Ogbẹnyusu Ọghẹnẹ nọ whọ rẹ jọ họ oware nọ o mai woma nọ o rẹ sae via k’owhẹ. Ọghẹnẹ o ti wuhrẹ owhẹ epanọ whọ rẹ rọ were eva je wo ufuoma; ọ te k’owhẹ ufuoma rono erọwọ ethọthọ gbe iruemu enwoma buobu. Ọ te kezọ kẹ elẹ ra. O ti fiobọhọ k’owhẹ reawere ọ udhedhẹ gbe evaifihọ obeva. (Olezi 71:5; 73:28) Ọghẹnẹ ọ te tha owhẹ uke evaọ etoke ẹbẹbẹ. (Olezi 18:18) Yọ Ọghẹnẹ ọ te k’owhẹ okẹ uzuazọ ebẹdẹ bẹdẹ.​—Ahwo Rom 6:23.

Nọ who bi sikẹle Ọghẹnẹ na, who ti sikẹle egbẹnyusu Ọghẹnẹ. A ti zihe ruọ egbẹnyusu ra re. Evaọ uzẹme, a te jọ wọhọ inievo k’owhẹ. Eva e te were ae re a wuhrẹ owhẹ kpahe Ọghẹnẹ yọ a ti fiobọhọ k’owhẹ jẹ tuduhọ owhẹ awọ.

Ma rrọ ẹrẹrẹe kugbe Ọghẹnẹ hẹ. Nọ whọ be gwọlọ usu kugbe Ọghẹnẹ na, who re wo otoriẹ uzẹme jọ nọ o r’oja hrọ. Usu kugbe Ọghẹnẹ o rrọ usu ọ imava nọ e rrọ ẹrẹrẹe he. Ọ kpako je wo areghẹ jẹ ga vi omai thethabọ. Ọye họ Osu mai nọ o fo. Fikiere otẹrọnọ ma gwọlọ jọ ogbẹnyusu riẹ, ma rẹ gaviezọ kẹe je ru oware nọ ọ ta k’omai nọ ma ru hrọ. Onana o te wha ewoma s’omai.​—Aizaya 48:18.