1, 2. Eme ma re ru re Ọghẹnẹ o gbe you omai?

MAI kpobi na ma gwọlọ omokpokpọ. Fikiere ma rẹ daoma re emamọ emu, zaha arozaha oma-uru-jaja ẹsikpobi, jẹ rẹrote omamai ziezi. Dede nọ re ma ru eware nana o lọhọ tere he, ma re ru ai ghele keme eva e rẹ were omai nọ ma tẹ ruẹ nọ e be ginẹ lẹliẹ omai wo omokpokpọ. Rekọ u wo abọ ọfa nọ o jọ gwọlọ nọ ma rẹ jọ sasasa hayo wo omokpokpọ.

² Dede nọ ma wuhrẹ kpahe Jihova je zihe ruọ egbẹnyusu riẹ no, o gwọlọ nọ ma re ru eware nọ e rẹ lẹliẹ usu na jọ gaga. Nọ Jud ọ jẹ tuduhọ Ileleikristi awọ inọ jọ a “ru eware nọ Ọghẹnẹ o re ro you [rai],” ọ fodẹ epanọ a sai ro ru ere. Ọ ta kẹ ae nọ: “Wha kru oma ga evaọ ẹrọwọ ọrẹri rai.” (Jud 20, 21) Ẹvẹ ma sai ro wo ẹrọwọ ọgaga?

3-5. (a) Ẹvẹ Setan ọ gwọlọ nọ who rri izi Jihova? (b) Ẹvẹ who rri izi gbe ehri-izi Jihova?

³ O roja gaga re u mu owhẹ ẹro nọ idhere Jihova e mai woma. Setan ọ gwọlọ nọ who roro nọ izi Ọghẹnẹ i keke hrọ, gbe inọ whọ tẹ be jiroro oware nọ u woma  gbe onọ u yoma kẹ omara ẹsiẹe eva e te mae rọ were owhẹ. Anwọ oke ọgbọ Idẹn ze, Setan ọ be rọ rehọ onana viẹ ahwo họ. (Emuhọ 3:1-6) Yọ o gbe bi ru epọvo na nẹnẹ re.

⁴ Kọ Setan ọ ta gba? Kọ izi Jihova i gine keke hrọ? Ijo. Joma ta kpahe oriruo nana, ma rehọ iẹe nọ whọ be nya evaọ ọgbọ owoma jọ. Kẹsena who te muẹrohọ nọ a di ogba ukpekpehru jọ họ abọjọ ọgbọ na. Ẹsejọhọ whọ be jọ udu ra roro nọ, ‘Fikieme a rọ rehọ ogba na bru omẹ dhe re mẹ siọ abọ obei ba ẹnya?’ Rekọ okioke yena, who te yo edo okpohrokpo nọ o bi do enu evaọ abọ obei ogba na. Kọ ẹvẹ who ti rri ogba na obọnana? Who ti yere Ọghẹnẹ nọ a rọ ma ogba na fihọ etẹe re okpohrokpo na ọ siọ owhẹ ba ẹre no. Izi Jihova e wọhọ ogba na, yọ Ẹdhọ ọ wọhọ okpohrokpo yena. Ebaibol na ọ vẹvẹ omai unu nọ: “Wha sẹro iroro rai, wha hai rou. Ọwegrẹ rai, Ẹdhọ, ọ be nya kpenẹ avọ enẹ wọhọ okpohrokpo nọ o bi do enu, be gwọlọ ohwo nọ ọ rẹ re no.”​—1 Pita 5:8.

⁵ Jihova ọ gwọlọ nọ ma wo evawere evaọ uzuazọ. Ọ gwọlọ nọ ma kuvẹ hẹ re Setan ọ viẹ omai họ. Fiki oye ọ rọ kẹ omai izi gbe ehri-izi re e thọ omai je ru eva were omai. (Ahwo Ẹfisọs 6:11) Jemis o kere nọ: “Ohwo nọ o re rri uzi ogbagba nọ o rẹ wha ufuoma ze na kokodo, ọ vẹ jẹ ruabọhọ iẹe, . . . o ti wo evawere evaọ oware nọ o bi ru na.”​—Jemis 1:25.

6. Ẹvẹ o sai ro mu omai ẹro inọ idhere Ọghẹnẹ e mai woma?

⁶ Ma te bi ru lele ọkpọvio Jihova, ma re wo evawere evaọ uzuazọ yọ usu mai kugbei o rẹ kpekpe ziezi. Wọhọ oriruo, ma re wo erere nọ ma tẹ be hae lẹ sei  ẹsikpobi wọhọ epanọ ọ ta nọ ma ru na. (Matiu 6:5-8; 1 Ahwo Tẹsalonika 5:17) Eva e rẹ were omai nọ ma te ru lele ujaje riẹ nọ o ta nọ ma hai kuomagbe gọe jẹ tuduhọ ohwohwo ahwo, gbe okenọ ma tẹ be roma kẹ iruo usi uwoma ota na. (Matiu 28:19, 20; Ahwo Galesha 6:2; Ahwo Hibru 10:24, 25) Ma te roro kpahe epanọ ekpọvio riẹ yena e rọ bọ ẹrọwọ mai ga no, u ti mu omai ẹro viere inọ idhere Jihova e ginẹ mai woma.

7, 8. Eme o ti fiobọhọ kẹ omai nọ ma gbẹ te rọ ruawa edawọ nọ i ti te omai evaọ obaro ho?

⁷ Ẹsejọhọ ma be ruawa inọ ma te sai kru ẹrọwọ mai hi nọ ma tẹ rẹriẹ ovao ku edawọ ilogbo evaọ obaro. Otẹrọnọ ere o rrọ owhẹ oma, kareghẹhọ ẹme Jihova nana: “Mẹ Jihova, mẹ họ Ọghẹnẹ ra, Ọnọ o bi wuhrẹ owhẹ re who wo erere kẹ omara, Ọnọ o bi su owhẹ  evaọ edhere nọ u fo nọ whọ rẹ nya. Dodokọ whọ rẹ gaviezọ kẹ ijaje mẹ! Kẹsena udhedhẹ ra o vẹ te jọ wọhọ ethẹ, Ẹrẹreokie ra o vẹ te jọ wọhọ ẹkporo abade.”​—Aizaya 48:17, 18.

⁸ Ma te yoẹme kẹ Jihova, udhedhẹ mai o te jọ wọhọ ethẹ nọ ọ rẹ kpọ họ, ẹrẹreokie mai ọ vẹ te jọ wọhọ ẹkporo obọ abade nọ ọ rẹ wọ ruọ okpa ẹsikpobi. Ghelọ oware kpobi nọ o via kẹ omai kẹhẹ, ma sai kru ẹrọwọ mai. Ebaibol ọ ya eyaa nọ: “Gbolo owha ra kẹ Jihova, ọ te rẹrote owhẹ. Ọ rẹ kuvẹ vievie he re ohwo okiẹrẹe o kie.”​—Olezi 55:22.

9, 10. Eme u dhesẹ re ohwo ọ kpako?

⁹ Nọ who bi ru epanọ usu ra kugbe Jihova o rẹ rọ kpekpe na, whọ te rọ ere “nyaharo te ọkpako.” (Ahwo Hibru 6:1) Eme u dhesẹ re ohwo ọ kpako?

¹⁰ Orọnikọ re ohwo ọ kpako evaọ ikpe oye a be jọ etenẹ ta kpahe na ha. Re ohwo ọ nyaharo te ọkpako, u dhesẹ nọ o re mu usu okpekpe kugbe Jihova jẹ daoma wo ọkpọ eriwo riẹ. (Jọn 4:23) Pọl ukọ na o kere nọ: “Enọ i bi yeri uzuazọ rai lele uwo na a re fi iroro rai họ eware uwo, rekọ enọ i bi yeri uzuazọ rai lele ẹzi na a re fi iroro rai họ eware ẹzi na.” (Ahwo Rom 8:5) Ohwo nọ ọ kpako ọ rẹ rọ uzuazọ riẹ le omaweromẹ hayo eware akpọ na ha. Ukpoye, ọ rẹ tẹrovi egagọ Jihova, yọ ọ rẹ jẹ emamọ iroro evaọ uzuazọ. (Itẹ 27:11; se Jemis 1:2, 3.) Ọ rẹ kuvẹ hẹ re amọfa a gele iei họ ru oware uyoma. Ohwo nọ ọ kpako ọ rẹ riẹ oware nọ u woma jẹ gbaemu nọ o re ru ei.

11, 12. (a)  Eme Pọl ọ ta kpahe “ẹgba orimuo” Oleleikristi? (b) Ẹvẹ Oleleikristi nọ ọ kpako ọ rọ wọhọ ohwo nọ ọ rẹ dhẹ ohrẹ?

 ¹¹ O rrọ oware asohẹrioke he re ohwo ọ nyaharo te ọkpako. Pọl ukọ na o kere nọ: “Emu ọgaga ọ rrọ kẹ ahwo nọ a kpako, enọ i wuhrẹ ẹgba orimuo rai no ẹkwoma iruo nọ a be rehọ iẹe ru, re a sai vuhu oware uwoma gbe uyoma.” (Ahwo Hibru 5:14) “Wuhrẹ” nọ a jọ etenẹ fodẹ na, o sai ru omai roro kpahe epanọ ohwo nọ ọ rẹ odhẹ ohrẹ o re wuhrẹ omariẹ.

¹² Ma tẹ ruẹ ohwo otiọye nọ ọ be dhẹ ohrẹ, ma rẹ riẹ nọ ọ raha oke wuhrẹ omariẹ gaga taure ọ tẹ te riẹ ohrẹ ẹdhẹ ziezi na. Orọnikọ ọ riẹ ohrẹ ẹdhẹ no eva ze he. Nọ a te yẹ ọmọ obọ, ọ rẹ riẹ iruo nọ abọ gbe awọ riẹ i re ru hu. Rekọ ẹmẹrera na, o ve ti wuhrẹ epanọ a rẹ rehọ abọ na kru oware je wuhrẹ epanọ a rẹ nya. Ọ tẹ kpako no, ọ sai wuhrẹ omariẹ te epanọ ọ rẹ rọ riẹ ohrẹ ẹdhẹ ziezi. Epọvo na re, o rẹ rehọ oke gbe ewuhrẹ ọgaga re ohwo o te ti zihe ruọ Oleleikristi nọ ọ kpako.

13. Eme o ti fiobọhọ kẹ omai wo ọkpọ iroro Jihova?

¹³ Evaọ obe nana, ma wuhrẹ epanọ ma sai ro wo ọkpọ iroro gbe eriwo Jihova no. Ma te je wuhrẹ epanọ ma re ro lele ehri-izi riẹ nọ e rrọ rọkẹ ewoma mai na. Nọ ma tẹ be jiroro, ma rẹ nọ omamai nọ: ‘Uzi hayo ehri-uzi Ebaibol vẹ o ta kpahe uyero nana? Ẹvẹ mẹ sai ro ru lele iei? Eme Jihova ọ gwọlọ nọ me ru evaọ uyero nana?’​—Se Itẹ 3:5, 6; Jemis 1:5.

14. Ẹvẹ ma sai ro ru ẹrọwọ mai ga viere?

¹⁴ O gwọlọ nọ ma re ru ẹrọwọ mai ga ẹsikpobi. Wọhọ epanọ emamọ emu ọ rẹ lẹliẹ oma ohwo ga na, ere ọvona ẹrọwọ mai ọ rẹ ga nọ ma tẹ be hai wuhrẹ  kpahe Jihova. Okenọ ma mu Ebaibol na họ ewuhrẹ obọ, ma wuhrẹ eware jọ kpahe Jihova gbe idhere riẹ. Nọ oke o be nyaharo na, o gwọlọ nọ ma re wuhrẹ eware ididi efa. Oyejabọ nọ Pọl o ro kere nọ: “Emu ọgaga ọ rrọ kẹ ahwo nọ a kpako.” Ma te fi eware nọ ma wuhrẹ họ iruo, ma ti wo areghẹ. Ebaibol na ọ vuẹ omai nọ: “Areghẹ họ oware nọ o mai wuzou.”​—Itẹ 4:5-7; 1 Pita 2:2.

15. Ẹvẹ uyoyou nọ ma wo kẹ Jihova gbe inievo mai u wuzou te?

¹⁵ Ohwo ọ sai wo omokpokpọ jẹ goma, rekọ o gwọlọ nọ ọ rẹ hae rẹrote omariẹ ẹsikpobi re ọ gbẹ mọ họ. Epọvo na re, ohwo nọ ọ kpako ọ rẹ riẹ nọ o gwọlọ omodawọ gaga re usu riẹ kugbe Jihova o gbẹ kpekpe viere. Pọl ọ kareghẹhọ omai nọ: “Wha hae dawo sọ wha gbẹ rrọ ẹrọwọ na; wha hai dhesẹ oghẹrẹ ohwo nọ wha rrọ via.” (2 Ahwo Kọrint 13:5) Ghele na, orọnikọ ma te wo ẹrọwọ ọgaga yọ u re no ho. O gwọlọ nọ uyoyou mai kẹ Jihova gbe inievo mai evaọ ukoko na o rẹ gbẹ rro haro. Pọl ọ ta nọ: “Me te wo . . . eriariẹ, me te je wo ẹrọwọ ziezi te epanọ mẹ sai ro si igbehru no oria nọ e rrọ, rekọ me wo uyoyou hu, mẹ yọ oware ovo ho.”​—1 Ahwo Kọrint 13:1-3.

16. Ẹvẹ Setan ọ gwọlọ nọ ma roro?

¹⁶ Setan ọ gwọlọ ru omai roro nọ ma sai ru eva were Jihova ha. Ọ tẹ jẹ gwọlọ ru omai roro nọ ebẹbẹ mai e sai kuhọ vievie he, jẹ gwọlọ whrehe omai udu. Ọ gwọlọ nọ ma fievahọ inievo mai hi, yọ ọ gwọlọ nọ ma wereva ha. (Ahwo Ẹfisọs 2:2) Setan ọ riẹ nọ ma tẹ be hai roro nọ ma fioka ha, o te raha usu mai kugbe Jihova  je kpomahọ omai yoyoma. Rekọ Jihova ọ kẹ omai oware nọ ma sai ro fi iroro itieye kparobọ. Oye họ ẹruore.

17. Ẹvẹ ẹruore o wuzou te?

¹⁷ Evaọ 1 Ahwo Tẹsalonika 5:8, Ebaibol na ọ rọ ẹruore mai dhesẹ etu-ọgaga nọ osoja o re kuhọ uzou nọ o rẹ thọe evaọ ẹmo, Ebaibol o se etu yena “ẹruore esiwo na.” Ma te fievahọ eyaa Jihova, o te sẹro udu mai no iroro ọ me fioka ha.

18, 19. Ẹvẹ ẹruore o ro fiobọhọ kẹ Jesu?

¹⁸ Ẹruore nọ Jesu o wo u fiobọhọ kẹe gaga. Evaọ aso urere nọ ọ jọ otọakpọ, ebẹbẹ i je tei unọjọ utọjọ. Ogbẹnyusu ọkpekpe riẹ o vivie i rie. Ọfa ọ se riẹ thahe thahe. Enọ i kiọkọ e dhẹ siọ iẹe ba. Ahwo ẹwho obọriẹ dede a kpareso iẹe, je ru nọ o ro whu uwhu  oja. Eme o fiobọhọ kẹe thihakọ olahiẹ ogaga nana? “Fiki oghọghọ nọ a fihọ aro riẹ o thihakọ ure-oja, ọ daezọ omovuọ họ, yọ enẹna ọ keria obọze agbara-uvie Ọghẹnẹ.”​—Ahwo Hibru 12:2.

¹⁹ Jesu ọ riẹ nọ o te kru ẹrọwọ riẹ te urere, o te wha orro se Jihova je dhesẹ nọ Setan ginọ ọtọrue. Ẹruore nana ọ kẹ riẹ evawere gaga. Ọ tẹ jẹ riẹ nọ kẹle na o ti kuomagbe Ọsẹ riẹ evaọ obọ odhiwu. Ẹruore nana o fiobọhọ kẹe thihakọ. Wọhọ Jesu, o gwọlọ nọ ma rẹ tẹrovi ẹruore mai. Onana u ti fiobọhọ kẹ omai thihakọ ghelọ uyero kpobi nọ ma rrọ kẹhẹ.

20. Eme o ti fiobọhọ kẹ owhẹ wo evawere?

²⁰ Jihova o bi muẹrohọ ẹrọwọ gbe akothiho ra. (Aizaya 30:18; se Malakae 3:10.) Ọ ya eyaa nọ o ti “ru ẹgwọlọ udu ra kẹ owhẹ.” (Olezi 37:4) Fikiere, tẹrovi  ẹruore nọ who wo. Setan ọ gwọlọ ru udu whrehe owhẹ je ru owhẹ roro nọ Jihova o ti ru eyaa riẹ gba ha. Who du wo iroro itieye vievie he! Who te muẹrohọ nọ whọ be dina wo avro kpahe eyaa Ọghẹnẹ, lẹ se Jihova re o fiobọhọ kẹ owhẹ. Kareghẹhọ ẹme nọ ọ rrọ Ahwo Filipai 4:6, 7 na: “Wha ruawa kpahe oware ovo ho, rekọ evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu rai gbe ogaga iroro rai ẹkwoma Kristi Jesu.”

21, 22. (a) Ẹvẹ Jihova ọ gwọlọ nọ akpọ na ọ rẹ jọ? (b) Eme whọ gba riẹ mu nọ who ti ru?

²¹ Hae rọ oke jọ roro didi kpahe eyaa igbunu nọ e rrọ obaro na. Kẹle na, ohwo kpobi nọ ọ rrọ uzuazọ ọ te gọ Jihova. (Eviavia 7:9, 14) Dai roro epanọ uzuazọ o te were te evaọ akpọ ọkpokpọ na. A sae ruẹ unu gbiku riẹ hẹ! Setan, idhivẹri riẹ gbe emuemu kpobi e te gbẹ jọ họ. Whọ te gbẹ mọ họ, yọ who ti whu gbe he. Ukpoye, kẹdẹ kẹdẹ whọ te hae rọwo no ehwa ze avọ omokpokpọ gbe evawere. Ohwo kpobi o ti ku obọ kugbe ru akpọ na zihe ruọ aparadase. Ohwo kpobi ọ te re emamọ emu je wo emamọ oria nọ ọ rẹ rria. Ahwo a gbe ti wo eva egaga hayo ru ozighi hi, ukpoye a te jọ wowou kugbe ohwohwo. Ẹmẹrera na, ahwo-akpọ kpobi a ve ti wo “ufuoma oruaro ọrọ emọ Ọghẹnẹ.”​—Ahwo Rom 8:21.

²² Jihova ọ gwọlọ nọ who mu usu okpekpe kugbe ei. Fikiere, hae daoma yoẹme kẹ Jihova, jẹ hai si kẹle iẹe kẹdẹ kẹdẹ. Ajọ mai kpobi ma gbẹ hai ru eware nọ Ọghẹnẹ o re ro you omai ẹsikpobi.​—Jud 21.