Abọ 8

Emọ Izrẹl A Ruọ Ẹkwotọ Kenan

Joshua o su emọ Izrẹl fi Kenan kparobọ. Jihova ọ kẹ iguẹdhọ ogaga rọ thọ ahwo riẹ no okienyẹ

IKPE buobu taure emọ Izrẹl a tẹ te ruọ Kenan, Jihova ọ ya eyaa inọ ọ te rehọ ẹkwotọ na kẹ emọ Abraham. Whaọ emọ Izrẹl a ruẹrẹ oma kpahe no re Joshua o su ai nyae reuku Ẹkwotọ Eyaa na.

Ọghẹnẹ o bruoziẹ ọraha kpe ahwo Kenan no. Ọfariẹ-ogbe avọ azẹ-okpe ọhaha ọ da orẹwho na fia. Fikiere, Ọghẹnẹ ọ tẹ ta kẹ emọ Izrẹl inọ a raha ewho Kenan nọ a fi kparobọ kpobi muotọ.

Dede na, taure a tẹ te ruọ ẹkwotọ na, Joshua o vi ekiotọ ivẹ nyai rri rie, yọ a wohọ uwou aye jọ nọ a re se Rehab evaọ okpẹwho Jeriko. Dede nọ aye na o vuhu rai inọ ahwo Izrẹl, o dede i rae rehọ ziezi jẹ ko ai dhere uwou riẹ. Rehab o fi ẹrọwọ họ Jihova, Ọghẹnẹ Izrẹl, keme o yo kpahe obọ ogaga nọ Jihova o ro siwi ai no obọ ewegrẹ rai. O ru ekiotọ na duwu iyei kẹe inọ okenọ a te raha okpẹwho na, a te rọ obọ te ọyomariẹ gbe uviuwou riẹ hẹ.

Nọ emọ Izrẹl a ruọ ẹkwotọ Kenan no jẹ wọ ẹmo kpohọ Jeriko, Jihova ọ tẹ rọ edhere igbunu ru igbẹhẹ Jeriko kporo kuotọ. Joshua avọ ogbaẹmo riẹ a tẹ vẹruọ okpẹwho na jẹ raha iẹe muotọ, rekọ a dhobọte Rehab avọ uviuwou riẹ hẹ. Kẹsena, evaọ etoke ikpe ezeza, Joshua avọ otu-ẹmo riẹ a te fi abọ ologbo ọrọ Ẹkwotọ Eyaa na kparobọ. Ukuhọ riẹ, erua Izrẹl a tẹ ghale ekwotọ na fihọ omoma rai.

Nọ Joshua ọ kẹle uwhu no, o te se ahwo Izrẹl kpobi koko. Ọ tẹ kareghẹhọ ae eware iwoma buobu nọ Jihova o ru kẹ esẹ-ode rai, ọ tẹ tuduhọ ae awọ inọ a gọ Jihova. Dede na, nọ Joshua gbe ekpako nọ a gbẹ jọ a whu no, emọ Izrẹl a tẹ nyasiọ Jihova ba je mu eghẹnẹ erue họ ẹgọ. U te oware wọhọ ikpe egba esa (300) nọ emọ Izrẹl a je ro gbabọkẹ izi Jihova. Evaọ etoke yena, Jihova ọ kuvẹ nọ ewegrẹ Izrẹl, wọhọ ahwo Filistia, a jẹ rọ rehọ uye bẹ ai. Rekọ nọ emọ Izrẹl a te bo bru Jihova kẹ obufihọ, ọ vẹ rehọ Ibruoziẹ mu re a thọ orẹwho na—ibruoziẹ na i te ikpegbivẹ.

Wọhọ epanọ o rrọ obe Ibruoziẹ, Othniẹl họ obruoziẹ ọsosuọ, ọrọ urere kọ Samsin, ọzae nọ ọ mae goma evaọ usu ahwo nọ a rria otọakpọ na no. Ugogo oware jọ nọ u dhesẹ oma via unuẹse buobu evaọ ikuigbe urirẹ nọ e rrọ obe ọ Ibruoziẹ na họ: Ẹmeoyo kẹ Jihova o rẹ wha eghale buobu ze, uzou-uveghe o vẹ wha okpẹtu ze.

—Wọhọ epanọ o rrọ obe Joshua; Ibruoziẹ; Iruo-Izerẹ 18:24, 25.

◼ Fikieme Jihova o ro siwi Rehab avọ uviuwou riẹ?

◼ Nọ Joshua o whu no, didi owọ emọ Izrẹl a jẹ?

◼ Ugogo oware vẹ u dhesẹ oma via evaọ obe Ibruoziẹ?

[Omaa-iruo nọ e rrọ ẹwẹ-obe avọ 11]

Emuhọ

Ọnyano

Iruo-Izerẹ

Ikelakele

Iziewariẹ

Joshua ●

Ibruoziẹ ●

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

[Udhesẹ-oria nọ e rrọ ẹwẹ-obe avọ 11]

← Epanọ a rọ ruọ ẹkwotọ Kenan

− − Ekwotọ ọsosuọ nọ emọ Izrẹl a fi kparobọ

FONISIA

FILISTIA

KENAN

Jeriko

Jerusalẹm