma rai, a tẹ jẹ gwọlọ nọ a rẹ jọ kugbei ẹsikpobi. Whọ sae ruẹ onana evaọ Uzou avọ 25, 27, gbe 95.
LẸ KẸSE KẸSE
Jesu ọ jẹ hae lẹ se Ọsẹ riẹ kẹse kẹse nọ ọye ọvo ọ tẹ rrọ oria, gbe okenọ ọ tẹ rrọ kugbe eg’Ọghẹnẹ efa. Ọ jẹ hae lẹ ẹsikpobi, orọnikọ okenọ ọ be te re emu ọvo ho. Ọ rẹ lẹ ro yere Ọsẹ riẹ, jiri ei, jẹ lẹ kẹ obufihọ riẹ taure o te ti ru oware nọ u wuzou. Whọ sai se kpahe onana evaọ Uzou avọ 24, 34, 91, 122, gbe 123.
ABABỌ ORIOBỌ
Makọ oke nọ Jesu ọ hai ti ro serihọ dede, ọ jẹ rehọ iẹe fiobọhọ kẹ ahwo. Ọ rehọ ẹgwọlọ omobọ riẹ karo vievie he. Onana yọ emamọ oriruo nọ ma rẹ rọ aro kele re. Se kpahe emamọ oriruo nana evaọ Uzou avọ 19, 41, gbe 52.
ERỌVRẸ
Orọnikọ Jesu o wuhrẹ ahwo inọ a hae rọvrẹ ọvo ho, ọ jẹ rọvrẹ ilele riẹ gbe amọfa. Se je roro didi kpahe onana evaọ Uzou avọ 26, 40, 64, 85, gbe 131.
ỌWHỌ
A ruẹaro riẹ no vẹre inọ okenọ Mesaya na ọ tẹ nyaze, ahwo Ju buobu a te jẹe rehọ họ, gbe nọ ewegrẹ riẹ a ti kpei. Fikiere, onana o hae wha oyẹlẹ họ Jesu oma nọ ọ hai ro ru umutho eware jọ ọvo kẹ ae. Rekọ o ru ere he, o ru iruo Ọghẹnẹ avọ ọwhọ. Onana yọ emamọ oriruo rọkẹ ilele riẹ kpobi nọ a be wọso gbe enọ e be ta usiuwoma evaọ eria nọ ahwo a be jọ gaviezọ họ. Se kpahe onana evaọ Uzou avọ 16, 72, gbe 103.
OMAUROKPOTỌ
Jesu ọ rro vi ahwo-akpọ nọ a gba ha evaọ idhere buobu, o wo eriariẹ gbe areghẹ vi ai. Fikinọ ọ rrọ gbagba, o wo oghẹrẹ ẹgba nọ ohwo-akpọ ọvuọvo o wo ho. Ghele na, o wo omaurokpotọ yọ ọ jẹ gbodibo kẹ amọfa. Who ti se kpahe onana evaọ Uzou avọ 10, 62, 66, 94, gbe 116.
ODIRI
Nọ ikọ Jesu gbe amọfa a gbe lele oriruo riẹ hẹ hayo ru lele eware nọ o wuhrẹ i rai hi, Jesu o je wo odiri kẹ ae ẹsikpobi. Ọ tubẹ wariẹ eware jọ nọ o wuhrẹ i rai no vẹre re o fiobọhọ kẹ ae si kẹle Jihova. Se kpahe odiri Jesu evaọ Uzou avọ 74, 98, 118, gbe 135.
