Aparadase ọ te jọ wọhọ akpọ nọ ma be rria enẹna ha. Ọghẹnẹ ọ gwọlọ nọ otọakpọ na o vọ avọ ebẹbẹ gbe uweri, edada gbe uye-oruẹ vievie he. Evaọ obaro, Ọghẹnẹ o ti ru otọakpọ na fihọ aparadase. Kọ ẹvẹ Aparadase ọ te jọ? Joma ruẹ epanọ Ebaibol na ọ ta:

Emamọ ahwo. Aparadase ọ te jọ uwou ọ egbẹnyusu Ọghẹnẹ. A ti ru ewoma kẹ ohwohwo. A te rria lele idhere ikiẹrẹe Ọghẹnẹ.—Itẹ 2:21.

Emuore obuobu. Evaọ Aparadase, ohọo o te jariẹ hẹ. Ebaibol na ọ ta nọ: “Jọ ibi [hayo, emuore] i vihọ eva otọ na.”​—Olezi 72:16.

Iwou iwoma gbe iruo evawere. Evaọ otọakpọ Aparadase na, uviuwou kpobi u ti wo uwou obọriẹ. Ohwo kpobi o ti ru iruo nọ e rẹ wha uvi evawere ze.​—Aizaya 65:21-23.

Udhedhẹ evaọ akpọ soso. Ahwo a gbẹ te  họre je whu evaọ ẹmo ho. Ẹme Ọghẹnẹ ọ ta nọ: ‘Ọghẹnẹ o ti ru ẹmo serihọ.’​—Olezi 46:8, 9.

Omokpokpọ. Ebaibol na ọ y’eyaa nọ: “Ohwo ọvo nọ ọ be rria [Aparadase] nọ ọ rẹte ta [nọ], ‘Mẹ be mọ’, ọ rọ họ.” (Aizaya 33:24) Ofariẹ, ohwo ọvo ọ te gbẹ jọ ọmo hayo otuaro hayo odiezọ hayo odienu hu.​—Aizaya 35:5, 6.

Ekuhọ edada, uweri, gbe uwhu. Ẹme Ọghẹnẹ ọ ta nọ: “Uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”​—Eviavia 21:4.

Ahwo oyoma a te gbẹ jariẹ hẹ. Jihova ọ y’eyaa nọ: “A re ti kpe ahwo omuomu no otọ na, gbe ahwo [ẹgwae] omuomu a re ti si ai no otọ na.”​—Itẹ 2:22.

Ahwo a re ti you ohwohwo jẹ kẹ ohwohwo adhẹẹ. Ẹdhoguo-okienyẹ, ọnwẹ, uvo-uthei, gbe omukpahe e te gbẹ jariẹ hẹ. Ahwo a ti wo okugbe jẹ rria lele idhere ikiẹrẹe Ọghẹnẹ.​—Aizaya 26:9.