A Ku Aparadase Fiẹ
Abọ 2
A Ku Aparadase Fiẹ
Ukọ-odhiwu jọ nọ ọ kpareso Ọghẹnẹ ọ lẹliẹ Adamu avọ Ivi họ siọ esuo Ọghẹnẹ. O tẹ wha uzioraha gbe uwhu ze
TAURE Ọghẹnẹ ọ tẹ te ma ohwo-akpọ, ọ kake ma emama ẹzi jọ nọ ma rẹ ruẹ hẹ, ikọ-odhiwu. Evaọ ọgbọ Idẹn, ukọ-odhiwu jọ nọ ọ kpareso Ọghẹnẹ, ọnọ a riẹ uwhremu na wọhọ Setan Ẹdhọ na, ọ rọ ẹghẹ lẹliẹ Ivi họ re ubiure nọ Ọghẹnẹ ọ ta nọ a re he.
Ẹkwoma araomuomu nọ o ro dhe aro ta ẹme, Setan ọ ta inọ Ọghẹnẹ ọ be gbọ aye na avọ ọzae riẹ emamọ oware jọ. Ukọ-odhiwu na ọ vuẹ Ivi inọ tei te ọzae riẹ a ti whu hu a tẹ re ubiure nọ a ta kẹ ae nọ a re he na. Setan ọ rọ ere bọwo Ọghẹnẹ ota inọ ọ be ta ọrue kẹ ahwo-akpọ, emọ riẹ. Ọviẹahwohọ na ọ rọ ere ta inọ ahwo a tẹ ghẹmeeyo kẹ Ọghẹnẹ, ẹsiẹe a re wo ufuoma je rovie aro. Rekọ onana yọ ọrue—ẹhẹ, ọrue ọsosuọ nọ a gu evaọ akpọ na. Udu esuo ehrugbakpọ Ọghẹnẹ họ ugogo oware nọ Setan ọ wha avro fihọ na—sọ Ọghẹnẹ o wo udu nọ o re ro su gbe sọ o bi su evaọ edhere okiẹrẹe nọ o rẹ kẹ ahwo-akpọ erere.
Ivi ọ rọwo ọrue Setan na. Ubiure na u te mu ei urru họ esio, ọ tẹ riẹe. Uwhremu na, ọ tẹ rọ kẹ ọzae riẹ, ọ tẹ jẹ re. A tẹ rọ ere zihe ruọ erahaizi. Oware yena nọ a rẹ sai rri wọhọ oware osese na yọ ọkparesuọ. Ẹkwoma aro nọ a keke fihọ ghẹmeeyo kẹ uzi Ọghẹnẹ, Adamu avọ Ivi a siọ esuo Ọnọ ọ ma rai, nọ ọ kẹ rai eware kpobi, te uzuazọ ogbagba.
Ọghẹnẹ ọ kẹ ahwo nana nọ a kpareso esuo riẹ na uye. Ọ ta kpahe Ubi hayo Osiwi nọ ọ te tha nọ ọ te raha Setan, ọnọ a rọ araomuomu dhesẹ na. Ọghẹnẹ ọ kẹ Adamu avọ Ivi omoke nọ a gbẹ rọ jọ uzuazọ, rọ ere dhesẹ ohrọ kẹ emọ rai nọ a ri yẹ hẹ. Emọ yena a ti wo ẹruore jọ keme Ohwo nọ Ọghẹnẹ ọ ta nọ o ti vi ze na o ti si uye nọ ọkparesuọ evaọ Idẹn ọ wha ze na no. Epanọ ẹjiroro Ọghẹnẹ kpahe Osiwi nana o ti ro rugba—gbe ohwo nọ ọ te jọ Osiwi na—u dhesẹ oma via nọ ekere Ebaibol na ọ jẹ nyaharo ẹmẹrera na.
Ọghẹnẹ o le Adamu avọ Ivi no Aparadase na. A te royẹ, ruẹ uye evaọ obọ otafe ọgbọ Idẹn re a tẹ ruẹ emu re. Oke jọ o vrẹ no, Ivi o te dihọ je yẹ Keni, ọmọ ọsosuọ rai. A wo emezae gbe emetẹ efa re, te Ebẹle gbe Sẹt, ọnọ ọ jọ omọvo esẹ-ode Noa.
—Wọhọ epanọ o rrọ obe Emuhọ uzou avọ 3 rite orọ avọ 5; Eviavia 12:9.
◼ Eme họ ọrue ọsosuọ nọ a gu, kọ ono o gu rie?
◼ Ẹvẹ Adamu avọ Ivi a ro ku Aparadase fiẹ?
◼ Nọ Ọghẹnẹ ọ jẹ fodẹ uye nọ u ti te ahwo ọkparesuọ na, ẹruore vẹ Ọghẹnẹ ọ kẹ emọ rai nọ a ti yẹ?
[Ẹme nọ o dhesẹ uwoho nọ e rrọ ẹwẹ-obe avọ 5]
Ubi na “ọ rẹ te nwa owhẹ uzou, whọ vẹ te royẹe ithihrawọ.”—Emuhọ 3:15
[Etehe nọ e rrọ ẹwẹ-obe avọ 5]
SEBAẸGBA GBE UWHU
Ọghẹnẹ ọ ma Adamu avọ Ivi gbagba, avọ ẹjiroro re a rria bẹdẹ bẹdẹ evaọ Aparadase. Nọ a ghẹmeeyo kẹ Ọghẹnẹ, a rọ ere raha uzi. Adamu avọ Ivi a gbẹ gba ofa ha, a tẹ raha usu nọ a wo kugbe Jihova, Ọnọ ọ rẹ kẹ uzuazọ na. U te ru nọ te ae te emọ rai nọ a yẹ evaọ sebaẹgba a gbẹ sae va uzioraha gbe uwhu abọ họ.—Ahwo Rom 5:12.
[Omaa-iruo nọ e rrọ ẹwẹ-obe avọ 5]
Emuhọ ●
Ọnyano
Iruo-Izerẹ
Ikelakele
Iziewariẹ
Joshua
Ibruoziẹ
Rut
1 Samuẹle
2 Samuẹle
1 Ivie
2 Ivie
1 Iruẹru-Ivie
2 Iruẹru-Ivie
Ẹzra
Nehemaya
Ẹsta
Job
Ilezi
Itẹ
Ọtausiuwoma Na
Ole nọ O Vi Ile
Aizaya
Jerimaya
Enuobro
Izikiẹl
Daniẹl
Hosia
Malakae
Matiu
Mak
Luk
Jọn
Iruẹru Ikọ Na
Ahwo Rom
1 Ahwo Kọrint
2 Ahwo Kọrint
Ahwo Galesha
Ahwo Ẹfẹsọs
Ahwo Filipai
Ahwo Kọlọsi
1 Ahwo Tẹsalonika
2 Ahwo Tẹsalonika
1 Timoti
2 Timoti
Taitọs
Filimọn
Ahwo Hibru
Jemis
1 Pita
2 Pita
1 Jọn
2 Jọn
3 Jọn
Jud
Eviavia