Abọ 7

Ọghẹnẹ O Siwi Emọ Izrẹl no Igbo

Jihova ọ rehọ uye te Ijipti, Mosis o te su emọ Izrẹl no ẹkwotọ yena. Ọghẹnẹ ọ rọ ẹkwoma Mosis kẹ emọ Izrẹl Uzi na

EMỌ Izrẹl a rria Ijipti ikpe buobu, a je vi, uzuazọ u je woma kẹ ai. Rekọ Fẹro ọkpokpọ o te muhọ esuo. Ovie nana ọ riẹ Josẹf ho. Fikinọ osu ọgeva nana ọ jẹ ruawa kpahe ubu emọ Izrẹl, o te zihe ae ruọ erigbo, je juzi inọ a gbolo ọmọzae ohwo Izrẹl kpobi nọ a yẹ fihọ Ethẹ Naele. Rekọ oni jọ nọ ọ wharo ziezi o siwi ọmọzae ọboba riẹ, ọ wọ riẹ họ ekete je si ei no họ udevie ikpoko. Ọmọtẹ Fẹro o duku ọmọboba na, o te sei Mosis, jẹ rehọ iẹe nyae yọrọ evaọ uwou ovie Ijipti.

Nọ Mosis ọ kpako te ikpe udhuvẹ no, o te kie ruọ ẹbẹbẹ okenọ ọ jẹ gwọlọ thọ ọrigbo Izrẹl jọ no obọ ohwo Ijipti jọ nọ ọ jọ osu iruo. Mosis ọ tẹ dhẹ kpohọ ugbothabọ, ẹkwotọ erara. Okenọ ọ kpako te ikpe udhone no, Jihova o te vi ei zihe kpohọ Ijipti inọ ọ nya bru Fẹro jẹ ta kẹe nọ o si obọ no ahwo Riẹ.

Fẹro ọ se thahe thahe. Fikiere Ọghẹnẹ ọ tẹ rehọ iye ikpe te Ijipti. Oke kpobi nọ Mosis ọ nya bru Fẹro, onọ o rẹ kẹe uvẹ nọ ọ sae rọ whaha uye ofa nọ u re te Ijipti, Fẹro o ve veghe uzou jẹ rọ Mosis avọ Ọghẹnẹ riẹ Jihova se ẹkoko. Ukuhọ riẹ, uye avọ ikpe na o tẹ wha uwhu se emọ ọtuyẹ kpobi evaọ Ijipti—ajokpaọ erọ iviuwou nọ i yoẹme Jihova nọ a rọ azẹ omogodẹ nọ a kpe ro wholo inuethẹ rai. Ukọ-odhiwu nọ Ọghẹnẹ o vi nyai kpe emọ ọtuyẹ na ọ nya iwou itieye na vrẹ. No umuo oke yena vrẹ, orẹwho Izrẹl o tẹ jẹ hai ru ekareghẹhọ esiwo igbunu nana ẹkwoma ehaa ẹsiẹvo ẹgbukpe nọ a re se Ọnyavrẹ.

Nọ ọmọzae ọkpako riẹ o whu no, Fẹro ọ tẹ ta kẹ Mosis avọ emọ Izrẹl kpobi inọ a no Ijipti. Aikpobi a te koko oma họ re a nya no Ijipti. Rekọ Fẹro o te nwene iroro. Ọ tẹ rehọ ogbaẹmo gbe ekẹkẹ-ẹmo buobu mu ai họ ele. Nọ emọ Izrẹl a te Abade Ọwawae na, o tẹ wọhọ nọ a ko rai họ no. Jihova ọ tẹ hẹriẹ Abade Ọwawae na, emọ Izrẹl a tẹ nya otọ oyaya vrẹ, avọ ame na nọ o wọhọ ugbẹhẹ evaọ tabọ tabọ! Nọ ahwo Ijipti a rọ kpahe ae ruọ otọ oyaya abade na, Ọghẹnẹ o te ru ame na wọ zihe ze, Fẹro avọ ogbaẹmo riẹ a tẹ da ame whu.

Uwhremu na nọ emọ Izrẹl a jọ akotọ Ugbehru Saena, Jihova ọ tẹ reọvọ kugbe ae. Ẹkwoma Mosis nọ ọ jọ amiunugu, Ọghẹnẹ ọ kẹ emọ Izrẹl izi nọ e rẹ kpọ jẹ thọ ae evaọ kabọ kabọ uzuazọ. Nọ emọ Izrẹl a te koko izi Ọghẹnẹ, Ọghẹnẹ ọ rẹ jọ kugbe ai jẹ rọ ẹkwoma orẹwho rai wha eghale se amọfa.

Rekọ emọ Izrẹl buobu a ru Ọghẹnẹ eva dha ẹkwoma aghẹmeeyo rai. Fikiere Jihova o te ru nọ oge ọyena ọ rọ jọ udhude na ghoro ikpe udhuvẹ. Kẹsena Mosis ọ tẹ rehọ Joshua, ọzae okiẹrẹe na mu re ọ rehọ ẹta ọyomariẹ. Ukuhọ riẹ, orẹwho Izrẹl o tẹ ruẹrẹ oma kpahe re a ruọ otọ nọ Ọghẹnẹ ọ ya eyaa riẹ kẹ Abraham na.

—Wọhọ epanọ o rrọ obe Ọnyano; Iruo-Izerẹ; Ikelakele; Iziewariẹ; Olezi 136:10-15; Iruẹru Ikọ Na 7:17-36.

◼ Ẹvẹ Ọghẹnẹ ọ rọ salọ Mosis ro siwi emọ Izrẹl no igbo?

◼ Eme ọ wha ehaa Ọnyavrẹ na ze?

◼ Oghẹrẹ vẹ Jihova o ro siwi emọ Izrẹl no igbo Ijipti?

[Etehe nọ e rrọ ẹwẹ-obe avọ 10]

UZI NỌ O MAE RRO NA

O wọhọ nọ Ijaje Ikpe na, nọ e rrọ Ọnyano 20:1-17 na họ enọ ahwo a mae riẹ evaọ usu oware wọhọ izi egba ezeza (600) nọ a rọ ẹkwoma Mosis kẹ emọ Izrẹl na. Rekọ okenọ a nọ Jesu Kristi kpahe uzi nọ o mae rro evaọ izi Ọghẹnẹ na kpobi, o te yo nọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.”—Mak 12:28-30; Iziewariẹ 6:5.

[Uwoho nọ e rrọ ẹwẹ-obe avọ 10]

Emuhọ

● Ọnyano

● Iruo-Izerẹ

● Ikelakele

● Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Hosia

Joẹl

Emọs

Obedaya

Jona

Maeka

Nahum

Habakuk

Zefanaya

Hagai

Zekaraya

Malakae

Matiu

Mak

Luk

Jọn

Iruẹru Ikọ Na

Ahwo Rom

1 Ahwo Kọrint

2 Ahwo Kọrint

Ahwo Galesha

Ahwo Ẹfẹsọs

Ahwo Filipai

Ahwo Kọlọsi

1 Ahwo Tẹsalonika

2 Ahwo Tẹsalonika

1 Timoti