Re whọ jọ ogbẹnyusu Ọghẹnẹ, u fo nọ who re wuhrẹ kpahe iẹe. Kọ egbẹnyusu ra e riẹ je bi se odẹ ra? Ẹhẹ. Ọghẹnẹ ọ gwọlọ nọ whọ riẹ je se odẹ riẹ re. Odẹ Ọghẹnẹ họ Jihova. (Olezi 83:18; Matiu 6:9) Who re je wuhrẹ kpahe oware nọ ọ gwọlọ gbe onọ ọ gwọlọ họ. U fo re whọ riẹ egbẹnyusu riẹ gbe ewegrẹ riẹ. Re a riẹ ohwo o rẹ rehọ oke. Ebaibol na ọ ta nnọ o rrọ oware areghẹ re a ruẹrẹ oke fihọ ro wuhrẹ kpahe Jihova.​—Ahwo Ẹfẹsọs 5:15, 16.

Egbẹnyusu Ọghẹnẹ a re ru oware nọ o rẹ were iẹe. Roro kpahe egbẹnyusu ra. Otẹrọnọ who yeri kugbe ai yoyoma je ru eware nọ a mukpahe, kọ a rẹ gbẹ jọ egbẹnyusu ra? Vievie! Epọvo na re, otẹrọnọ whọ gwọlọ jọ ogbẹnyusu Ọghẹnẹ o gwọlọ nọ who re ru oware nọ o rẹ were iẹe.​—Jọn 4:24.

Orọnikọ egagọ kpobi e rẹ wha usu kugbe Ọghẹnẹ ze he. Jesu, ọnọ ọ rrọ ogbẹnyusu nọ ọ mae kẹle Ọghẹnẹ na, ọ t’ẹme kpahe idhere ivẹ. Edhere jọ ọ rrọ kẹkẹe yọ ahwo a vọ riẹ eva. Edhere ọyena o bi su kpohọ ọraha. Edhere ọdekọ na ọ rrọ hwahwa yọ umutho ahwo ọvo a be nyae. Edhere ọyena o bi su kpohọ uzuazọ ebẹdẹ bẹdẹ. Onana u dhesẹ nnọ otẹrọnọ whọ gwọlọ wo usu kugbe Ọghẹnẹ, who re wuhrẹ edhere ọgbagba nọ a rẹ rọ gọe hrọ.​—Matiu 7:13, 14.