Abọ 1

Ọmemama na Ọ Ruẹrẹ Aparadase họ kẹ Ohwo-Akpọ

Ọghẹnẹ ọ ma ehru gbe otọakpọ na gbe eware nọ e rrọ uzuazọ; ọ ma ọzae gbe aye nọ a jọ gbagba, o fi rai họ emamọ ọgbọ nọ o wo erru, ọ tẹ jẹ kẹ ae izi nọ a re koko

A DHESẸ eme nọ i mu Ebaibol na họ wọhọ ẹme-emuhọ nọ ọ mae viodẹ evaọ usu ebe kpobi nọ a kere no. “Evaọ emuhọ Ọghẹnẹ ọ ma odhiwu gbe akpọ.” (Emuhọ 1:1) Ebaibol na e rehọ eme urirẹ ivevẹ yena ro dhesẹ Ọnọ ọ mae viodẹ evaọ Ikereakere Efuafo na—Ọghẹnẹ Erumeru na, Jihova. Owọ ọsosuọ Ebaibol na u dhesẹ via inọ Ọghẹnẹ họ Ọnọ ọ ma idedeghe gbe otọakpọ na. Awọ Ebaibol nọ i lele i rie i dhesẹ inọ evaọ etoke jọ nọ a rọ edhere ẹwoho se edẹ, Ọghẹnẹ ọ tẹ te ruẹrẹ otọakpọ na họ kẹ epanọ ohwo-akpọ ọ rẹ rọ rriae, ma eware igbunu buobu nọ e rrọ otọakpọ na.

Ohwo-akpọ ọ mae rro evaọ usu eware kpobi nọ Ọghẹnẹ ọ ma fihọ otọakpọ na. A ma ohwo evaọ uwoho Ọghẹnẹ—nọ u ru rie wo ọkpọ ekwakwa-aghae Jihova Ọghẹnẹ, wọhọ uyoyou gbe areghẹ. Ovu otọ na Ọghẹnẹ ọ rọ ma ohwo. Ọghẹnẹ o se rie Adamu, o te fi ei họ aparadase—ọgbọ Idẹn. Ọghẹnẹ ọvo ọ ruẹrẹ ọgbọ yena họ, avọ emamọ ire sa-sa nọ e rẹ mọ ibi.

Ọghẹnẹ ọ ruẹ nọ u fo re ọzae na o wo ọrivẹ. Ọghẹnẹ ọ tẹ rehọ ubiofẹ Adamu jọ ma aye jẹ rehọ iẹe kẹe wọhọ aye riẹ, ọnọ o se Ivi uwhremu na. Avọ evawere, Adamu ọ tẹ ta eme-ọketa, anọ: “Enẹna, ọnana họ onwa enwa mẹ, gbe uwou uwou-oma mẹ.” Ọghẹnẹ ọ tẹ ta nọ: “Fikiere ọzae ọ rẹ se ọsẹ gbe oni riẹ ba, ọ vẹ gbalọ aye riẹ, a vẹ jọ uwo ovo.”—Emuhọ 2:22-24; 3:20.

Ọghẹnẹ o jie izi ivẹ kẹ Adamu avọ Ivi. Orọ ọsosuọ, ọ ta kẹ ae nọ a kporo otọ na jẹ sẹro riẹ, je yẹ emọ vọ otọakpọ na soso. Orọ avivẹ, evaọ usu ire ogba na soso ọ ta kẹ ae inọ a re ubi ọjọ họ, “ure ẹriẹ ewoma gbe eyoma na.” (Emuhọ 2:17) A tẹ ghẹmeeyo, a ti whu. Ẹkwoma izi yena nọ ọ kẹ rai, Ọghẹnẹ ọ kẹ ọzae avọ aye na uvẹ nọ a re ro dhesẹ inọ a ginẹ rehọ ọyomariẹ wọhọ Osu rai. Ẹmeoyo rai o re je dhesẹ uyoyou gbe edẹro rai via. U wo ẹjiroro buobu nọ a hae rọ jẹ esuo oyoyou riẹ rehọ. Aimava na a jọ gbagba, oware ovo o jọ omarai thọ họ. Ebaibol e vuẹ omai nọ: “Ọghẹnẹ ọ tẹ ruẹ nọ eware kpobi nọ ọ ma na i re wowoma.”—Emuhọ 1:31.

—Wọhọ epanọ o rrọ obe Emuhọ uzou 1 gbe orọ avọ 2.

◼ Ẹvẹ Ebaibol na i dhesẹ nọ a rọ ma ohwo-akpọ gbe otọakpọ na?

◼ Oghẹrẹ uzuazọ vẹ Ọghẹnẹ ọ ruẹrẹhọ kẹ ọzae avọ aye ọsosuọ?

◼ Didi izi Ọghẹnẹ ọ kẹ ọzae avọ aye na?

[Etehe nọ e rrọ ẹwẹ-obe avọ 4]

ODẸ ỌGHẸNẸ

A jọ Ikereakere Efuafo na rọ edẹ-ova buobu se Ọghẹnẹ, ejọ rai họ Ọmemama gbe Ọghẹnẹ Erumeru. Edẹ-ova na jọ i dhesẹ ekwakwa-aghae Ọghẹnẹ, wọhọ ọrẹri, ogaga, ẹdhoguo-okiẹrẹe, areghẹ, gbe uyoyou. Rekọ Ọghẹnẹ ọ kẹ oma riẹ odẹ nọ u wo ibe he—Jihova. Evaọ evẹrẹ ọsosuọ nọ a ro kere Ebaibol na, odẹ nana o roma via te asia idu-ihrẹ (7,000), oria ọsosuọ nọ o jọ roma via họ Emuhọ 2:4. Otofa odẹ na Jihova họ “Ọnọ O re Ru Zihe Ro.” Onana o rẹ kẹ omosasọ, keme u dhesẹ inọ Ọghẹnẹ ọ rẹ sai ru ẹjiroro gbe eyaa riẹ kpobi gba.

[Omaa-iruo nọ e rrọ ẹwẹ-obe avọ 4]

● Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Hosia

Joẹl

Emọs

Obedaya

Jona

Maeka

Nahum

Habakuk

Zefanaya

Hagai

Zekaraya

Malakae

Matiu

Mak

Luk

Jọn

Iruẹru Ikọ Na

Ahwo Rom

1 Ahwo Kọrint

2 Ahwo Kọrint

Ahwo Galesha

Ahwo Ẹfẹsọs

Ahwo Filipai

Ahwo Kọlọsi

1 Ahwo Tẹsalonika

2 Ahwo Tẹsalonika

1 Timoti

2 Timoti

Taitọs

Filimọn

Ahwo Hibru

Jemis

1 Pita

2 Pita

1 Jọn

2 Jọn

3 Jọn

Jud

Eviavia