Abọ 19

Jesu Ọ Ta Eware nọ E te Via Evaọ Obaro

Jesu ọ fodẹ eware nọ i ti dhesẹ oka ọzino riẹ, inọ o muhọ esu no gbe inọ ekuhọ eyero akpọ nana ọ kẹle no

EVAỌ Ugbehru Olivi, nọ a be jọ ruẹ Jerusalẹm avọ etẹmpol riẹ, ilele ene Jesu jọ a tẹ lẹlẹ nọe kpahe eware jọ nọ ọ t’ẹme te no vẹre. U ri kri hi nọ Jesu ọ ta inọ a te raha etẹmpol nọ e rrọ Jerusalẹm muotọ. Yọ taure ọ tẹ te ta kpahe etẹmpol na, ọ kake ta kẹ ae no kpahe “urere akpọ na.” (Matiu 13:40, 49) Fikiere ilele na a tẹ nọe inọ: “Eme ọ rẹ te jọ oka ẹtha ra gbe urere akpọ na?”—Matiu 24:3.

Evaọ uyo, Jesu ọ tẹ vuẹ ae eware nọ e te via taure a tẹ te raha Jerusalẹm. Rekọ orọnọ etoke yena ọvo eme riẹ i kiekpahe he. Eware nọ ọ ta na i ti wo orugba ọfa nọ u ti kpomahọ akpọ na soso. Jesu ọ fodẹ eware sa-sa nọ e te via gbe uyero akpọ nọ u ti nwene, jẹ ta inọ enana kpobi e te jọ oka. Oka yena u ti dhesẹ kẹ ahwo-akpọ inọ ọzino Jesu wọhọ Ovie evaọ obọ odhiwu o muhọ no. Koyehọ Jihova Ọghẹnẹ ọ rọ Jesu mu Ovie ọrọ Uvie Mesaya nọ a ya eyaa riẹ anwẹdẹ na no. Oka na u ti dhesẹ inọ Uvie na u bi ti si emuemu kpobi no kẹle jẹ wha uvi udhedhẹ se ohwo-akpọ. Fikiere, eware nọ Jesu ọ fodẹ na e te jọ oka edẹ urere orọ eyero akpọ nana—egagọ, isuẹsu, gbe uzuazọ uyero akpọ inẹnẹ—je dhesẹ emuhọ eyero ọkpokpọ.

Nọ ọ jẹ ta kpahe eware nọ e te jọ otọakpọ via evaọ okenọ a tẹ rehọ iẹe mu ovie no evaọ obọ odhiwu, Jesu ọ ta nọ erẹwho avọ erẹwho i ti fi ẹmo, ohọo u ti mu, etọ i ti nuhẹ, ẹyao o ti vihọ, ahwo a ti koko uzi hi. Ofariẹ, uvi ilele Jesu a re ti whowho usiuwoma Uvie Ọghẹnẹ nya akpọ na soso du. Ukuhọ rai kpobi kọ ‘uye ulogbo,’ utionọ o re te via ẹdọvo ho no emuhọ akpọ na ze.—Matiu 24:21.

Kọ ẹvẹ ilele Jesu a te rọ riẹ sọ uye ulogbo na o kẹle no? Jesu ọ ta kẹ ae nọ a “jọ ure ojo rehọ uwuhrẹ.” (Matiu 24:32) Egha ure ojo e tẹ be whẹ ẹbe họ, oyena yọ oka inọ uvewhru o kẹle no. Epọvo na re, nọ eware kpobi nọ Jesu ọ ta na e tẹ be via evaọ etoke ọvona, oyena yọ oka inọ urere na o kẹle no. Ohwo ọvo ọ riẹ uzedhe ẹdẹ hayo oke nọ uye ulogbo na u ti ro muhọ họ, ajokpaọ Ọsẹ na ọvo. Fikiere, Jesu ọ tẹ hrẹ ilele riẹ inọ: “Wha roro; keme wha riẹ ezi nọ oke na u re te he.”—Mak 13:33.

—Wọhọ epanọ o rrọ obe Matiu uzou avọ 24 gbe 25; Mak uzou avọ 13; Luk uzou avọ 21.

◼ Eware jọ vẹ ilele Jesu a jẹ gwọlọ gbẹ riẹ kpahe?

◼ Eme oka nọ Jesu ọ kẹ na u dhesẹ, kọ didi eware i ru oka na via?

◼ Didi ohrẹ Jesu ọ kẹ ilele riẹ?

[Etehe nọ e rrọ ẹwẹ-obe avọ 22]

OKA ỌZINO KRISTI

Jesu ọ ta inọ ma te ruẹ oka nọ u ti dhesẹ nọ oke nọ Ọghẹnẹ ọ te rọ raha eyero akpọ ogbekuo nana ọ kẹle no. No anwọ Ẹmo Akpọ I ze, ahwo-akpọ a be rọ ẹro ruẹ eware nana nọ Jesu ọ ta na. Eware sa-sa nọ e be via evaọ egagọ, isuẹsu, gbe oghẹrẹ iyero efa jọ wariẹ akpọ na họ i bi su kpata kpata kpohọ urere akpọ nana nọ a rẹ sae vabọ no ho na. Jesu ọ vuẹ ilele riẹ inọ re a sae zọ, o gwọlọ nọ a re ‘rroro’ jẹ jowọ nọ u re dhesẹ inọ a rrọ abọ Ọghẹnẹ evaọ avro esuo ehrugbakpọ na. *—Luk 21:36; Matiu 24:3-14.

[Oruvẹ-obotọ]

[Omaa-iruo nọ e rrọ ẹwẹ-obe avọ 22]

Emuhọ

Ọnyano

Iruo-Izerẹ

Ikelakele

Iziewariẹ

Joshua

Ibruoziẹ

Rut

1 Samuẹle

2 Samuẹle

1 Ivie

2 Ivie

1 Iruẹru-Ivie

2 Iruẹru-Ivie

Ẹzra

Nehemaya

Ẹsta

Job

Ilezi

Itẹ

Ọtausiuwoma Na

Ole nọ O Vi Ile

Aizaya

Jerimaya

Enuobro

Izikiẹl

Daniẹl

Hosia

Joẹl

Emọs

Obedaya

Jona

Maeka

Nahum

Habakuk

Zefanaya

Hagai

Zekaraya

Malakae

● Matiu

● Mak

● Luk

● Jọn