Whọ tẹ gwọlọ jọ ogbẹnyusu Ọghẹnẹ, whọ rẹ gọ egagọ nọ Ọghẹnẹ o kuenu kẹ hrọ. Jesu ọ ta nnọ “enọ e rẹ ghinẹ gọ” a te rọ “uzẹme” gọ Ọghẹnẹ. (Jọn 4:23, 24) Edhere ọgbagba ọvuọvo ọ riẹ nọ a rẹ rọ gọ Ọghẹnẹ. (Ahwo Ẹfisọs 4:4-6) Egagọ uzẹme i re su kpohọ uzuazọ ebẹdẹ bẹdẹ, egagọ ọrue i ve su kpohọ ọraha.​—Matiu 7:13, 14.

Whọ rẹ sai vuhu egagọ uzẹme ẹkwoma ẹromuhọ ahwo nọ a rrọ egagọ na. Nọ Jihova ọ rrọ wowoma na, enọ e rrọ egegagọ uzẹme riẹ kpobi a rẹ jọ ahwo owoma hrọ. Nwanọ epanọ urre otiowo owoma o rẹ mọ emamọ ibi itiowo na, ere egagọ uzẹme na e rẹ mọ emamọ ahwo re.​—Matiu 7:15-20.

Egbẹnyusu Jihova a re wo adhẹẹ odidi kẹ Ebaibol na. A riẹ nnọ Ebaibol na o no obọ Ọghẹnẹ ze. A be kuvẹ re ẹme Ebaibol na ọ kpọ izuazọ rai, re o ku ebẹbẹ rai họ, je fiobọhọ kẹ ae wuhrẹ kpahe Ọghẹnẹ. (2 Timoti 3:16) A be daoma fi oware nọ a be ta h’iruo.

Egbẹnyusu Jihova a re dhesẹ uyoyou kẹ ohwohwo. Jesu o dhesẹ uyoyou kẹ ahwo  ẹkwoma ewuhrẹ nọ o wuhrẹ i rae kpahe Ọghẹnẹ, ẹkwoma esiwo enọ e jẹ mọ. Enọ e be gọ egagọ uzẹme na a re je dhesẹ uyoyou kẹ amọfa re. Wọhọ Jesu, a re gbolo aro kẹ iyogbere hayo rọkẹ utu ahwo uyẹ ofa ha. Jesu ọ ta nnọ ahwo a te riẹ ilele riẹ ẹkwoma uyoyou nọ a re dhesẹ kẹ ohwohwo.​—Jọn 13:35.

Egbẹnyusu Ọghẹnẹ a rẹ rehọ adhẹẹ kẹ odẹ Ọghẹnẹ, Jihova. Otẹrọnọ ohwo jọ ọ se nnọ o re se odẹ ra, kọ ohwo ọyena ọ rẹ sae jọ ogbẹnyusu ọkpekpe ra? Ijo! Nọ ma te wo ogbẹnyusu, ma re se odẹ riẹ yọ ma rẹ ta eware iwoma kpahe ogbẹnyusu ọyena kẹ amọfa. Ere ahwo nọ a gwọlọ jọ egbẹnyusu Ọghẹnẹ a rẹ rehọ odẹ riẹ ruiruo jẹ t’ẹme kpahe iẹe kẹ amọfa re. Jihova ọ gwọlọ nọ ma rehọ odẹ riẹ ruiruo.​—Matiu 6:9; Ahwo Rom 10:13, 14.

Wọhọ Jesu, egbẹnyusu Ọghẹnẹ a re wuhrẹ ahwo kpahe Uvie Ọghẹnẹ. Uvie Ọghẹnẹ yọ egọmeti obọ odhiwu nọ u ti ru otọakpọ na fihọ aparadase. Egbẹnyusu Ọghẹnẹ a rẹ ghale emamọ usi kpahe Uvie Ọghẹnẹ onana kugbe amọfa.​—Matiu 24:14.

Isẹri Jihova a be daoma re a jọ egbẹnyusu Ọghẹnẹ. A be rehọ adhẹẹ kẹ Ebaibol na je wo uyoyou evaọ udevie rai. A rẹ jẹ rẹhọ odẹ Ọghẹnẹ ruiruo jẹ kẹe adhẹẹ je wuhrẹ amọfa kpahe Uvie Ọghẹnẹ re. Isẹri Jihova a be gọ egagọ uzẹme evaọ otọakpọ na nẹnẹ.