“Eva e were enọ i bi yo ẹme Ọghẹnẹ je bi koko iei!”​—Luk 11:28, Efafa Akpọ Ọkpokpọ.

O rẹ lẹliẹ uyoyou jọ uviuwou ra.​—Ahwo Ẹfisọs 5:28, 29.

U ti fiobọhọ kẹ owhẹ avọ ahwo uviuwou ra wo adhẹẹ kẹ ohwohwo.​—Ahwo Ẹfisọs 5:33.

O rẹ lẹliẹ udhedhẹ jọ uwou ra.​—Mak 10:6-9.

Ee, fiki eware ivẹ jọ:

• Ọghẹnẹ họ ọnọ ọ to uviuwou kpobi họ. Ebaibol na ọ ta nọ Jihova Ọghẹnẹ họ “ọnọ ọ kẹ uviuwou kpobi . . . odẹ.” (Ahwo Ẹfisọs 3:14, 15) Onana u dhesẹ nọ ọye ọ to uviuwou họ. Fikieme o rọ gwọlọ nọ ma vuhu onana mu?

  Roro kpahe onana: Whọ tẹ be re emu nọ ọ were gaga, yọ whọ gwọlọ riẹ eware nọ a ro there emu na, ono whọ rẹ nọ? Avro ọ riẹ hẹ, ohwo nọ o there emu na.

  Epọvo na re, ma tẹ gwọlọ riẹ eware nọ e rẹ lẹliẹ ahwo uviuwou wo evawere, Jihova nọ ọ to uviuwou họ na ma rẹ nyabru.​—Emuhọ 2:18-24.

• Ọghẹnẹ ọ be daezọ ra. O rrọ oware areghẹ gaga re uviuwou kpobi u wuhrẹ kpahe ehrẹ Jihova nọ e rrọ Ebaibol na, je ru lele ai. Fikieme? “Keme ọ be daezọ rai.” (1 Pita 5:6, 7) Jihova ọ gwọlọ nọ eware i woma kẹ owhẹ, yọ ewoma o re noi ze oke kpobi nọ ohwo o te ru lele ohrẹ riẹ.​—Itẹ 3:5, 6; Aizaya 48:17, 18.