Jesu Ọ Kparoma No!
Abọ 21
Jesu Ọ Kparoma No!
Jesu ọ rọ oma via kẹ ilele riẹ re o wuhrẹ ai jẹ ta udu họ ae awọ
EVAỌ ẹdẹ avesa nọ Jesu o whu no, eyae jọ nọ e jọ usu ilele riẹ a tẹ ruẹ nọ a ghelie utho nọ a ro di uki na no. Yọ uki na o rrọ ofofe!
Ikọ-odhiwu ivẹ e tẹ rọ oma via. Ọvo jọ ọ tẹ ta kẹ ae nọ: “Wha be guọlọ Jesu ohwo Nazarẹt na, . . . ọ kparoma no.” (Mak 16:6) Ababọ okioraha, eyae na e tẹ dhẹ nyae vuẹ ikọ na. Evaọ edhere, a te zere Jesu. Jesu ọ tẹ ta kẹ ae nọ: “Wha dhẹozọ họ: wha kpo eta kẹ imoni mẹ re a kpo obọ Galili, etẹe a jẹ te ruẹ omẹ.”—Matiu 28:10.
Evaọ ẹdẹ ọvo yena, ilele ivẹ jọ a je no Jerusalẹm kpohọ iwhre jọ nọ a re se Emeọs. Ohwo jọ o te ku oma gbe ae jẹ nọ ae oware nọ a be ta kpahe. Kpakọ Jesu nọ ọ kparoma no na họ ohwo nana nọ ọ rọ oma via kẹ ae evaọ oghẹrẹ nọ a sai ro vuhu ei hi na. Avọ uweri, a tẹ vuẹe inọ Jesu a be ta kpahe. Ohwo na ọ tẹ be ta eware buobu nọ a jọ Ikereakere na ruẹaro rai kpahe Mesaya na kẹ ae. Ẹhẹ, eware kpobi nọ a ruẹaro rai kpahe Mesaya na e jọ oma Jesu rugba. * Nọ ilele na a riẹ inọ kpakọ Jesu nọ ọ kparoma no wọhọ omama ẹzi na họ ohwo nọ a bi lele ta ẹme na, ọ tẹ rayẹ.
Ilele ivẹ na a tẹ nwani kuoma rẹriẹ kpobọ Jerusalẹm. A tẹ nya bru ikọ na nọ e kare ẹthẹ gboma evaọ uwou nọ a kokohọ. Epanọ aimava a je ro gbiku oware nọ a ruẹ kẹ ilele nọ i kiọkọ na, Jesu ọ tẹ rọ oma via. Onana u gbe ilele na unu te epanọ o jẹ rọ bẹ ae ẹrọwo! Jesu ọ tẹ nọ ae nọ: “Fiki eme enanọ i je no eva rai ze?” O te fibae nọ: “Enẹ a kere nọ, Kristi na ọ rẹ te ruẹ uye ọ vẹ kparoma no iwhuowhu ẹdẹ avesa.”—Luk 24:38, 46.
Evaọ edẹ udhuvẹ nọ Jesu ọ kparoma no, ọ rọ oma via kẹ ilele riẹ evaọ etoke sa-sa. Evaọ oke jọ ọ rọ oma via kẹ ilele nọ i bu vrẹ egba isoi (500)! O wọhọ nọ evaọ oke nana ọ rọ kẹ ae iruo ilogbo nana inọ: “Wha wuhrẹ ahwo erẹwho kpobi . . . re a ru eware kpobi nọ mẹ vuẹ owhai: ri, mẹ avọ owhai a gbẹ jọ kẹse kẹse, makọ te urere akpọ na.”—Matiu 28:19, 20.
Evaọ orọ urere nọ ọ jọ kugbe ikọ ikpegbọvo nọ e yọrọ ẹrọwọ rai na, Jesu ọ ya eyaa nọ: “Nọ [Ẹzi] Ẹri ọ ruọ [owhai] oma no wha re ti wo ogaga nọ wha ti ro se isẹri mẹ . . . rite ọnyaba akpọ na.” (Iruẹru Ikọ Na 1:8) Kẹsena Jesu o te muhọ etovrẹ kpohọ ehru, ẹgho o te di ude rai, a gbẹ rue riẹ hẹ.
—Wọhọ epanọ o rrọ obe Matiu uzou avọ 28; Mak uzou avọ 16; Luk uzou avọ 24; Jọn uzou avọ 20 gbe 21; 1 Ahwo Kọrint 15:5, 6.
◼ Ẹvẹ ilele na a rọ riẹ inọ Ọghẹnẹ ọ kpare Jesu no uwhu ze no?
◼ Eme Jesu o dhesẹ vevẹ kẹ ilele ivẹ nọ i je kpohọ iwhre nọ a re se Emeọs?
◼ Didi iruo Jesu ọ kẹ ilele riẹ taure o te kpohọ odhiwu?
[Oruvẹ-obotọ]
^ edhe-ẹme 6 Rọkẹ oriruo eruẹaruẹ kpahe Mesaya na nọ e jọ oma Jesu rugba, rri ẹwẹ-obe avọ 17-19 orọ ibroshọ nana gbe ẹwẹ-obe avọ 200-201 orọ obe na Eme Ebaibol na O Gine Wuhrẹ?
[Etehe nọ e rrọ ẹwẹ-obe avọ 24]
ẸZI ỌFUAFO NA
Ẹzi ọfuafo Ọghẹnẹ họ ogaga nọ o mai kpehru evaọ ehrugbakpọ na. Jihova Ọghẹnẹ ọ rehọ ẹzi hayo ogaga iruo riẹ ma idhiwu gbe akpọ na, jẹ rehọ iẹe kpọ ekere Ebaibol na. Ẹzi nana o ru nọ eware igbunu kpobi nọ ma jọ Ebaibol se na e rọ via, te onọ o mae rro kpaobọ na—ẹkparomatha Jesu Kristi wọhọ omama ẹzi ologbo.—Emuhọ 1:2; 2 Samuẹle 23:2; Iruẹru Ikọ Na 10:38; 1 Pita 3:18.
[Uwoho nọ e rrọ ẹwẹ-obe avọ 24]
Emuhọ
Ọnyano
Iruo-Izerẹ
Ikelakele
Iziewariẹ
Joshua
Ibruoziẹ
Rut
1 Samuẹle
2 Samuẹle
1 Ivie
2 Ivie
1 Iruẹru-Ivie
2 Iruẹru-Ivie
Ẹzra
Nehemaya
Ẹsta
Job
Ilezi
Itẹ
Ọtausiuwoma Na
Ole nọ O Vi Ile
Aizaya
Jerimaya
Enuobro
Izikiẹl
Daniẹl
Hosia
Joẹl
Emọs
Obedaya
Jona
Maeka
Nahum
Habakuk
Zefanaya
Hagai
Zekaraya
Malakae
● Matiu
● Mak
● Luk
● Jọn
Iruẹru Ikọ Na
Ahwo Rom
1 Ahwo Kọrint
2 Ahwo Kọrint
Ahwo Galesha
Ahwo Ẹfẹsọs
Ahwo Filipai
Ahwo Kọlọsi
1 Ahwo Tẹsalonika
2 Ahwo Tẹsalonika
1 Timoti