Jesu Kristi yọ Ọmọ Jihova gbe ogbẹnyusu riẹ nọ ọ mae kpekpe, jẹ mae ghare. Taure ọ tẹ te rria wọhọ ohwo-akpọ evaọ otọakpọ, Jesu ọ rria no evaọ obọ odhiwu wọhọ omama ẹzi ologbo. (Jọn 17:5) Kẹsena ọ tẹ ziọ otọakpọ ti wuhrẹ ahwo uzẹme na kpahe Ọghẹnẹ. (Jọn 18:37) O te je siobọno uzuazọ ohwo-akpọ riẹ re o siwi ahwo-akpọ ẹmeoyo no uzioraha gbe uwhu. (Ahwo Rom 6:23) Enẹna Jesu ọ rrọ Ovie Uvie Ọghẹnẹ, egọmeti obọ odhiwu nọ ọ te rehọ Aparadase ziọ otọakpọ nana.​—Eviavia 19:16.

Enjẹle na yọ egbẹnyusu Ọghẹnẹ re. Enjẹle na i muọ uzuazọ rai họ wọhọ ahwo-akpọ evaọ otọakpọ họ. A ma rae fihọ obọ odhiwu taure Ọghẹnẹ ọ tẹ te ma otọakpọ na. (Job 38:4-7) Enjẹle na i bu te imaa buobu. (Daniẹl 7:10) Egbẹnyusu obọ odhiwu Ọghẹnẹ nana a gwọlọ re ahwo a wuhrẹ uzẹme na kpahe Jihova.​—Eviavia 14:6, 7.

Ọghẹnẹ o wo egbẹnyusu evaọ otọakpọ na re; o se rai isẹri riẹ. Osẹri nọ a se kpohọ okọto ọ rẹ ta oware nọ ọ riẹ kpahe ohwo jọ hayo oware jọ. Isẹri Jihova a be ta kẹ amọfa kpahe oware nọ a riẹ kpahe Jihova gbe ẹjiroro riẹ. (Aizaya 43:10) Wọhọ enjẹle na, Isẹri na a gwọlọ fiobọhọ k’owhẹ wuhrẹ uzẹme na kpahe Jihova. A gwọlọ re whọ jọ ogbẹnyusu Ọghẹnẹ re.