Abọ 26

Aparadase O Zihe Ze No!

Ẹkwoma Uvie nọ Kristi o bi su, Jihova o ti ru odẹ Riẹ fo, kpare esuo Riẹ kpehru, je si eyoma kpobi notọ

EVIAVIA, obe urere Ebaibol na, u wo ovuẹ ẹruore kẹ ahwo-akpọ. Jọn ukọ na họ ọnọ o kere obe nana, yọ u wo eruẹaruẹ sa-sa nọ ukuhọ rai o wha orugba ẹjiroro Jihova ze.

Evaọ eruẹaruẹ ọsosuọ obe nana, Jesu nọ ọ kparoma ze no jẹ rrọ obọ odhiwu na o jiri jẹ rọ ọkpọvio kẹ ikoko jọ. Eruẹaruẹ nọ i lele onana i dhesẹ agbara-uvie Ọghẹnẹ evaọ obọ odhiwu, oria nọ ijẹle a be jọ jiri ei.

Nọ ẹjiroro Ọghẹnẹ ọ be rọ ẹmẹrera rugba na, a tẹ kẹ Jesu Kristi, Omogodẹ na, uko-obe jọ nọ a rọ eware ihrẹ fare di. Nọ a rra efarọ ene ọsosuọ, edhẹ-enyenya ẹwoho e tẹ ruọ akpọ na. Jesu họ ọrọ ọsosuọ, ọ dhẹ anyenya ọfuafo avọ etu uvie nọ o ro tu. Kẹsena edhẹ-enyenya esa edekọ na e tẹ lahwe yọ enyenya rai i wo ovioma sa-sa, nọ i dikihẹ kẹ ẹmo, ohọo, gbe ẹyao—eware nọ e be via evaọ edẹ urere eyero akpọ nana. Erovie ofarọ avihrẹ u ru nọ a ro kporo egba ihrẹ nọ i dhesẹ ẹdhoguo Ọghẹnẹ. Onana o tẹ wha iye ihrẹ ẹwoho erọ ofu Ọghẹnẹ ze.

A rehọ Uvie Ọghẹnẹ, onọ a dhesẹ wọhọ ọmọzae ọboba nọ a yẹ, ro mu evaọ obọ odhiwu. Ẹmo o du lahwe, a te le Setan avọ izi imuomu riẹ ziọ otọakpọ. Urru oruarua jọ o ta nọ: “O da omẹ kẹ owhai, o akpọ.” Ẹdhọ o wo ofu ọgaga, keme ọ riẹ nọ oke riẹ nọ u kiọkọ o rrọ kpẹkpẹe.—Eviavia 12:12.

Jọn ọ ruẹ Jesu, ọnọ a dhesẹ wọhọ omogodẹ, evaọ obọ odhiwu gbe ahwo idu udhuhrẹ gbe ene (144,000) nọ a salọ no otọakpọ ze. Enana i re ti “lele Kristi re uvie.” Enẹ obe Eviavia u ro dhesẹ via inọ ahwo 144,000 a ru abọ avivẹ ubi na via.—Eviavia 14:1; 20:6.

Isu akpọ na a koko oma họ kẹ Amagẹdọn, “ẹmo ologbo Ọghẹnẹ Erumeru na.” A fi ẹmo kugbe ọnọ ọ be dhẹ anyenya ọfuafo na—Jesu, ọnọ o bi su ogbaẹmo obọ odhiwu. A kpe isu akpọ nana kpobi. A tẹ gba Setan, Jesu avọ ibe isu 144,000 na a te su otọakpọ na “udhukpe usoi akuakpe.” Nọ udhukpe usoi akuakpe na e gba no, a te kpe Setan.—Eviavia 16:14; 20:4.

Eme esuo udhukpe usoi akuakpe ọrọ Kristi avọ ibe isu riẹ na o te wha se ahwo-akpọ nọ a yo ẹme? Jọn o kere nọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” (Eviavia 21:4) Akpọ na o veti zihe ruọ Aparadase!

Enẹ obe Eviavia u ro ku ovuẹ Ebaibol na họ. Uvie Mesaya na u ti ru odẹ Jihova fo, jẹ kpare udu esuo riẹ kpehru no ebẹdẹ rite ebẹdẹ!

—Wọhọ epanọ o rrọ obe Eviavia.

◼ Eme edhẹ-enyenya ẹwoho na i dikihẹ kẹ?

◼ Eware sa-sa vẹ e roma via nọ ẹjiroro Ọghẹnẹ o bi rugba na?

◼ Eme họ Amagẹdọn, kọ eme o ti noi ze?

[Etehe nọ e rrọ ẹwẹ-obe avọ 30]

“BABILỌN OLOGBO NA”

A jọ obe Eviavia dhesẹ egagọ erue kpobi—egagọ nọ e wọso Ọghẹnẹ uzẹme na wọhọ “ogberẹ ologbo na.” A se rie “Babilọn Ologbo na,” yọ ọ be zẹ omariẹ hayo bru-igberẹ kugbe ikpahwo esuo akpọ na. Obe Eviavia o ta nọ evaọ okenọ Ọghẹnẹ o fihọ, esuo akpọ na ọ te rẹriẹ ovao ku ogberẹ ologbo nana, a vẹ te raha iẹe muotọ.—Eviavia 17:1-5, 16, 17.

[Omaa-iruo nọ e rrọ ẹwẹ-obe avọ 30]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Matiu

Mak

Luk

Jọn

Iruẹru Ikọ Na

Ahwo Rom

1 Ahwo Kọrint

2 Ahwo Kọrint

Ahwo Galesha

Ahwo Ẹfẹsọs

Ahwo Filipai

Ahwo Kọlọsi

1 Ahwo Tẹsalonika

2 Ahwo Tẹsalonika

1 Timoti

2 Timoti

Taitọs

Filimọn

Ahwo Hibru

Jemis

1 Pita

2 Pita

1 Jọn

2 Jọn

3 Jọn

Jud

● Eviavia