Abọ 12

Areghẹ nọ O No Obọ Ọghẹnẹ Ze nọ A re ro Yeri Uzuazọ

Obe Itẹ yọ ekru ehrẹ nọ e rẹ kpọ ohwo evaọ uzuazọ ikẹdẹ kẹdẹ nọ a rọ ẹgba ẹzi Ọghẹnẹ kere fihọ otọ, yọ Solomọn o kere ibuobu rai

KỌ Jihova yọ Osu nọ o wo areghẹ? Edhere jọ nọ ọ mai muẹro nọ a re ro duku uyo onọ yena họ, ẹkiẹriwo oghẹrẹ ohrẹ nọ ọ rẹ kẹ. Kọ ohrẹ riẹ u re ru iruo? Kọ u re ru uzuazọ ohwo woma je waro? Ovie owareghẹ na Solomọn o kere itẹ buobu fihọ otọ. E ta kpahe enwenọ kabọ kabọ uzuazọ uyero. Muẹrohọ ejọ rai.

Eva nọ a re fihọ Ọghẹnẹ. Evaifihọ yọ ugogo oware nọ u re fi obọ họ kẹ omai yọrọ emamọ usu kugbe Jihova. Solomọn o kere nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” (Itẹ 3:5, 6) Nọ ohwo o te fi eva họ Ọghẹnẹ ẹkwoma ẹme Riẹ nọ o re yo gbe eriwo Riẹ nọ ọ rẹ gwọlọ evaọ oware kpobi nọ o bi ru, o re yeri uzuazọ evevọwẹ. Uzuazọ uyero utioye u re ru nọ ohwo o re ro ru eva were Ọghẹnẹ jẹ kẹe uyo nọ ọ rẹ ruẹ kpahe fihọ avro nọ ọwegrẹ Riẹ, Setan ọ kpare ze na.—Itẹ 27:11.

Areghẹ nọ a re ro yerikugbe amọfa. Ithubro nọ Ọghẹnẹ ọ kẹ ezae uwou-orọo, eyae uwou-orọo, gbe emọ i wiruo nẹnẹ vi epaọ anwẹdẹ kpobi. Ọghẹnẹ ọ hrẹ ọzae kpobi inọ ọ “wereva fiki aye nọ [ọ] rehọ evaọ oke ọmoha,” be rọ ere ta inọ aye riẹ ọvo o re wo isiuru owezẹ kẹ. (Itẹ 5:18-20) Eyae uwou-orọo a rẹ jọ obe Itẹ ruẹ udhesẹ isiuru orọ uruemu emamọ aye uwou-orọo nọ ọzae gbe emọ riẹ a re kuedẹ họ. (Itẹ, uzou avọ 31) A jariẹ kẹ emọ ohrẹ kpahe epanọ a re ro yoẹme kẹ esẹgbini rai. (Itẹ 6:20) Obe Itẹ u te je dhesẹ inọ u woma re ohwo o se amọfa gboma, re a wo egbẹnyusu, keme ohwo o te bi si oma no ahwo, o rẹ wha oriobọ ze. (Itẹ 18:1) Egbẹnyusu e rẹ sae lẹliẹ omai ru oware uwoma hayo uyoma, fikiere u fo nọ ma rẹ rọ areghẹ salọ ahwo nọ ma re lele nyusu.—Itẹ 13:20; 17:17.

Edhesẹ areghẹ evaọ ẹruorote omobọ ohwo. A rẹ jọ obe Itẹ ruẹ uvi ohrẹ kpahe ẹwhaha idieda-vrẹta, epanọ ma sae rọ kpọ iroro mai nọ ma jẹ sae wereva, whaha awaọruọ hayo ọkora, gbe epanọ ma re ro kru obọ ga evaọ iruo. (Itẹ 6:6; 14:30; 20:1) O vẹvẹ omai unu inọ ẹrorọsuọ iroro ohwo-akpọ viukpọ ohrẹ Ọghẹnẹ o rẹ wha okpẹtu ze. (Itẹ 14:12) O hrẹ omai inọ ma sẹro udu mai, sẹro riẹ no iroro iyoma, keme o kareghẹhọ omai inọ udu na “eyeri uzuazọ o bi no tha.”—Itẹ 4:23.

Ima ahwo buobu wariẹ akpọ na họ a ruẹ no inọ ẹnyalele ehrẹ nana u re ru uzuazọ ohwo woma. Onana o kẹ rai imuẹro nọ a rẹ rọ jẹ Jihova rehọ wọhọ Osu rai.

—Wọhọ epanọ o rrọ obe Itẹ.

◼ Eme ma rẹ sai wuhrẹ no obe Itẹ ze?

◼ Didi ohrẹ obe Itẹ o kẹ kpahe ẹrorọsuọ Ọghẹnẹ gbe epanọ a rẹ rọ rehọ areghẹ yeri kugbe amọfa jẹ rọ ẹro te omobọ ohwo?

[Etehe nọ e rrọ ẹwẹ-obe avọ 15]

ỌTAUSIUWOMA NA

Diẹse a sai jo duku evevọwẹ gbe uvi otofa evaọ uzuazọ? Solomọn o wo obọdẹ uvẹ nọ ọ sae rọ gwọlọ uyo onọ yena via. Fikinọ o fe gaga, wo areghẹ, jẹ jọ ovie, o lọhọ kẹe nọ ọ sae rọ kiẹ via sọ eware nana e rẹ sae ginẹ kẹe uvi evawere. O le omawere nọ efe ọ rẹ wha ze, o wo eyae buobu nọ i wo erru gaga, jẹ reawere arozaha omaweromẹ nọ u wo ibe he. Ọ bọ ikpiwou. Ọ kiotọ eriariẹ ilogbo via. Ukuhọ riẹ eme ọ ruẹ? “Ai kpobi ifofe.” Dedena o vuhu oware ulogbo jọ mu, ọ ta nọ: “Ukuhọ eme na ona; a yo rai kpobi no. Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo.”—Ọtausiuwoma Na 12:8, 13.

[Uwoho nọ e rrọ ẹwẹ-obe avọ 15]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ ●

Ọtausiuwoma Na ●

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Hosia

Joẹl

Emọs

Obedaya

Jona

Maeka

Nahum

Habakuk

Zefanaya

Hagai

Zekaraya

Malakae

Matiu

Mak